ىشكى ىستەر مينيسترلىگى جاريالاعان پروفيلاكتيكا جىلى اياسىندا الماتى قالاسىنىڭ اۋماعىندا “ءقاۋىپسىز جول” جەدەل-پروفيلاكتيكالىق ءىس-شاراسى جالعاسۋدا.
شارانىڭ باستى ماقساتى – جول قوزعالىسىنا قاتىسۋشىلاردىڭ ءتارتىپ دەڭگەيىن ارتتىرۋ، ازاماتتاردىڭ ءومىرى مەن دەنساۋلىعىنا ناقتى ءقاۋىپ توندىرەتىن ورەسكەل قۇقىق بۇزۋشىلىقتاردىڭ الدىن الۋ جانە جولىن كەسۋ. پروفيلاكتيكالىق جۇمىس زاڭدىلىق، اشىقتىق جانە ادام ءومىرىنىڭ باسىمدىعى قاعيداتتارىنا نەگىزدەلەدى، دەپ حابارلايدى aqshamnews.kz Polisia.kz-كە سىلتەمە جاساپ.
ءىس-شارا باستالعالى بەرى الماتى قالاسىندا جول قوزعالىسى سالاسىندا 52 مىڭنان استام قۇقىق بۇزۋشىلىق انىقتالدى.
ءجيى كەزدەسەتىن قۇقىق بۇزۋشىلىقتار قاتارىندا:
• مانيەۆر جاساۋ ەرەجەلەرىن بۇزۋدىڭ 3 مىڭنان استام دەرەگى؛
• قاراما-قارسى باعىتقا شىعۋدىڭ 222 جاعدايى؛
• باعدارشامنىڭ تىيىم سالاتىن بەلگىسىنەن ءوتىپ كەتۋدىڭ 453 دەرەگى؛
• 439 جۇرگىزۋشى كولىكتى ماس كۇيدە باسقارعانى ءۇشىن ۇستالدى؛
• جۇرگىزۋشى كۋالىگىنسىز كولىكتى باسقارعان 2 مىڭ 162 جۇرگىزۋشى؛
• 2775 كولىك ايىپپۇل تۇراعىنا قويىلدى، ونىڭ ىشىندە 935 موپەد بار.
الماتى قالاسىنىڭ جەرگىلىكتى پوليسيا قىزمەتى ازاماتتاردى جول قوزعالىسى ەرەجەلەرىن قاتاڭ ساقتاۋعا شاقىرادى.
— جولداعى ءاربىر قۇقىق بۇزۋشىلىق — بۇل الەۋەتتى قايعىلى جاعداي. ءبىزدىڭ شارالارىمىز تەك قۇقىق بۇزۋشىلاردى انىقتاۋعا ەمەس، سونىمەن قاتار جول-كولىك وقيعالارىنىڭ الدىن الۋعا باعىتتالعان. جول قوزعالىسى ەرەجەلەرى – بۇل جاي عانا فورمالدىلىق ەمەس، ءسىزدىڭ جانە اينالاڭىزداعى ادامداردىڭ قاۋىپسىزدىگىنىڭ ناقتى كەپىلى. بارشا جول قوزعالىسىنا قاتىسۋشىلاردى زاڭدى ساقتاۋعا جانە جولدا بىر-بىرىنە قۇرمەتپەن قاراۋعا شاقىرامىن، — دەدى الماتى قالاسى پد جەرگىلىكتى پوليسيا قىزمەتى باسقارماسىنىڭ باستىعى سەرىك شۋمايەۆ.