قالا اكىمى ەربولات دوسايەۆتىڭ تاپسىرماسىنا سايكەس بيۋدجەتكە ەنگىزىلگەن وزگەرىستەر قالانىڭ الەۋمەتتىك باسىمدىقتارىن ىسكە اسىرۋعا باعىتتالعان.
بۇگىن الماتى قالاسى ءماسليحاتىنىڭ جەرگىلىكتى بيۋدجەتتى ناقتىلاۋ جونىندەگى XV سەسسياسى ءوتتى، دەپ حابارلايدى Almaty-akshamy.kz
مەگاپوليس باسشىسىنىڭ باستاماسىمەن بيۋدجەتتىڭ قازىرگى شىعىندارى، اتاپ ايتقاندا فەستيۆالدار، فورۋمدار مەن ءتۇرلى يميدجدىك ءىس-شارالاردى وتكىزۋگە ارنالعان شىعىندار قىسقارتىلدى. قوسىمشا بولىنەتىن قاراجاتتىڭ 60%-دان استامى دامۋعا – الەۋمەتتىك ماڭىزى بار جوبالارعا باعىتتالادى.
الماتى قالاسى قارجى باسقارماسىنىڭ باسشىسى قانات سۋحامبەكوۆ اتاپ وتكەندەي، جالپى بيۋدجەتتى ناقتىلاۋ بيۋدجەت قاراجاتىن ىشكى قايتا ءبولۋ جانە 2023 جىلى بيۋدجەتتىڭ كىرىس بولىگىن اسىرا ورىنداۋ ەسەبىنەن جۇرگىزىلەدى.
«جايلى مەكتەپ» ۇلتتىق جوباسى اياسىندا 37 100 وقۋشىعا ارنالعان 22 مەكتەپ سالۋ جۇمىستارى جالعاسىپ وتىر. جەرگىلىكتى بيۋدجەتتەن قالاداعى 13 مەكتەپتىڭ ينجەنەرلىك-كوممۋنيكاسيالىق ينفراقۇرىلىم (جىلۋ- سۋمەن جابدىقتاۋ، ەلەكتر قۋاتى) جانە تالشىقتى-وپتيكالىق بايلانىس جەلىلەرىن سالۋعا قاراجات بولىنەدى.
2024 جىلى شۇعىلا شاعىن اۋدانىندا تۋبەركۋلەزدىڭ بەلسەندى ەمەس ءتۇرى بار بالالاردى وقىتۋعا ارنالعان ساناتوريي ۇلگىسىندەگى جاتاقحاناسى بار 340 ورىندىق جاڭا مەكتەپ، سونداي-اق الماتى تەلەكوممۋنيكاسيا جانە ماشينا جاساۋ كوللەدجىنىڭ قۇرىلىسى باستالادى. بۇعان قوسا، №58، 73، 83 مەكتەپتەر مەن رەسپۋبليكالىق فيزيكا-ماتەماتيكا مەكتەبىنىڭ عيماراتتارىن قايتا جاڭارتۋ جوسپارلانعان.
بيىل قۇرىلىس جۇمىستارى الاتاۋ اۋدانىنىڭ «راحات-مادەنيەت» شاعىن اۋدانىنداعى ەلەكترمەن جابدىقتاۋ جەلىلەرىن سالۋعا قاتىستى بولادى. وسىلايشا، 2024 جىلدىڭ سوڭىنا دەيىن الاتاۋ اۋدانىنىڭ 10 مىڭ تۇرعىنى ۇزدىكسىز ەلەكترمەن قامتاماسىز ەتىلەدى.
بيىل 3 كولىك-اۋىستىرىپ ءمىنۋ تورابىنىڭ قۇرىلىسى باستالادى: رايىمبەك داڭعىلى، «№ 7 قالالىق اۋرۋحانا» ايالداماسى، بوكەيحانوۆ كوشەسى، 508، «سالەم» اۆتوۆوكزالى، پۋشكين كوشەسى جانە رايىمبەك داڭعىلى، «ساياحات» ايالداماسى)، بۇل وبلىستان كەلگەن تۇرعىندارعا كولىگىن ارنايى تۇراققا قالدىرۋعا جانە قوعامدىق كولىكتى پايدالانۋعا مۇمكىندىك بەرەدى.
سونداي-اق، 30 كم تروتۋارلاردى، 5 كم ۆەلوجولداردى (ۆەلوجولاقتاردى)، 40 ايالداما قالتاسى مەن الاڭدى ورتاشا جانە اعىمداعى جوندەۋ جوسپارلانعان.
سكۆەرلەردى، ساياباق ايماقتارى مەن قوعامدىق كەڭىستىكتەردى اباتتاندىرۋ جوسپارلانعان. المالى اۋدانىندا پانفيلوۆ كوشەسىنىڭ (قابانباي باتىردان جىبەك جولىنا دەيىن) جاياۋ جۇرگىنشىلەر ايماعىنا اعىمداعى جوندەۋ جۇمىستارى جۇرگىزىلەدى. مەدەۋ اۋدانىندا 4 سكۆەر مەن بۋلۆارعا، ونىڭ ىشىندە «ەنەرگەتيكتەر»، «دۋمان-2» سكۆەرلەرى اعىمداعى جوندەۋدەن وتەدى.
«تەررەنكۋر» ساياباق ايماعى كولىنىڭ اينالاسىنداعى اۋماقتى اۋقىمدى قايتا قۇرۋ جوسپارلانعان. جۇمىس بىتكەن سوڭ مۇندا توعان بويىندا سەرۋەندەۋ جولى بار كەڭ دەمالىس ايماعى، ەكى دەڭگەيلى بالالار ەكو الاڭى، ۆوركاۋت ايماعى، سپورت جانە يوگا الاڭدارى بولادى. سونداي-اق، جوبادا اشىق اسپان استىندا امفيتەاتر ورناتۋ قاراستىرىلعان. ساياباق ايماعى مەگاپوليستىڭ تۇرعىندارى مەن قوناقتارى ءۇشىن تارتىلىس ورتالىعىنا اينالادى.