الماتىدا ەكىجاقتى ىنتىماقتاستىقتى دامىتۋ اياسىندا قازان قالاسىنان كەلگەن دەلەگاسيا ءۇشىن وتكىزىلگەن اقپاراتتىق تۋر اياقتالدى، دەپ حابارلايدى اlmaty-akshamy.kz الماتى قالاسىنىڭ تۋريزم باسقارماسىنا سىلتەمە جاساپ.
قازان دەلەگاسياسىنىڭ وكىلدەرى قازاقستان تاتارستان ءۇشىن ۇنەمى تارتىمدى ەكەنىن، ال Red Wings اۋەكومپانياسى الماتى – قازان تىكەلەي رەيسىن اشۋ ارقىلى ەكىجاقتى ىنتىماقتاستىق مۇمكىندىكتەردى ارتتىرعانىن اتاپ ءوتتى.
ساپار بارىسىندا تۋريزم سالاسىنىڭ وكىلدەرى ماڭىزدى مادەني جانە تۋريستىك نىساندارمەن تانىستى، سونداي-اق تۋريزم سالاسىن دامىتۋ جونىندەگى ىنتىماقتاستىق تۋرالى كەلىسىمگە قول قويدى. ول قالالار اراسىنداعى ءوزارا قارىم-قاتىناستاردى دامىتۋعا بەلگىلى ءبىر سەرپىن بەرەدى، اتاپ ايتقاندا، قازان جانە الماتى اراسىنداعى تۋريستىك اعىنداردىڭ ساپالى الماسۋىن رەتتەۋگە مۇمكىندىك بەرەدى.
«بۇگىندە الماتىدا الەمنىڭ ءتۇرلى ەلدەرىنەن كەلەتىن تۋريستەردىڭ قاتارى وسۋدە. قالانىڭ ىسكەرلىك، ەكولوگيالىق، مادەني-ەتنوگرافيالىق، تاۋ شاڭعىسى ءتۋريزمىن، سونداي-اق وتباسىلىق دەمالىستى دامىتۋداعى مۇمكىندىكتەرى ۇلكەن. ستاتيستيكا بويىنشا، 2022 جىلدىڭ ءۇشىنشى توقسانىندا الماتى قالاسىنا 270 مىڭنان استام شەتەلدىك تۋريستەر كەلدى. شەتەلدىك تۋريستەردىڭ ەڭ كوپ اعىنى رەسەي، وزبەكستان، ۋكراينا، ءازىربايجان، ساۋد ارابياسى، ۇلىبريتانيا، تۇركيا، قىرعىزستان، تاجىكستان، ءۇندىستان، گفر، اقش، قحر، وڭتۇستىك كورەيا، ت.ب. ەلدەردەن كەلەدى. الداعى ۋاقىتتا شەتەلدىك تۋريستەر اعىنىن جىل سايىن 1 ميلليونعا دەيىن كوبەيتۋ جوسپارلانىپ وتىر»، – دەپ حابارلايدى الماتى قالاسىنىڭ تۋريزم باسقارماسى.