الماتى ىرگەسىندەگى اۋىلداردىڭ تۇرعىندارى گاز قىسىمىنىڭ ازدىعىنا الاڭداۋلى. بۇل تۋرالى Almaty-akshamy.kz Inbusiness.kz-كە سىلتەمە جاساپ حابارلايدى.
قىس تۇسپەي، كوگىلدىر وتىننىڭ قارقىنى بولماسا، قاقاعان ايازدا قايتپەكپىز دەيدى اۋىل تۇرعىندارى. سولتۇستىكتەگى جاعداي قايتالانباي ما دەگەن ءقاۋىپ تە بار.
بۇل الماتىنىڭ ىرگەسىندە جامبىل اۋدانىنا قاراستى مىڭبايەۆ اۋىلى. ەلدى-مەكەندە سوڭعى جىلدارى جاڭا ۇيلەر جارىسا سالىنىپ، حالىقتىڭ سانى كۇن ساناپ وسۋدە. سوندىقتان، ءار تۇرعىن ءۇشىن گاز ماسەلەسى وزەكتى. الايدا، قاراشانىڭ سوڭىنداعى سارىشۇناق ايازدا گازدىڭ قارقىنى ءتۇسىپ، 100 شاقتى ءۇي 2 تاۋلىك بويى سالقىن ۇيدە وتىرۋعا ءماجبۇر بولعان. كوگىلدىر وتىننىڭ سىعىرايعان كوزىنە قاراپ قالدىق دەيدى اۋىلداستار.
"29 كۇنى گازدىڭ داۆلەنيەسى از بولدى. گاز سىعىرايىپ، ۇيدە تەمپەراتۋرا تومەن بولدى. مىنا كورشىلەردە جوق بوپتى. مەندە بولدى. ول راس. ءبىراق از بولدى. ءۇي سالقىندادى. توڭدىق"، دەيدى سۇلتانباي مىڭبايەۆ اۋىلىنىڭ تۇرعىنى بەيبىت.
ءوڭىردىڭ گاز ماسەلەسىنە جاۋاپتى مەكەمەسىنەن جاعدايعا قاتىستى پىكىر بەرۋىن سۇرادىق. ايتۋلارىنشا، گاز قۇبىرلارىندا جينالاتىن كوندەنساتتىڭ كەسىرىنەن كەيبىر جەرلەر بىتەلىپ، كوگىلدىر وتىننىڭ جىلجۋ جىلدامدىعى باسەڭدەگەن. اۋىلداعى بىرنەشە كوشەدەگى جىلۋدىڭ ازايۋىن جاۋاپتىلار وسىلاي ءتۇسىندىردى.
"گازدىڭ ترۋباسىندا كوندەنسات جينالعان، سومەن گاز ءوتۋى قيىن بولعان. سومەن گاز ترۋبالارىن تۇگەل اشىپ، پرودۋۆات ەتكىزىپ، رەمونت جۇمىستارىن جاسادىق. ءقازىر اۋىل تىنىشتالدى"، دەيدى "تاۋەكەل-گاز قۇبىرى" ج ش س ديرەكتورى قازبەك عابيدەن.
ءقازىر ەلدى-مەكەندەرگە كوگىلدىر وتىن تولىعىمەن بەرىلگەن. دەسە دە، بۇل الماتىنىڭ ىرگەسىندە گاز ماسەلەسى تۋىنداعان جالعىز اۋىل ەمەس. كەشە پانفيلوۆ، گۇلدالا جانە تۇزدىباستاۋ اۋىلدارىندا كوگىلدىر وتىن ءبىر مەزەتتە ءوشىپ، مىڭداعان ءۇي گازسىز قالعان. كەيىن بەلگىلى بولعانداي، بۇعان شىرىگەن اعاشتىڭ قۇلاۋى سەبەپ بولىپتى. وڭىردەگى گازعا قاتىستى پروبلەمانىڭ جيىلەۋى تۇرعىنداردى "سولتۇستىكتەگى جاعدايدىڭ قايتالانۋى مۇمكىن بە" دەپ الاڭداتىپ وتىر. ال، جاۋاپتى مەكەمە بارلىق قۇبىر تەكسەرىلىپ، پىسىقتالعانىن ايتىپ، گازدىڭ بەرىلۋى ەندى توقتامايدى دەپ سەندىردى.
ايتا كەتەيىك، الماتىنىڭ ىرگەسىندەگى 1 ملن ادام گاز تۇتىنادى. تاعى 30 شاقتى ەلدى-مەكەنگە گاز تارتۋ بويىنشا كەلىسسوزدەر ءجۇرىپ جاتىر.