الماتى جاستارى قالالىق چەمپيوناتقا قاتىسىپ، اقشالاي سىيلىق ۇتىپ الدى

جۇلدە قورى 4 150 000 تەڭگەنى قۇراعان چەمپيونات

الماتىدا ۇستەل تەننيسى ورتالىعىندا Alma CUP قالالىق چەمپيوناتىنىڭ جەڭىمپازدارىن ماراپاتتاۋ ءراسىمى ءوتتى، دەپ حابارلايدى Almaty-akshamy.kz Zakon.kz-كە سىلتەمە جاساپ.

جوبانىڭ ماقساتى – جاستار اراسىندا سالاۋاتتى ءومىر سالتىن ناسيحاتتاۋ،  حالىق اراسىندا بۇقارالىق سپورتقا قاتىسۋشىلار سانىن ارتتىرۋ، سپورت سالاسىنىڭ ۇزدىك جاستارىن انىقتاۋ. 

8 جەلتوقساندا باستالعان چەمپيوناتتا الماتى قالاسىنىڭ 1000-نان استام ءتۇرلى ساناتتاعى جاستارى فۋتبول، باسكەتبول، ۆولەيبول، كيبەرسپورت ويىندارى بويىنشا سايىسقا تۇسكەن بولاتىن. جۇلدە قورى 4 150 000 تەڭگەنى قۇراعان چەمپيوناتتا جەڭىمپازدار ارنايى كۋبوكتارمەن جانە مەدالدارمەن ماراپاتتالدى. شارانى الماتى جاستار ساياساتى باسقارماسىنىڭ قولداۋىمەن، «الماتى ستۋدەنتتەر اليانسى» كق ۇيىمداستىردى. 

"ALMA CUP قالالىق چەمپيوناتىن ۇيىمداستىرۋ بارىسىندا قالانىڭ ءتۇرلى ساناتىنداعى جاستارىن قامتۋعا تىرىستىق. سايكەسىنشە، چەمپيوناتقا جوو، كوللەدج ستۋدەنتتەرى، بازار جاستارى، قۇرىلىس، تەكستيل، كۋرەرلىك قىزمەت سالاسىنىڭ ماماندارى دا قاتىستى. چەمپيوناتقا جاستاردىڭ قىزىعۋشىلىعى وتە جوعارى بولدى. بۇل قالامىزداعى سپورتسۇيەر جاستاردىڭ كوپتىگىن كورسەتەدى"، - دەدى جوبا ۇيىمداستىرۋشىسى جاسۇلان بوستاندىق ۇلى.