«بالالار ءۇنى – بولاشاقتىڭ داۋىسى». الماتى قالاسىندا 1 ماۋسىم – حالىقارالىق بالالاردى قورعاۋ كۇنىنە وراي «قازاقستان بالالارى» رەسپۋبليكالىق جوباسى اياسىندا اۋقىمدى مەرەكەلىك شارالار باستالدى. بۇل تۋرالى Aqshamnews.kz سايتى حابارلايدى.
ماقسات – بالالاردىڭ ءوز ويىن ەركىن بىلدىرۋىنە، شىعارماشىلىق جانە ازاماتتىق بەلسەندىلىگىن دامىتۋعا جاعداي جاساۋ. 27 مامىر كۇنى الماتى قالاسىنداعى ءبىلىم بەرۋ ۇيىمدارىندا «بالالار ءۇنى» ۇرانىمەن تاقىرىپتىق ءىس-شارالار ءوتتى. جوبا اياسىندا مەديا باستامالارعا، ەركىن پىكىر ايتۋعا جانە شىعارماشىلىققا دەن قويىلدى. مەكتەپ وقۋشىلارى مەن ولاردىڭ اتا-انالارى ءۇشىن ۇيىمداستىرىلعان شارالارعا 105 مىڭنان استام وقۋشى مەن 10 مىڭ اتا-انا قاتىستى.
ناۋرىزباي اۋدانىنداعى №208 مەكتەپ-گيمنازياسىندا بالالارعا ارنالعان كاسىپتىك باعدار بەرۋ ماستەر-كلاسسى وتكىزىلدى. بۇل شاراعا كوللەدج ستۋدەنتتەرى مەن وقۋشىلاردىڭ اتا-انالارى قاتىسىپ، ءتۇرلى ماماندىقتار تۋرالى جان-جاقتى ماعلۇمات بەرىلدى. ماقسات – وقۋشىلاردى ەرتە جاستان ءوز بولاشاعىنا سانالى كوزقاراسپەن قاراۋعا باۋلۋ.
ال №174 مەكتەپ-گيمنازياسىندا «ۇرپاق ءۇنى» مەديا-ستۋدياسىنىڭ اشىق كۇنى ۇيىمداستىرىلدى. جاس تىلشىلەر ءوز جاڭالىقتىق بەينەسيۋجەتتەرىن ۇسىنىپ، «قازىرگى الەمدەگى بالانىڭ داۋىسى» تاقىرىبىندا پودكاست جازىپ، مەكتەپتىك گازەتىنىڭ جاڭا سانىن جارىققا شىعاردى. بۇل باستاما #مەنىڭداۋىسىم جوباسى اياسىندا جۇزەگە استى.
تۇركسىب اۋدانىنداعى №59 مەكتەپ-گيمنازياسىندا باستاۋىش جانە ورتا بۋىن وقۋشىلارىنا ارنالعان «بالالىق شاق ماڭگى بولسىن!» اتتى فلەشموب ءوتتى. بالالار بي بيلەپ، ءان سالىپ، سپورتتىق جارىستار مەن ويىندارعا قاتىستى. بۇل شارانىڭ باستى ماقساتى – بالالاردىڭ كوڭىلىن كوتەرۋ، باستاماشىلدىعىن قولداۋ جانە شىعارماشىلىق قابىلەتىن ارتتىرۋ بولدى.
تۇركسىب اۋدانىنداعى №211 مەكتەپ-گيمنازياسىندا ەرەكشە چەللەندج – #مەنىڭداۋىسىم باستاماسى قولعا الىندى. ونىڭ اياسىندا وقۋشىلار بەينەۇندەۋلەر ارقىلى بەيبىتشىلىك، دوستىق، ەكولوگيا، سۇيىكتى مەكتەپ جانە قازاقستاننىڭ بولاشاعى تۋرالى ءوز ويلارىن ءبىلدىردى. بۇل بەينەجازبالار الەۋمەتتىك جەلىلەر مەن مەكتەپ مەديا رەسۋرستارىندا جاريالانىپ، ۇلكەن قولداۋ تاپتى.
چەللەندج وقۋشىلاردىڭ ءوزىن-وزى تانىپ، ويىن اشىق جەتكىزە بىلۋىنە ىقپال ەتتى. اتا-انالار مەن مۇعالىمدەردىڭ دە بەلسەندى قاتىسۋى ارقىلى بۇل باستاما وقۋشىلاردىڭ بويىنداعى ازاماتتىق بەلسەندىلىكتى ارتتىرۋعا زور اسەر ەتتى.
الماتى قالاسىنداعى بۇل مەرەكەلىك ءىس-شارالار بالالاردىڭ بارلىق جاس ەرەكشەلىكتەرىن قامتىپ، ولاردىڭ جازعى ماۋسىمدى شابىتپەن قارسى الۋىنا سەپتىگىن تيگىزدى. ەڭ باستىسى – بالالاردىڭ ءۇنى شىنايى ەستىلدى. ولار ءوز ويلارىن ەركىن ءبىلدىرىپ، شىعارماشىلىق الەۋەتىن تانىتتى.
قازىرگى مەكتەپ – بۇل تەك ءبىلىم وشاعى ەمەس، سونداي-اق بالالاردىڭ ديالوگقا ءتۇسىپ، ءوز داۋىستارىن ەستىرتۋگە مۇمكىندىك الاتىن كەڭىستىگىنە اينالىپ كەلەدى.
كىلت سوزدەر: الماتى، بالالار ءۇنى، قازاقستان بالالارى، حالىقارالىق بالالاردى قورعاۋ كۇنى، مەكتەپ ءىس-شارالارى، #مەنىڭداۋىسىم، بالالاردىڭ شىعارماشىلىعى، مەديا ساۋات، فلەشموب، چەللەندج.