قازاقستاندا اسكەري قىزمەتكەرلەردىڭ ازىق-تۇلىك پايكاسىنىڭ قۇنى قايتا قارالادى
بۇل تۋرالى پرەمەر-مينيستر ولجاس بەكتەنوۆ دەپۋتاتتىق ساۋالعا بەرگەن رەسمي جاۋابىندا مالىمدەدى، دەپ حابارلايدى aqshamnews.kz.
ونىڭ ايتۋىنشا، قازىرگى تاڭدا بۇل ماسەلە قورعانىس مينيسترلىگى جانىنان قۇرىلعان ارنايى جۇمىس توبىنىڭ قاراۋىندا تۇر. توپ قۇرامىنا قارجى مينيسترلىگى، ىشكى ىستەر مينيسترلىگى، توتەنشە جاعدايلار مينيسترلىگى، ۇلتتىق قاۋىپسىزدىك كوميتەتى، مەملەكەتتىك كۇزەت قىزمەتى جانە "اتامەكەن" ۇلتتىق كاسىپكەرلەر پالاتاسىنىڭ وكىلدەرى ەنگەن.
جۇمىس توبى 2023–2024 جىلدارداعى ستاتيستيكالىق مالىمەتتەردى ەسكەرە وتىرىپ، ازىق-تۇلىك پايكاسىنىڭ قازىرگى قۇنىن قايتا ەسەپتەپ جاتىر. سونىمەن قاتار، پايكانى ەسەپتەۋ ادىستەمەسىن جەتىلدىرۋ بويىنشا ءبىرىڭعاي ۇستانىمداردى ازىرلەۋ دە كۇن تارتىبىندە تۇر. «ونىڭ ىشىندە اسكەردىڭ ءوز-وزىن ازىق-تۇلىكپەن قامتاماسىز ەتۋگە كوشۋ مۇمكىندىگى دە قاراستىرىلىپ جاتىر»، – دەلىنگەن پرەمەر-مينيستردىڭ جاۋابىندا.
بۇدان بولەك، ازىق-تۇلىك قۇنىنىڭ ينفلياسيا مەن نارىقتاعى باعا وزگەرىستەرىنە سايكەستىگىن قامتاماسىز ەتۋ ماقساتىندا تۇراقتى تۇردە تۇزەتىپ وتىرۋ تەتىگى ەنگىزىلۋى مۇمكىن. بۇل رەتتە، ازىق-تۇلىك ساپاسى مەن جەتكىزىلۋ بارىسىن قوعامدىق ۇيىمداردىڭ تاراپىنان باقىلاۋ تەتىكتەرى دە قاراستىرىلىپ جاتقانى اتاپ ءوتىلدى.
ايتا كەتەيىك، بۇعان دەيىن ءبىر ساربازدى تاۋلىگىنە تاماقتاندىرۋعا 2 225 تەڭگە بولىنەتىنى حابارلانعان بولاتىن. بۇل كورسەتكىش قازىرگى ەكونوميكالىق جاعداي مەن نارىقتاعى باعا ءوسىمى اياسىندا قايتا قارالۋى اسكەردىڭ الەۋمەتتىك جاعدايىن جاقسارتۋعا باعىتتالعان ماڭىزدى قادام بولماق.