بوستاندىق اۋدانى ساين مەن كەكىلبايەۆ كوشەلەرىنىڭ اراسىنداعى تورايعىروۆ كوشەسى بويىنداعى جۇرگىنشىلەر ايماعىن قايتا قۇرۋ اياقتالدى. «حالىق قاتىساتىن بيۋدجەت» باعدارلاماسى جانە تۇرعىنداردىڭ باستاماسىمەن بۇل ايماق سەرۋەندەيتىن، دەمالاتىن قوعامدىق كەڭىستىككە اينالدى. بۇل تۋرالى بوستاندىق اۋدانىنىڭ اكىمدىگى حابارلادى.
بۇرىن يەسىز بوس جاتقان ايماق بۇگىندە تانىماستاي وزگەردى. جەرگىلىكتى تۇرعىن ايمان بەكبەرگەنوۆا ءشوبى قۋراعان، جارىعى جوق ايماقتى اباتتاندىرۋ جونىندە باستاما كوتەردى. ونىڭ بۇل يدەياسىن كورشىلەرى قولداپ، سوڭىنان حقب جوباسى بويىنشا كوپ داۋىس جينالدى. سونىڭ ناتيجەسىندە جوبا قارجىلاندىرىلىپ، اۋدان اكىمدىگىمەن بىرلەسىپ ايماق اباتتاندىرىلىپ، حالىق دەمالاتىن قوعامدىق كەڭىستىككە اينالدى.
بۇگىندە تورايعىروۆ كوشەسى – اباتتاندىرىلعان قوعامدىق كەڭىستىك، ونىڭ جالپى الاڭى 4،2 گەكتاردان اسادى. مۇندا تاكتيلدى تاقتاسى بار كەڭ تروتۋارلار، ۆەلوجولدار، اعاش پەرگولالارى بار دەمالىس ايماقتارى، ۆوركاۋت جانە بالالار ويىن الاڭدارى پايدا بولدى. قوعامدىق كەڭىستىك ءقاۋىپسىز جانە جايلى. 200 جارىق شامى، 12 بەينەباقىلاۋ كامەراسى ورناتىلىپ، ىڭعايلى ورىندىقتار مەن قوقىس جاشىكتەرى قويىلعان. 500 اعاش پەن 1500-گە جۋىق بۇتا وتىرعىزىلعان. جاسىل جەلەك كوز تارتادى.
اۋدان تۇرعىندارى بۇل وزگەرىستەرگە ريزا. «مەن باسقا اۋداندا تۇرامىن، ءبىراق وسى ايماققا جاقىن جەردە جۇمىس ىستەيمىن. تۇسكى ۇزىلىستە وسىندا كەلىپ، سەرۋەندەيمىن. ماعان وتە ۇنايدى»، - دەدى الماتىلىق جانسايا امزە.
«بۇرىن جاڭبىر سۋى تروتۋاردان اسىپ، دۇكەنگە دەيىن اعاتىن ەدى. ايماقتا جوبا نەگىزىندە ءبىراز جۇمىستار جۇرگىزىلگەلى بەرى اينالا تانىماستاي وزگەردى. جاستار مۇندا فوتوسەسسيا ۇيىمداستىرادى، ءبىز ريزامىز»، - دەدى جەرگىلىكتى تۇرعىن، دۇكەن ساتۋشىسى جاننا جاقيانوۆا.
كەشكە قاراي الاڭعا كەلۋشىلەر كوپ بولادى، وتباسىلار بالالارىمەن كەلەدى، زەينەتكەرلەر ورىندىققا وتىرىپ دەمالادى، ال جاستار تازا اۋادا سەرۋەندەپ، جاتتىعۋ جاسايدى. جاڭا قوعامدىق كەڭىستىك كوپشىلىك جينالاتىن ورتاعا اينالدى»، - دەدى جەرگىلىكتى تۇرعىن گالينا جانگەلدينا.
قازىرگى كەزدە قوعامدىق كەڭىستىكتىڭ اينالاسى ابتتاندىرىلىپ جاتىر. 2025 جىلدىڭ سوڭىنا دەيىن مۇندا سپورت الاڭىن، ەكوايماق جانە گۇلدەر اللەياسىن اشۋ جوسپارلانىپ وتىر.
تورايعىروۆ كوشەسىنىڭ جاڭا كەيپى - قالا تۇرعىندارىنىڭ «حالىق قاتىساتىن بيۋدجەت» باعدارلاماسىنا بەلسەندى قاتىسۋىنىڭ ايقىن دالەلى. بۇل جوبا الماتىنى كوركەيتۋمەن قاتار، قالا تۇرعىندارىنىڭ شاھارعا دەگەن سۇيىسپەنشىلىگىن دە ارتتىرادى.