الماتى قالالىق ءماسليحاتىنىڭ دەپۋتاتى قاراشاش جۇزەيەۆا جۇمىس پەن وقۋ ۋاقىتىن وزگەرتۋ ارقىلى تاڭعى جانە كەشكى قاربالاس ساتتەردە كولىك كەپتەلىسىن ازايتۋدى ۇسىندى. بۇل باستاما قالاداعى كولىك اعىنىن رەتتەۋگە جانە تۇرعىنداردىڭ ءومىر ساپاسىن جاقسارتۋعا باعىتتالعان.
ۇسىنىسقا سايكەس، ەكى اۋىسىمدى وقىتۋ جۇيەسى بار مەكتەپ وقۋشىلارى مەن ستۋدەنتتەردىڭ ساباقتارى جارتى ساعات ەرتەرەك - تاڭعى 7:30-دا باستالۋى مۇمكىن. ال كاسىپورىندار مەن حولدينگتەردىڭ جۇمىس كۇنى ساعات 9:00-دەن 8:30-عا اۋىستىرىلسا، جەكە كومپانيالار - بانك، ۇكىمەتتىك ەمەس ۇيىمدار، نوتاريالدىق كەڭسەلەر مەن جارناما اگەنتتىكتەرىنىڭ قىزمەتكەرلەرىنە قاشىقتان جۇمىس ىستەۋ فورماتىنا كوشۋ قاراستىرىلىپ وتىر.
دەپۋتات جەكە مەكتەپتەرگە دە نازار اۋداردى: ولاردى وقۋشىلار ءۇشىن اۆتوبۋس جالداۋعا شاقىردى. بۇل شارا تاڭعى ۋاقىتتا جەكە كولىكتەردىڭ سانىن ازايتۋعا مۇمكىندىك بەرەدى.
جۇزەيەۆانىڭ ايتۋىنشا، مۇنداي وزگەرىستەر جول قوزعالىسىن جەڭىلدەتىپ قانا قويماي، قالا تۇرعىندارىنىڭ ۋاقىتىن ۇنەمدەۋگە جانە ەكولوگيالىق جاعدايدى جاقسارتۋعا سەپ بولادى.
"كوللەدجدەر مەن جوعارى وقۋ ورىندارىنداعى ساباق باستالۋ ۋاقىتىن، ءىرى ۇيىمدارداعى جۇمىس كەستەسىن وزگەرتۋ جولدى بوساتىپ، قالالىق ينفراقۇرىلىمنىڭ تيىمدىلىگىن ارتتىرادى. ويتكەنى شامادان تىس جۇكتەلگەن جول اۋا ساپاسىنا دا، تۇرعىنداردىڭ دەنساۋلىعىنا دا تىكەلەي اسەر ەتەدى"، – دەپ اتاپ ءوتتى قالالىق ءماسليحات دەپۋتاتى.