مەكتەپ فورماسى بۇرىنعىسىنشا ءبىلىم بەرۋدىڭ زايىرلى سيپاتىنا ساي بولادى، ءبىراق بەلگىلى ءبىر وزگەرىستەر پايدا بولدى.
وڭىرلىك كوممۋنيكاسيالار قىزمەتىنىڭ ونلاين بريفينگىنە قاتىسقان الماتى قالالىق ءبىلىم باسقارماسى رۋحاني-ادامگەرشىلىك تاربيە ءبولىمىنىڭ باسشىسى نۇرگۇل تاۋ وقۋ-اعارتۋ ءمينيسترىنىڭ 2022 جىلعى 30 جەلتوقساندا قول قويعان بۇيرىعىن ءتۇسىندىردى، دەپ حابارلايدى Almaty-akshamy.kz
قىزدار ءۇشىن دە، ۇلدار ءۇشىن دە مەكتەپ فورماسىنا تۇيمەلەرى نەمەسە سىدىرماسى بار تريكوتاج كارديگان/كۇرتە، پولو جەيدە نەمەسە تەننيسكا قوسىلعان.
ەر بالالارعا ارنالعان مەكتەپ فورماسى:
- پيدجاك، جيلەت، شالبار، مەرەكەلىك جەيدە، كۇندەلىكتى جەيدە، نە تۇيمەلەرى بار نەمەسە سىدىرمالى توقىلعان كۇرتە/كارديگان، پولو جەيدە نەمەسە تەننيسكا (قىس مەزگىلىندە: تريكوتاج جيلەت، ۆودولازكا). ۇلدارعا ارنالعان شالبارلار ەركىن تىگىلگەن جانە ۇزىندىعى بويىنشا توبىقتى جاۋىپ تۇرادى.
قىز بالالارعا ارنالعان مەكتەپ فورماسى:
- پيدجاك، جيلەت، بەلدەمشە، شالبار، كلاسسيكالىق جەيدە، نە تۇيمەلەرى بار نەمەسە سىدىرمالى توقىلعان كۇرتە/كارديگان، پولو جەيدە نەمەسە تەننيسكا (قىسقى ۋاقىتتا: تريكوتاج جيلەت، سارافان، ۆودولازكا). قىزدارعا ارنالعان شالبارلار ەركىن تىگىلگەن جانە ۇزىندىعى بويىنشا توبىقتى جاۋىپ تۇرادى.
مەرەكەلىك فورماعا (ۇلدارعا اق كويلەك، قىزدارعا اق بلۋزكا) قويىلاتىن تالاپ الىنىپ تاستالدى. سونداي-اق، گالستۋك تاعۋ ەندى مىندەتتى ەلەمەنت ەمەس.
مەكتەپ فورماسىنا ورتا ءبىلىم بەرۋ ۇيىمىنىڭ ەرەكشەلىك بەلگىلەرىن (بەلگىلەر، تىگىسپەلەر، شيەۆرون جانە باسقا) ورنالاستىرۋعا رۇقسات ەتىلەدى.
مەكتەپ فورماسىنا ارنالعان ماتالار رەتىندە ساپاسى جاقسارتىلعان، تەز توزبايتىن، باكتەرياعا قارسى، ميكروبقا قارسى جانە انتيستاتيكالىق قاسيەتتەرى بار جارتىلاي ءجۇن جانە ماقتا ماتالاردى قولدانعان ءجون.
بۇرىن بۇل مىندەتتى تالاپ بولاتىن. 2023 جىلدان باستاپ الماتىدا جانە رەسپۋبليكا بويىنشا مەكتەپ فورماسىنا قويىلاتىن تالاپتار وزگەردى.