«الماتى جاستارى» باعدارلاماسى بويىنشا مۇعالىمدەر مەن دارىگەرلەرگە ارنايى كۆوتا ەنگىزىلەدى

«الماتى جاستارى» مۇعالىمدەر مەن دارىگەرلەرگە ارنايى كۆوتانى ەنگىزەدى

جاس مۇعالىمدەر مەن دارىگەرلەر ءۇشىن «الماتى جاستارى» يپوتەكالىق باعدارلاماسى بويىنشا ارنايى كۆوتا ەنگىزىلەدى. بۇل تۋرالى الماتى پەداگوگتەرىنىڭ تامىز فورۋمىندا قالا اكىمى ەربولات دوسايەۆ مالىمدەدى، دەپ حابارلايدى Almaty-akshamy.kz.

فورۋمدا مۇعالىمدەردى قولداۋ جانە پەداگوگ مارتەبەسىن ارتتىرۋعا ارنالعان ءىس-شارالار مەن مۇمكىندىكتەر دە ايتىلدى.

«بىزدە «الماتى جاستارى» قالالىق باعدارلاماسى بار. جىل سايىن 1000 ادامنىڭ تۇرعىن ءۇي ساتىپ الۋ ءۇشىن ارنايى قارجىلىق جاعداي جاسايمىز. باعدارلاما كەڭ تانىلعان، بۇعان جىل سايىن كوپتەگەن ۇمىتكەر قاتىسادى. سول سەبەپتى مەن ارىپتەستەرىممەن اقىلداسىپ، كەلەسى جىلدان باستاپ جاس مۇعالىمدەر مەن دارىگەرلەر ءۇشىن ارنايى كۆوتا ەنگىزەتىنىمىزدى مالىمدەيمىن. 1000 ادامعا تاعى 100 كۆوتا قوسىلادى: 50ء-ى جاس مۇعالىمدەرگە، 50ء-ى جاس دارىگەرلەرگە»، - دەدى قالا اكىمى. 

بۇعان قوسا، اكىم قارجىلىق مۇمكىندىك بولعان كەزدە، ماماندىق پەن جاس مۇعالىمدەردىڭ دامۋى ءۇشىن قوسىمشا ءىس-شارالار قابىلداۋعا جانە باعدارلامانى كەڭەيتۋگە ۋادە بەردى.