ەلىمىزدەگى 45 يپپودرومنىڭ ىشىندەگى ەڭ ۇلكەنى الماتى يپپودرومى.
تاۋەلسىزدىك العالى بەرى يپپودروم جەكەمەنشىكتە، دەپ حابارلايدى Almaty-akshamy.kz
"30 جىل بۇرىن تاۋەلسىزدىك العان جىلدارى ءبىزدىڭ مەملەكەت ات سپورتىنان باس تارتتى، سونداي-اق يپپودرومداردى دا قاراۋسىز قالدىردى. جىلقىنى ازىق-تۇلىك رەتىندە قارجىلاندىرۋدى قولعا الدى. سول سەبەپتى جەكەمەنشىكتىڭ قولىنا بەردى. تاۋەلسىزدىك العالى بەرى يپپودروم جەكەمەنشىكتە. كەيىننەن الماتى اكىمدىگى ساتىپ الامىز دەدى، سوسىن المايتىن بولدى. بىرەسە الامىز، بىرەسە المايمىز دەپ بىرنەشە رەت ويلاندى. يپپودرومنىڭ جاعدايى جاقسى دەپ ايتا المايمىن. ويتكەنى كۇردەلى جوندەۋ كەرەك. بىزگە ول ءۇشىن بيزنەس-الگاريتم كەرەك. يپپودرومدى جوندەۋ ءۇشىن بيزنەستى جاقسارتۋ كەرەك. وكىنىشكە قاراي بىزدە ونداي اقشا تاباتىن مۇمكىندىك جوق. ءبىز تەك ات قورالاردى جالعا بەرىپ، سونىڭ اقشاسىنا يپپودرومدى ۇستاپ تۇرمىز"، - دەيدى الماتى يپپودرومى باسشىسىنىڭ مىندەتىن اتقارۋشى يۋريي كيششەنكو.
ماماندار "يپپودروم قوراسىن قالتالىلار عانا جالعا الادى" دەگەن اڭگىمە قاۋەسەت دەيدى.
"بايگە اتتارىن باعۋ وڭاي شارۋا ەمەس. ونىڭ جەم-شوبى، كۇتىمى بار. قوراسى تازا، سپورتتىق قۇرال-جابدىعى تۇگەل بولۋى كەرەك، بۇنىمەن قوسا قانشاما مامان جۇمىس ىستەيدى. ماسەلە بايلاردىڭ اتتارىندا ەمەس، ماسەلە قانداي دا بولسىن كىرىس كوزىنە يپپودرومدى ۇستاپ تۇرۋ"، - دەيدى يپپودروم باسشىلىعى.
ال "بايگە فەدەراسياسىننىڭ" مۇشەلەرى يپپودروم قولدان-قولعا ءوتىپ، تويداعى شاپاننىڭ كەبىن كيىپ جاتىر دەيدى.
"الماتى يپپودرومىندا 1930 جىلى سالىنعان قورالار بار. بايگە وتكەندە وتىراتىن ورىن جوق. كەزىندە ساتىپ العان جەكەمەنشىك ازامات بۇل يپپودرومدى ءسۇرىپ تاستاپ، ورنىنا تۇرعىن ءۇي سالۋ ءۇشىن العان. ءبىراق اتبەگىلەر قارسى بولىپ، سول كۇيى قالىپ قويدى. ءبىزدىڭ ارمانىمىز وسى الماتى يپپودرومىن جەرگىلىكتى اكىمدىك ساتىپ السا دەيمىز. شىمكەنتتە الەمدىك ستاندارتتاعى يپپودروم سالىنعان دەپ ايتىپ ءجۇر. بۇل وتىرىك. الماتى يپپودرومى 300 اتقا ارنالسا، شىمكەنت يپپودرومى 80 اتقا عانا ارنالعان. ول جەردە 20 اتقا عانا قورا بار. بايگەگە كەمىندە 80 ات قاتىسادى. سوندا الىستان كەلگەن اتتار تۇراتىن قورا جوق. الىستان بارعان اتتار قورا ىزدەپ بوسىپ كەتەدى. ول قورالاردىڭ ءوزىن قالتالىلار الىپ العان"، - دەيدى "بايگە فەدەراسياسى" رەسپۋبليكالىق قوعامدىق بىرلەستىگىنىڭ ۆيسە-پرەزيدەنتى جومارت سايبولاتوۆ.