ءتارتىپ ساقشىلارى جول قوزعالىسى ەرەجەسىن ۇيرەتتى.
الماتى پوليسەيلەرى شاھاردىڭ بارلىق جالپى ءبىلىم بەرەتىن مەكتەپتەرىندە «جولدا ءجۇرۋ ەرەجەلەرى» ساباعىن وتكىزدى، دەپ حابارلايدى Almaty-akshamy.kz.
ىشكى ىستەر مينيسترلىگىنىڭ رەسمي سايتىنداعى مالەمەت بويىنشا، ءبىرىنشى سىنىپ وقۋشىلارىنا ءتارتىپ ساقشىلارى جول قوزعالىسى ەرەجەسىن ۇيرەتتى.
«بالالار – ءبىزدىڭ بولاشاعىمىز، سوندىقتان ولاردىڭ ءومىرى مەن دەنساۋلىعىنا ەشتەڭە ءقاۋىپ توندىرمەۋى وتە ماڭىزدى. جول – جاراقات الۋ مەن ءولىم ءقاۋپى جوعارى ورىن بولىپ قالا بەرەتىندىكتەن، بالا كىشكەنتاي كەزىنەن باستاپ كوشەدە ءجۇرۋ ەرەجەلەرى مەن ىس-ارەكەتىن ءبىلۋى كەرەك. جوسپارلانعان ءىس-شارالار اياسىندا بالالاردىڭ العان بىلىمدەرىن ءىس جۇزىندە قولدانۋ داعدىلارى قالىپتاسادى. بالالار جولدا ءجۇرۋ ەرەجەلەرى تۋرالى بىلىمدەرىن تولىقتىردى، ءوز تاجىريبەلەرىمەن ءبولىستى، ءجۇرىس بولىگىنەن قالاي دۇرىس ءوتۋ كەرەكتىگىن ايتتى. بۇگىنگى ءبىرىنشى سىنىپ وقۋشىلارىنىڭ جول قوزعالىسى ەرەجەلەرى تۋرالى تۇسىنىگى بار ەكەنىن اتاپ وتكىم كەلەدى، بۇل وتباسىنداعى جانە بالاباقشالارداعى بالالاردىڭ قاۋىپسىزدىگىنە ءتيىستى نازار اۋدارىلعانىن كورسەتەدى»، – دەدى الماتى قالالىق پد جەرگىلىكتى پوليسيا قىزمەتى باسقارماسىنىڭ باستىعى ماناپ ساتتاروۆ.
مەكتەپ وقۋشىلارىنا جول قوزعالىسى ەرەجەلەرى تۋرالى يلليۋستراسيالىق بوياۋ كىتاپشالارى، بۋكلەتتەر، بروشيۋرالار جاسالدى. بارلىق سايىستار مەن سۇراق-جاۋاپتار ويىن تۇرىندە ءوتتى. بالالارعا ءقاۋىپسىز ءجۇرىس-تۇرىستىڭ ماڭىزدىلىعىن كۇن سايىن ەسكە سالۋ قاجەت.
«ءبىلىم كۇنى قارساڭىندا ءبىز مۇعالىمدەرمەن كەزدەسۋلەر وتكىزەمىز، ونىڭ بارىسىندا وقۋ پروسەسى كەزىندە مەكتەپ وقۋشىلارىنىڭ قاۋىپسىزدىگى ماسەلەلەرى شەشىلەدى. ءبىز سىزدەردى جول قوزعالىسى ەرەجەلەرىن زەردەلەۋ بويىنشا سىنىپتاردىڭ تاجىريبەلىك ساباقتارعا دايىندىعىن تەكسەرۋگە، بارلىق قاجەتتى ۇگىت-ادىستەمەلىك قۇرالداردى ساتىپ الۋعا، جاڭا وقۋ جىلىنا جول قوزعالىسى ەرەجەلەرى بويىنشا وقۋ جوسپارىن قۇرۋعا شاقىرامىز. مۇنداي تىعىز جانە ۇيلەستىرىلگەن ءوزارا ءىس-قيمىل، ءبىزدىڭ ويىمىزشا، بالالاردىڭ جول-كولىك جاراقاتى مەن اپاتتارىن ازايتۋعا، قالاداعى جول قوزعالىسىن تۇراقتاندىرۋعا وتە ءتيىمدى اسەر ەتەدى»، – دەدى ماناپ ساتتاروۆ.