الماتى مارافونى - World Athletics ستاندارتتارىنا ساي سەرتيفيكاتتالعان ەڭ ۇلكەن جۇگىرۋ جارىسى.
بۇگىن تۇستەن كەيىن وتكەن «الماتى مارافونى–2023» حالىقارالىق جارىسى 15 جاستان اسقان سپورتشىلار مەن كوپتەگەن كورەرمەندەردى جينادى. جارىستىڭ باستالۋى مەن اياقتالۋى رەسپۋبليكا الاڭىندا بولدى، دەپ حابارلايدى Almaty-akshamy.kz.
قاتىسۋشىلارعا ءتورت قاشىقتىقتىڭ ءبىرىن تاڭداۋ مۇمكىندىگى بەرىلدى: 42 شاقىرىمدىق كلاسسيكالىق مارافون نەمەسە ونىڭ جارتىسى مەن تورتتەن ءبىرى. سونىمەن بىرگە، 42،2 جانە 21،1 شاقىرىم قاشىقتىقتا، الدىن الا ىرىكتەۋدەن وتكەن وزىق قاتىسۋشىلار ءۇشىن «ەليتا» ساناتى قاراستىرىلعان. الماتى مارافونىنىڭ كەيبىر قاتىسۋشىلارى سكانديناۆيالىق سەرۋەنمەن 10 شاقىرىم قاشىقتىقتى ەڭسەرۋدى تاڭداسا، باسقالارى كوماندالىق ەستافەتاعا قاتىستى.
سونداي-اق، الماتى مارافونى اياسىندا بيىل العاش رەت 35 جاستان اسقان قاتىسۋشىلار ءۇشىن تاس جولدا 10 كم جۇگىرۋدەن قازاقستان رەسپۋبليكاسىنىڭ چەمپيوناتى ءوتتى.
ۇيىمداستىرۋشىلاردىڭ ايتۋىنشا، مارافون بيىلعى جىلى 15 600 ادامنىڭ باسىن قوستى، مارافون وتكىزىلگەن العاشقى جىلى 2012-دە وعان 2،5 مىڭ ادام قاتىسقان بولاتىن.
جۇگىرۋ جارىسىنىڭ باسىندا دا، سوڭىندا دا مەرەكەلىك اتموسفەرا ورنادى. بۇعان شۋاقتى اۋا رايى، كوڭىلدى مۋزىكا، ادامداردىڭ كوتەرىڭكى كوڭىل-كۇيلەرى دە اسەر ەتتى دەسە بولادى. كورەرمەندەر تاراپىنان دا جۇگىرۋگە كەلگەندەرگە قولداۋ كورسەتكەندەر قاراسى قالىڭ بولدى. مارافونشىلاردىڭ اراسىندا العاش رەت وسىنداي جارىسقا قاتىسقاندار دا بولدى. جاپپاي جۇگىرۋ جارىسىنان الماتى اكىمى ەربولات دوسايەۆ تا كوزگە ءتۇسىپ قالدى، ءتىپتى ونىمەن قاشىقتىقتى ەڭسەرۋ كەزىندە كەيبىر سپورتشىلار سەلفيگە ءتۇسىپ ۇلگەرگەن.
ۇيىمداستىرۋشىلاردىڭ ايتۋىنشا، الماتى مارافونى – قايىرىمدىلىق ءىس-شارا. قاتىسۋشىلاردىڭ باستاپقى جارنالارىنان تۇسكەن قاراجاتتىڭ ءبىر بولىگى 68 ملن تەڭگە كولەمىندە سپورتتىق ينفراقۇرىلىم سالۋعا جانە ءۇش بالالار ۇيىنە، دەنە جانە اقىل-وي دامۋ ەرەكشەلىكتەرى بار بالالارعا ارنالعان ءۇش وڭالتۋ ورتالىعىنا، پسيحياتريالىق مەكەمەگە، سونداي-اق الماتى مەن الماتى وبلىسىنىڭ ورتالىق ستاديونىنا ارنايى جابدىقتاردى ساتىپ الۋعا باعىتتالاتىن بولادى.