وڭىرلىك كوممۋنيكاسيالار قىزمەتى مەن الماتىنىڭ ءبىلىم باسقارماسىنىڭ ۇيىمداستىرعان باسپا ءسوز تۋرىندا كوللەدج تۇلەكتەرىنىڭ ەڭبەك نارىعىنداعى سۇرانىسى، ولاردىڭ كاسىبي قالىپتاسۋىنا اسەر ەتەتىن نەگىزگى فاكتورلار مەن جۇمىسپەن قامتۋ ماسەلەلەرى قارالدى. ءىس-شارا مەملەكەت باسشىسى جاريالاعان جۇمىسشى ماماندىقتار جىلى اياسىندا ۇيىمداستىرىلدى.
الماتى تەلەكوممۋنيكاسيا جانە ماشينا جاساۋ كوللەدجى قالانىڭ ءبىلىم باسقارماسىنىڭ قولداۋىمەن «كوللەدج تۇلەكتەرىنىڭ ەڭبەك نارىعىنداعى سۇرانىسى» اتتى باسپا ءسوز تۋرىن ۇيىمداستىردى. ماقساتى – باسەكەگە قابىلەتتى جاس مامانداردى دايارلاۋعا اسەر ەتەر فاكتورلاردى انىقتاۋ.
باسپا ءسوز تۋرى اياسىندا جۋرناليستەر «الماتى ەلەكترومەحانيكا زاۋىتى» جشس-نە بارىپ، وندا كوللەدجدىڭ «ەلەكتر جابدىقتارى (تۇرلەرى بويىنشا)» ماماندىعى بويىنشا تۇلەكتەرى جۇمىس ىستەپ جاتقانىن ءوز كوزدەرىمەن كوردى. جاس ماماندار تەوريالىق ءبىلىمنىڭ ماڭىزى مەن الەۋمەتتىك سەرىكتەستەرمەن بىرلەسكەن تاجىريبەلىك داعدىلاردى مەڭگەرۋدىڭ ارتىقشىلىعىن اتاپ ءوتتى.
2024–2025 وقۋ جىلىندا كوللەدجدىڭ التى تۇلەگى جيناقتالعان ترانسفورماتورلىق قوسالقى ستانسيالاردىڭ سلەسار-جيناقتاۋشىسى رەتىندە زاۋىتقا جۇمىسقا قابىلداندى. ولاردىڭ بارلىعى لايىقتى جالاقىمەن، الەۋمەتتىك پاكەتپەن قامتاماسىز ەتىلگەن. 2025–2026 وقۋ جىلىندا 25 ستۋدەنت ءدۋالدى وقىتۋ فورماتى بويىنشا وندىرىستىك تاجىريبەدەن ءوتىپ جاتىر. بۇل – جۇمىس بەرۋشىلەردىڭ جاس كادرلارعا قىزىعۋشىلىعىنىڭ ارتقانىن، مامانداردى تاجىريبەمەن ۇشتاستىرىپ دايارلاۋدىڭ تيىمدىلىگىن كورسەتەدى.
«بۇل جىل جۇمىسشى ماماندىقتار جىلى دەپ جاريالانعان سوڭ، ءبىز الماتىلىق كوللەدجدەرمەن تىعىز ءارى بەلسەندى جۇمىس ىستەي باستادىق. سولاردىڭ ءبىرى – الماتى تەلەكوممۋنيكاسيا جانە ماشينا جاساۋ كوللەدجى. ءقازىر بىزدە وسى كوللەدجدىڭ 50-دەن استام ستۋدەنتى جۇمىس ىستەيدى. ولاردىڭ التاۋى رەسمي تۇردە جۇمىسقا قابىلدانىپ، ايىنا 500 مىڭ تەڭگەدەن استام جالاقى الىپ وتىر. جالپى ءبىز ستۋدەنتتەردى ءبىرىنشى كۋرستان باستاپ وندىرىستىك تاجىريبەگە قابىلدايمىز. ءدۋالدى وقىتۋ تۇرىندە 9 اي بويى تاجىريبەدەن وتەدى. ءبىز بۇل كوللەدجبەن 11 جىلدان بەرى ارىپتەسپىز. جىل سايىن بىزگە 30-40 ستۋدەنت كەلەدى. كوپشىلىگى بىزدە تۇراقتاپ، جۇمىسقا ورنالاسادى»، – دەدى «الماتى ەلەكترومەحانيكا زاۋىتىنىڭ» باسقارما ءتوراعاسى اسحات ەرگەشيەۆ.
سونىمەن قاتار، «ەلەكتر جابدىقتارى (تۇرلەرى بويىنشا)» ماماندىعى بويىنشا وقيتىن ستۋدەنتتەر «اكادەميالىق ۇتقىرلىق» جوباسى اياسىندا الماتى ەنەرگەتيكا جانە ەلەكتروندىق تەحنولوگيالار كوللەدجىندە وقۋ تاجىريبەسىنەن ءوتتى. بۇل تاجىريبە ولاردىڭ پراكتيكالىق دايىندىق دەڭگەيىن ەداۋىر ارتتىرىپ، زەرتحانالىق جابدىقتار مەن وزىق تەحنولوگيالاردى پايدالانۋعا مۇمكىندىك بەردى.
ءىس-شارا ءبىلىم مەن ءوندىرىستىڭ ءتيىمدى كىرىگۋىنە مىسال بولىپ، جاس مامانداردى كاسىبي جولىندا قولداۋدىڭ ماڭىزدىلىعىن تاعى ءبىر مارتە كورسەتتى.