ەكى شەتەلدىك تۋريست بەلگيا جانە فرانسيا ازاماتتارى ەكەن.
الماتى وبلىسى توتەنشە جاعدايلار دەپارتامەنتىنىڭ مالىمەتىنشە، ولار اقش بايلانىسشىلارىنىڭ ارقاسىندا تابىلدى، دەپ حابارلايدى Almaty-akshamy.kz Ratel.kz- كە سىلتەمە جاساپ.
سەيسەنبى، 23 ناۋرىز كۇنى، كەشكى ساعات سەگىزدە الماتى وبلىسى توتەنشە جاعدايلار دەپارتامەنتىنىڭ پۋلتىنە ەكى شەتەلدىك ءتۋريستىڭ ەڭبەكشىقازاق اۋدانىندا اسى اسۋىندا بارتوعاي سۋ قويماسى ماڭىندا جوعالىپ كەتكەنى تۋرالى حابارلاما كەلىپ ءتۇستى. وقيعا ورنىنا دەرەۋ قۇتقارۋشىلار جونەلتىلدى.
قازاقستاننىڭ اسەم تابيعاتىنىڭ كورىكتى جەرلەرىن ارالاۋدى جوسپارلاعان 1987 جىلى تۋعان بۇل ازاماتتاردىڭ جالدامالى كولىكتەرى بۇزىلىپ قالعانى بەلگىلى بولدى. ولار كولىكتەگى اقاۋدى ءوز بەتىمەن جوندەي الماعاندىقتان، سپۋتنيكتىك بايلانىس ارقىلى قۇتقارۋشىلاردىڭ كومەگىنە جۇگىنگەن.
«سپۋتنيكتىك تەلەفوننىڭ كومەگىمەن «SOS» تۇيمەسىن باسۋ ارقىلى تۋريستەر كوورديناتتارى مەن ولاردىڭ ورنالاسقان وزدەرىنىڭ مەكەن-جايىن جىبەرە العان. العاشقى كومەك سۇراعان حابارلامانى اقش-تا بايلانىس قىزمەتىن كورسەتەتىن كومپانيا العان، كەيىن بۇل حابارلاما قازاقستان ەلشىلىگى ارقىلى الماتى قالاسىنىڭ ديپلوماتيالىق وكىلدىگىنە جىبەرىلدى، ول ءوز كەزەگىندە بۇل حابارلامانى الماتى وبلىسىنىڭ توتەنشە جاعدايلار دەپارتامەنتىنە جەتكىزدى»، - دەيدى قۇتقارۋشىلار.
ايتۋلارىنشا، تۇنگى ءبىر جارىمدا توتەنشە جاعداي ورنىنا قىزمەتكەرلەر مەن تەحنيكا جىبەرىلگەن.
«تۇنگى ساعات 1:30-دا تجد كۇشتەرى (6 قىزمەتكەر مەن 2 تەحنيكا)، الماتى قالاسى جەدەل قۇتقارۋ ءبولىمى (9 قىزمەتكەر جانە 2 تەحنيكا، 1 كينولوگيالىق بريگادا)، شەلەك اۋىلىنىڭ جەرگىلىكتى پوليسيا قىزمەتىنىڭ (5 قىزمەتكەر مەن 2 تەحنيكا) كومەگىمەن تۋريستەر تابىلىپ، الماتىعا جونەلتىلدى. ولارعا مەديسينالىق كومەك كورسەتۋدىڭ قاجەتى بولعان جوق»، - دەپ مالىمدەدى وبلىستىڭ توتەنشە جاعدايلار دەپارتامەنتىنىڭ باسپا ءسوز قىزمەتى.