وڭىرلىك كوممۋنيكاسيالار قىزمەتىنىڭ الاڭىندا قالانىڭ ينجەنەرلىك ينفراقۇرىلىمىن جاڭعىرتۋ بويىنشا جۇرگىزىلىپ جاتقان جۇمىستارعا ارنالعان باسپا ءسوز كونفەرەنسياسى بولىپ ءوتتى. الماتىنىڭ ەنەرگەتيكا جانە سۋمەن جابدىقتاۋ باسقارماسىنىڭ باسشىسى نۇرباقىت سەرىكباي سۋمەن جابدىقتاۋ، جىلۋمەن قامتۋ، ەلەكترمەن جابدىقتاۋ، گازداندىرۋ مەن كوشە جارىعىنا قاتىستى قولعا الىنعان نەگىزگى جوبالار جايلى ايتىپ بەردى.
الماتى سۋدى التى جەر مەن جەراستى سۋ ۇڭعىسىنان الادى. قۋاتتىلىعى 1،3 ملن م³ بولعانىمەن، قالا ءبىر تاۋلىكتە 700 مىڭ م³ سۋ تۇتىنادى. 2024 جىلى سوعان بايلانىستى 294،3 شاقىرىمدىق جاڭا سۋ قۇبىرى تارتىلىپ، 51،5 شاقىرىم ەسكى جەلى جاڭعىرتىلعان. وسىلايشا قۇبىردىڭ توزۋ دەڭگەيى 53،8%-دان 52،8%-عا دەيىن باسەڭدەپ، ورتالىقتانعان سۋمەن قامتۋ دا 99،6%-عا جەتتى.
2025 جىلدىڭ سوڭىنا دەيىن تاعى 260 شاقىرىم سۋ جەلىسىن سالۋ جوسپارلانىپ وتىر، بۇل قامتۋدى 99،9%-عا دەيىن ارتتىرىپ، توزۋدى 52،2%-عا دەيىن ازايتپاق. سونىمەن قاتار، تاۋلىگىنە 90 مىڭ م³ قۋاتتىلىققا يە «اقساي»، «ەرمەنساي» سۋ ۇڭعىمالارىنىڭ قۇرىلىسى ءجۇرىپ، «بارلىق» جوبالانىپ جاتىر.
2025 جىلدىڭ سوڭىنا دەيىن 87 شاقىرىم كارىز جەلىسىن قايتا جاڭعىرتىپ، سالۋدى جوسپارلاپ وتىر. بۇل جەلىنىڭ توزۋىن 51،2%-عا دەيىن تومەندەتۋگە مۇمكىندىك بەرمەك. سونداي-اق، ناۋرىزباي اۋدانىن تولىق قامتۋدى كوزدەيتىن باتىس كارىز كوللەكتورىنىڭ (34،9 كم) قۇرىلىسى جالعاسىپ جاتىر.
1 399،9 شاقىرىم جىلۋ جەلىسىنىڭ 56،1%-ى توزعان. بيىل 61 نىساندا 39 شاقىرىم جىلۋ جەلىسى قايتا جاڭعىرتىلادى، سونىڭ 24 شاقىرىمىندا جۇمىس ءبىتتى. سونىڭ ارقاسىندا جەلىنىڭ توزۋ دەڭگەيى 54،3%-عا دەيىن تومەندەمەك.
سونىمەن قاتار، 17 قازاندىقتى دا جاڭعىرتۋ جۇمىستارى قولعا الىندى، بۇل ولاردىڭ توزۋىن 65،1%-دان 62،1%-عا دەيىن ازايتادى.
- قالادا 8،9 مىڭ شاقىرىم ەلەكتر جەلىسى بار، ونىڭ 64،5%-ى جاڭارتۋدى قاجەت ەتىپ تۇر. 2025 جىلى 123 شاقىرىم جەلى جاڭعىرتىلادى. جاڭا شاعىن اۋداندار (كەڭساي، «كەڭ جىرا»، «يتپ» اەا جانە ت.ب.) ەلەكترمەن قامتىلىپ جاتىر.
- قالاداعى گاز جەلىسىنىڭ ۇزىندىعى – 6،3 مىڭ شاقىرىم، ونىڭ دا 36% توزعان. بيىل 31،7 شاقىرىم جەلى جاڭعىرتىلىپ، ونىڭ 21،1 شاقىرىمى (67%) جاسالىپ ءبىتىپتى. ءسويتىپ، جەكە سەكتوردىڭ 99،4% گازبەن قامتىلعان.
وكق سپيكەرى شاھارداعى سىرتقى جارىقتاندىرۋ جۇمىسى تۋرالى دا ايتىپ ءوتتى. الماتىدا ءقازىر شامامەن 200 مىڭ جارىق نۇكتەسى بار ەكەن. 2024 جىلى 40 مىڭنان استام شام اۋىستىرىلىپ، 300 شاقىرىم جەلى قالپىنا كەلتىرىلگەن. بيىل دا ول جۇمىستى جالعاستىرىپ جاتىر:
• 15 مىڭنان استام شام مەن 5،6 مىڭ تورشەر ورناتىلادى،
• جارىقسىز قالعان 1 189 جەرگە جەلى تارتىلادى،
• 70 نىسانعا ارحيتەكتۋرالىق جارىق بەرۋ جۇرگىزىلەدى.
سونىمەن قاتار، 1 100 باسقارۋ شكافى اۋىستىرىلىپ، 70 شاقىرىم جەلى جاڭعىرتىلىپ، سونىڭ ارقاسىندا 100%-عا جارىقپەن (قازىرگىسى – 90%) قامتىلادى.
«جۇمىستى جۇيەلى تۇردە كەزەڭ-كەزەڭىمەن، مەملەكەت باسشىسى نۇسقاعان باسىمدىقتى ەسكەرە وتىرىپ جۇرگىزىپ جاتىرمىز»، – دەدى نۇرباقىت سەرىكباي.