الماتىدا حالىقارالىق جاستار كۇنىنە ارنالعان اۋقىمدى ALMA LOVE جاستار فەستيۆالى جالعاسىپ جاتىر. جوبا الماتى قالاسى جاستار ساياساتى باسقارماسىنىڭ، قالا اكىمدىگىنىڭ جوبالىق كەڭسەسىنىڭ قولداۋىمەن جۇزەگە اسىرىلىپ، مەگاپوليستىڭ بارلىق اۋدانىن قامتىدى.
فەستيۆال اياسىنداعى ەڭ جارقىن وقيعالاردىڭ ءبىرى – ECO VIBE ەكو-چەللەندجى مەن JasVibe ءموبيلدى جوباسى بولدى. ءىس-شارا جاستاردىڭ ەكولوگيالىق مادەنيەتىن دامىتۋعا، ولاردىڭ بەلسەندىلىگىن ارتتىرۋعا جانە قالادا جاعىمدى اتموسفەرا قالىپتاستىرۋعا باعىتتالعان.
ECO VIBE چەللەندجى اياسىندا 300-دەن استام جاس ەرىكتى الماتىنىڭ 100-گە جۋىق اۋلاسى مەن سكۆەرلەرىن تازالاۋعا شىقتى. بۇل ەكولوگيالىق ناۋقان قالا جاستارىنىڭ باسىن قوسىپ، الماتىنى تازا ءارى جايلى ەتۋگە دەگەن ورتاق ۇمتىلىسىن كورسەتتى. قالا كوشەلەرىمەن ەكو-ديزاينمەن بەزەندىرىلگەن كولىك ءجۇرىپ ءوتتى. ونىڭ ىشىندە انيماتورلار، بلوگەرلەر مەن بەلسەندىلەر بولدى. ولاردىڭ قاتارىندا تانىمال ەكو-امباسسادور دۋلات نابييەۆ تە بار. كوماندا ينتەراكتيۆتى فورماتتا تۇرعىنداردى سەنبىلىككە اتسالىسۋعا شاقىرىپ، ونى مەرەكەلىك ءىس-شاراعا اينالدىردى.
تۇستەن كەيىن الماتى قالاسى قوعامدىق كەڭەسىنىڭ مۇشەسى، ەكولوگ ەۆگەنيي مۇحامەدجانوۆتىڭ باستاماسىمەن ەكو-فەستيۆال ءوتتى. قاتىسۋشىلار ءۇشىن ۆيكتورينالار، شەبەرلىك دارىستەرى، ينتەراكتيۆتى الاڭدار جانە ەكولوگيا مەن تۇراقتى دامۋعا قاتىستى ەركىن پىكىر الماسۋ ۇيىمداستىرىلدى.
الماتى قالاسى جاستار ساياساتى باسقارماسىنىڭ باسشىسى ازيز قاجدەنبەك بۇل جوبانىڭ نەگىزگى ماقساتى قالانى كوركەيتۋ جولىندا جاستاردى ناقتى ىستەرگە جۇمىلدىرۋ ەكەنىن اتاپ ءوتتى. ونىڭ ايتۋىنشا، ECO VIBE جاي عانا اكسيا ەمەس، تازا الماتى ءۇشىن قوزعالىسقا اينالدى.
سونىمەن قاتار قالادا JasVibe جوباسى دا ىسكە اسىرىلىپ جاتىر. اپتا بويى ارنايى برەندتەلگەن كولىك پەن Jas Almaty ماسكوتى ساياباقتار مەن سكۆەرلەردى، قالا كوشەلەرىن ارالاپ، تۇرعىندارعا مەرەكەلىك كوڭىل-كۇي سىيلايدى. ەرىكتىلەر الماتىلىقتاردى جاستار كۇنىمەن قۇتتىقتاپ، جالاۋشالار، بىلەزىكتەر، ەكوسومكەلەر تاراتىپ، Alma Love فەستيۆالىنىڭ فينالدىق كونسەرتىنە ارنالعان سۋپەرفان-ايماققا بيلەت ۇتىسىن ۇيىمداستىرىپ جاتىر.
جاستار مۇنداي باستامالاردى قولداۋدى سوزبەن ەمەس، ناقتى ىسپەن دالەلدەپ ءجۇر. جوبا ەرىكتىسى ەلدار بايعابىلوۆ وي ءبولىستى. ونىڭ ايتۋىنشا، باستامانىڭ نەگىزگى ماقساتى قالاعا قۋانىش سىيلاۋ، تۇرعىنداردى شاھاردىڭ قوعامدىق ومىرىنە تارتۋ جانە جاستاردىڭ ەنەرگيا، يگى ىستەر مەن اشىق كوزقاراستىڭ يەسى ەكەنىن كورسەتۋ.
ايتا كەتەيىك، الماتىدا 3 تامىزدان باستاپ حالىقارالىق جاستار كۇنىن مەرەكەلەۋ ونكۇندىگى باستالعان بولاتىن. ALMA LOVE فەستيۆالى 12 تامىزعا دەيىن جالعاسادى. باعدارلامادا ەكواكسيالار، سپورتتىق تۋرنيرلەرى، كۆەستتەر، كورمەلەر، Open Mic كونسەرتتەرى، بي باتلدارى جانە بەلسەندى جاستاردى ماراپاتتاۋ راسىمدەرى بار. فەستيۆالدىڭ شارىقتاۋ شەگى 12 تامىز كۇنى بالۋان شولاق اتىنداعى سپورت كەشەنىندە وتەتىن، قازاقستاندىق ەسترادا جۇلدىزدارىنىڭ قاتىسۋىمەن بولاتىن مەرەكەلىك كونسەرت بولماق. كىرۋ – تەگىن