مەملەكەت باسشىسىنىڭ تەحنيكالىق جانە كاسىپتىك ءبىلىم ساپاسىن ارتتىرۋ جانە جاڭا فورماتتاعى زاماناۋي كادرلاردى دايارلاۋ جونىندەگى تاپسىرمالارىن جۇزەگە اسىرۋ ماقساتىندا الماتى كوپسالالى كوللەدجىنىڭ بازاسىندا «ۇشقىشسىز ۇشۋ اپپاراتتارى» قۇزىرەتتىلىك ورتالىعى ءوز جۇمىسىن باستادى، – دەپ حابارلايدى Aqshamnews.kz ق ر وقۋ-اعارتۋ مينيسترلىگىنىڭ باسپا ءسوز قىزمەتىنە سىلتەمە جاساپ.
قازاقستاندا قازىرگى ەڭبەك نارىعىنىڭ سۇرانىستارىنا ساي تەحنيكالىق باعىتتاعى ساپالى مامانداردى دايارلاۋعا ەرەكشە نازار اۋدارىلۋدا. جاڭا ورتالىقتىڭ اشىلۋى يننوۆاسيالىق تەحنولوگيالار مەن ينجەنەرلىك ءبىلىمنىڭ توعىسىندا جاڭا مۇمكىندىكتەر اشاتىن ماڭىزدى قادام بولىپ تابىلادى. الداعى ۋاقىتتا ورتالىقتا «ۇشقىشسىز ۇشۋ اپپاراتتارىن پايدالانۋ جانە باعدارلامالاۋ» جاڭا وقۋ باعدارلاماسى ەنگىزىلەدى. باعدارلاما ستۋدەنتتەرگە درونداردى جوبالاۋ، قۇراستىرۋ، باسقارۋ جانە تەحنيكالىق قىزمەت كورسەتۋ سالاسىندا كاسىبي قۇزىرەتتىلىكتەردى مەڭگەرۋگە مۇمكىندىك بەرەدى.
جوبا اياسىندا كوللەدجدىڭ الەۋمەتتىك سەرىكتەستەرى رەتىندە حالىقارالىق ءبىلىم بەرۋ جانە يننوۆاسيالار ورتالىعى مەن قىتايدىڭ Zhongke Borui Education Technology Research Institute ۇيىمدارى قولداۋ كورسەتۋدە.
«بۇل جوبا تەحنيكالىق جانە كاسىپتىك ءبىلىم بەرۋ جۇيەسىن زاماناۋي تالاپتارعا ساي دامىتۋعا باعىتتالعان جانە ەلدىڭ يننوۆاسيالىق الەۋەتىن ارتتىرۋعا ۇلەس قوساتىن ءبىلىم مەن يننوۆاسيا سالاسىنداعى حالىقارالىق ءتيىمدى ىنتىماقتاستىقتىڭ ايقىن ۇلگىسى. ۇشقىشسىز ۇشۋ اپپاراتتارى سالاسىنداعى ءبىلىم بەرۋ باعدارلامالارىن جەتىلدىرۋ ارقىلى قازاقستان باسەكەگە قابىلەتتى كادرلار دايارلاۋعا مۇمكىندىك الادى»، – دەيدى ق ر وقۋ-اعارتۋ مينيسترلىگىنىڭ تەحنيكالىق جانە كاسىپتىك ءبىلىم دەپارتامەنتىنىڭ ديرەكتورى اسەت مۇحانبەتوۆ.
قۇزىرەتتىلىك ورتالىعى يننوۆاسيالىق ءبىلىم بەرۋ تەحنولوگيالارىن ەنگىزۋ، ستۋدەنتتەردىڭ روبوتوتەحنيكا، اەروتۇسىرىلىم، 3D-كارتوگرافيا جانە ينفراقۇرىلىمدى مونيتورينگ سالاسىنداعى پراكتيكالىق داعدىلارىن دامىتۋ، سونداي-اق پەداگوگتەردى درونداردى وقىتۋ پروسەسىندە ءتيىمدى قولدانۋعا دايارلاۋ باعىتتارى بويىنشا جۇمىس جۇرگىزەدى. سونىمەن قاتار مۇندا حالىقارالىق ترەنينگتەر، شەبەرلىك ساباقتارى مەن ۇشقىشسىز ۇشۋ اپپاراتتارى بويىنشا جارىستار ۇيىمداستىرىلىپ، شەتەلدىك ءبىلىم بەرۋ جانە تەحنولوگيالىق ۇيىمدارمەن سەرىكتەستىك بايلانىستار كەڭەيتىلەدى.