VIII سايلانعان الماتى ءماسليحاتىنىڭ كەزەكتەن تىس XXI سەسسياسى بارىسىندا دەپۋتاتتار قالانىڭ قوعامدىق كولىگىندە جول جۇرۋگە قاتىستى 120 تەڭگەگە جاڭا ءتاريفتى ماقۇلدادى.
بۇگىندە الماتىدا 22 جەكە جانە 1 كوممۋنالدىق اۆتوبۋس پاركى جۇمىس ىستەيدى. كۇن سايىن جەلىدە شامامەن 2،3 مىڭ اۆتوبۋس پەن 184 تروللەيبۋس جۇرەدى. قوعامدىق كولىكتەرمەن جول جۇرەتىن جولاۋشىلار سانى كۇنىنە 1،5 ميلليون ادامنان استى.
ءماسليحات دەپۋتاتتارىنىڭ الدىندا ءسوز سويلەگەن قالالىق موبيلدىلىك باسقارماسىنىڭ باسشىسى ساعىندىق تەلىبايەۆ 2023 جىلعى تامىزدا جول ءجۇرۋ ءتاريفى 11 جىلدا العاش رەت 100 تەڭگەگە دەيىن كوتەرىلگەنىنە قاراماستان، جول اقىسىن تولەۋدەن تۇسەتىن كۇندەلىكتى تۇسىمدەر اۆتوبۋستاردى جوندەۋ، قوسالقى بولشەكتەر مەن شىعىن ماتەريالدارىن ساتىپ الۋ سياقتى تاسىمالداۋشىلاردىڭ بارلىق شىعىندارىن وتەمەيتىنىن اتاپ ءوتتى.
«جىل سايىن اۆتوبۋستارعا، قوسالقى بولشەكتەرگە جانە وزگە دە شۇعىل شىعىستارعا باعانىڭ ءوسۋى تىركەلۋدە. قوسالقى بولشەكتەردى ۋاقتىلى ساتىپ الۋ مۇمكىن ەمەس، ال بۇل جولاۋشىلار تاسىمالىنىڭ ساپاسىنا تەرىس اسەر ەتۋدە. سونىڭ سالدارىنان قالا تۇرعىندارى ءادىل شاعىمدار جاسايدى. اكىمدىك پەن جەكە تاسىمالداۋشىلار جىلجىمالى قۇرامدى ۇنەمى جاڭارتىپ وتىرۋ جانە جۇمىس ىستەپ تۇرعان اۆتوپاركتى ساپالى كۇتىپ ۇستاۋ ءۇشىن وراسان زور قاراجات بولۋگە ءماجبۇر»، - دەدى ساعىندىق تەلىبايەۆ.
ول مەملەكەت باسشىسىنىڭ قوعامدىق كولىكتى ەكولوگيالاندىرۋ جونىندەگى تاپسىرمالارىن ورىنداۋ اياسىندا الماتى اكىمدىگى 2023 جىلى 600 جاڭا اۆتوبۋس پەن 100 تروللەيبۋس ساتىپ العانىن، اعىمداعى جىلى قوسىمشا 600 اۆتوبۋس، 112 تروللەيبۋس جانە 100 ەلەكتروبۋس ساتىپ الۋ جوسپارلانعانىن اتاپ ءوتتى. سونىمەن قاتار، جەكە تاسىمالداۋشىلار 2023 جىلى 550 اۆتوبۋس ساتىپ الدى، اعىمداعى جىلى 400-گە جۋىق جاڭا اۆتوبۋس پەن 15 ەلەكتروبۋس ساتىپ الۋدى جوسپارلاپ وتىر. قابىلدانعان شارالار 2024 جىلى ەكولوگيالىق تازا كولىكتىڭ ۇلەسىن 70% - عا دەيىن ارتتىرۋعا مۇمكىندىك بەرەدى، بۇل رەتتە اۆتوبۋستاردىڭ ورتاشا جاسى 3 جىلدى قۇرايدى.
«بۇگىندە الماتىدا 178 تۇراقتى قالالىق جانە قالا ماڭىنداعى باعىتتار ۇيىمداستىرىلعان، اعىمداعى جىلى 70-كە جۋىق ەلدى مەكەندى قامتي وتىرىپ، قوسىمشا 20 جاڭا قالا ماڭىنداعى باعىتتار اشۋ جوسپارلانۋدا. تاسىمالداۋشىلاردىڭ ناقتى شىعىستارى 310 تەڭگەدەن اسادى، كەيبىر باعىتتاردى 400 تەڭگەدەن اسادى، وسىعان بايلانىستى اكىمدىك الەۋمەتتىك ماڭىزى بار باعىتتاردى سۋبسيديالاۋدى جۇرگىزەدى. ماسەلەن، 2017-2023 جىلدار ارالىعىندا تاسىمالداۋشىلارعا 217،6 ملرد تەڭگە سۋبسيديا تولەندى. 2024 جىلى سۋبسيديالاردىڭ بولجامدى سوماسى 97،3 ملرد. تەڭگەنى قۇرايدى. قابىلدانعان شارالار 2024 جىلى سۋبسيديالار سوماسىن 7 ملرد تەڭگەگە دەيىن تومەندەتۋگە مۇمكىندىك بەرەدى، سونداي - اق قالا تۇرعىندارىن ساپالى، ءقاۋىپسىز جانە جايلى قوعامدىق كولىك قىزمەتتەرىمەن قامتاماسىز ەتۋگە وڭ اسەر ەتەدى»، - دەپ قورىتىندىلادى باسقارما باسشىسى.
اتاپ وتەرلىك جايت، ماسليحاتپەن كەلىسۋ راسىمىنەن كەيىن تاريف قالا اكىمدىگىنىڭ قاۋلىسىمەن بەكىتىلەتىنىن اتاپ ءوتۋ قاجەت. مەرزىمدەرى تۋرالى قوسىمشا حابارلاناتىن بولادى.