لاۋازىمدى تۇلعالارعا 3 ايىپپۇل سالىندى.
مەديسينالىق قالدىقتارعا قويىلاتىن سانيتارلىق-ەپيدەميولوگيالىق تالاپتاردى بۇزعانى ءۇشىن الماتى جانە جەتىسۋ وبلىستارىنىڭ دەنساۋلىق ساقتاۋ وبەكتىلەرىنە 14 ملن تەڭگەگە ايىپپۇل سالىندى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«الماتى وبلىسىنىڭ سانيتارلىق قىزمەتى دەنساۋلىق ساقتاۋ وبەكتىلەرىندە قالدىقتاردى جيناۋعا، زالالسىزداندىرۋعا جانە ساقتاۋعا قويىلاتىن سانيتارلىق-ەپيدەميولوگيالىق تالاپتاردىڭ بۇزىلۋىنا بايلانىستى جالپى سوماسى 14 ملن تەڭگەگە 74 ايىپپۇل سالدى. ونىڭ ىشىندە مەديسينالىق قالدىقتاردى جيناۋ، ساقتاۋ جانە ەسەپكە الۋ مەرزىمدەرى بويىنشا زاڭ بۇزعان جەكە تۇلعالارعا 69 ايىپپۇل، لاۋازىمدى تۇلعالارعا 3 ايىپپۇل جانە مەديسينالىق قالدىقتاردى ۋاقىتشا ساقتاۋ ءۇي-جايىن جاراقتاندىرۋ جانە جابدىقتاۋ جونىندەگى نورمالاردى ساقتاماعانى ءۇشىن زاڭدى تۇلعالارعا 2 ايىپپۇل سالىندى»،- دەلىنگەن الماتى وبلىستىق سانيتاريالىق-ەپيدەميولوگيالىق باقىلاۋ دەپارتامەنتى باسپا ءسوز قىزمەتىنىڭ حابارلاماسىندا.
ۆەدومستۆونىڭ اقپاراتىنا سايكەس، مەديسينالىق قالدىقتاردى جيناۋعا، زالالسىزداندىرۋعا جانە ساقتاۋعا قويىلاتىن سانيتارلىق تالاپتاردىڭ ساقتالۋى وبلىستىق سەبد تۇراقتى نازارىندا.
بۇگىنگى تاڭدا دەپارتامەنتىنىڭ باقىلاۋىندا 1793 مەديسينالىق ۇيىم بار.
مەديسينالىق ۇيىمداردىڭ ءاربىر قۇرىلىمدىق بولىمشەسىندە مەديسينالىق قالدىقتارمەن جۇمىس ىستەۋ سحەماسى ازىرلەنىپ، مەديسينالىق قالدىقتاردى جيناۋ جانە ۋاقىتشا ساقتاۋ ءۇشىن جاۋاپتى تۇلعالار بەكىتىلگەن.
مەديسينالىق قالدىقتار ارنايى ءبىر رەت قولدانىلاتىن پوليەتيلەن پاكەتتەرگە جانە قاقپاعى تىعىز جابىلاتىن ىدىستارعا جينالادى. ولار مەديسينالىق قالدىقتاردىڭ كلاسىنا بايلانىستى بەلگىلەنەدى.
بەكىتىلگەن كەستەگە سايكەس مامانداندىرىلعان ۇيىمدارمەن جاسالعان كەلىسىمشارت نەگىزىندە شىعارىلىپ، جويىلادى.
بۇل مەكەمەلەردە قالدىقتاردى دۇرىس جويۋعا ارنالعان پەشتەر مەن جابدىقتار بار.
دەپارتامەنتتىڭ اۋماقتىق باسقارمالارىنىڭ باقىلاۋىندا مەديسينالىق قالدىقتاردى جويۋمەن اينالىساتىن 14 ۇيىم بار.
ونىڭ بىرەۋى وڭدەۋ قۋاتى ساعاتىنا 120 كيلوگرامنان استام بولعاندىقتان، ەپيدەميالىق ماڭىزى جوعارى، قالعان 13ء-ى ەپيدەميالىق ماڭىزى بولماشى وبەكتىلەر سانالادى.
جىل باسىنان بەرى مەديسينالىق قالدىقتاردىڭ «ا» سىنىبىنىڭ قالدىقتارى – 5721، 906 توننا، «ب» سىنىبىنداعى ەپيدەميولوگيالىق ءقاۋىپتى قالدىقتار – 18620،075 توننا، «ۆ» سىنىبىنىڭ ەپيدەميولوگيالىق اسا ءقاۋىپتى قالدىقتار – 3360،991 توننا، «گ» سىنىبىنداعى توكسيكولوگيالىق مەديسينالىق قالدىقتاردان – 3616 دانا شىعارىلدى.
ولار - باكتەريسيدتىك، ليۋمينەسەنتتى، قۇرامىندا سىناپ بار، جارىق ديودتى شامدار، تەرمومەترلەر، گيگرومەترلەر جانە رەنتگەن پلەنكالارى.