شىمكەنتتە قالا اكىمىنىڭ ورىنباسارى رۋسلان بەردەنوۆكە قاستاندىق جاساۋ ءىسى بويىنشا باستى سوت وتىرىسى باستالدى. سوتتالۋشى ەرنار جيەنبايدىڭ ايتۋىنشا، ارەكەتىنە قىزمەتتەگى كيكىلجىڭ ەمەس، جەكە قىزعانىش سەبەپ بولعان، - دەپ حابارلايدى aqshamnews.kz ءتىلشىسى.
6 تامىزدا باستالعان سوت وتىرىسى سوتتالۋشىدان جاۋاپ الۋدان باستالدى. جيەنباي بۇل ءىستىڭ قىزمەتتىك ماسەلەلەرگە قاتىسى جوق ەكەنىن، ءبارى قىزعانىشتان تۋعانىن ايتتى.
"مۇنى حالىق ەستۋى كەرەك. بۇل جۇمىسقا بايلانىستى ەمەس. ءبارى قىزعانىشتان بولدى"، – دەدى ول.
سوتتا جيەنباي وتباسىنا قاتىستى مالىمەتتەردى ءبولىسىپ، الەۋمەتتىك جەلىلەردە تاراعان قاۋەسەتتەردى جوققا شىعارۋعا تىرىستى.
"6-سىنىپتان بەرى بىرگە وقىعان مەنىڭ ادال جارىم، سۇيىكتى ايەلىم. ول ەشقاشان بوتەن اداممەن ارالاسقان ەمەس. جاقسى وتباسىنان شىققان، تاربيەلى قىز. الەۋمەتتىك جەلىلەردە جازعانداي جەڭىلتەك ەمەس"، – دەدى ول.
ونىڭ ايتۋىنشا، ولاردىڭ تۇڭعىش ۇلى – اۋتيزمگە شالدىققان بالا. جۇبايى دا وسىنداي دياگنوزبەن تاربيەلەنىپ جاتقان تۋىس وتباسىعا ءجيى بارىپ تۇرعان. بۇل وتباسى رۋسلان بەردەنوۆتىڭ تۋىستارى بولىپ شىققان. ايەلى سول وتباسىمەن بىرگە بالانى دامىتۋ ساباقتارىنا اپارىپ جۇرگەن.
"جۇبايىم بەردەنوۆپەن ءبىر وتىرىستا بولعان، سول جەردە "قارا كاسسا" (چەرنايا كاسسا) ويناعان"، – دەدى جيەنباي.
ۋاقىت وتە كەلە جيەنبايدىڭ ايتۋىنشا، ايەلى بەردەنوۆتەن "سۇلۋسىڭ" دەگەن حابارلاما العان. ول كەزدە جيەنباي كۇماندانباعانىن ايتتى.
"تەلەفونىنا قاراسام، رۋسلان بەردەنوۆ لايك قويىپ، "سۇلۋسىڭ" دەپ جازىپتى. مەندە ارتىق وي بولعان جوق. مەن دە ونداي سوزدەردى اپكەلەرىمە ايتىپ جۇرەمىن"، – دەدى ول.
قاستاندىق جاسالاردان ءبىر كۇن بۇرىن بەردەنوۆكە قابىلداۋعا بارۋعا دايىندالىپ جاتقانىن، الايدا ايەلى كيىمىن دايىنداپ ۇلگەرمەگەنىن ايتتى. كويلەكتىڭ ەتەگى كۇيىپ قالعان.
"كەشىگىپ بارا جاتتىم. سول كەزدە ايەلىم رۋسلان بەردەنوۆتىڭ قانداي كيىم كيەتىنىن ايتىپ كەتتى. ونىڭ ايتۋىنشا، ول 5 ميلليون تۇراتىن كوستيۋمدەر كيەدى ەكەن. بۇل دا قاستاندىق جاساۋعا سەبەپتەردىڭ ءبىرى بولعان شىعار"، – دەدى جيەنباي.
سوت مەملەكەتتىك تىلدە، اشىق فورماتتا ءوتىپ جاتىر. رۋسلان بەردەنوۆ سوتقا قاتىسپادى. ونىڭ وكىلى جەڭىس تىنىبەكتىڭ ايتۋىنشا، شەنەۋنىك ءقازىر ەم الىپ جاتىر. سوت زالىندا جيەنبايدىڭ ايەلى دە قاتىسىپ جاتىر.
بۇعان دەيىن، 28 شىلدەدە شىمكەنتتىڭ مامانداندىرىلعان قىلمىستىق ىستەر جونىندەگى سوتىندا الدىن الا تىڭداۋ وتكەن بولاتىن. ول كەزدە دە رۋسلان بەردەنوۆ سوتقا قاتىسپاعان.
ءىستى پروكۋرور باۋىرجان قارامانوۆ جۇرگىزىپ جاتىر. ونىڭ مالىمەتىنشە، 2025 جىلعى 21 ساۋىردە ەرنار جيەنباي قالا قۇرىلىس باسقارماسىنداعى نىسانداردى باقىلاۋ ءبولىمىنىڭ باستىعىنان "تۇرعىن ءۇي شىمكەنت" ج ش س باسشىسى قىزمەتىنەن كەتۋ تۋرالى بەردەنوۆتىڭ نۇسقاۋى بارىن ەستىگەن.
سوت ەرنار جيەنبايدى ق ر قك 24-بابى 3-بولىگى جانە 99-بابى 1-بولىگى ("ادام ولتىرۋگە وقتالۋ") بويىنشا ايىپتاپ وتىر. كەيبىر دەرەكتەرگە قاراعاندا، ول بۇعان دەيىن "تۇرعىن ءۇي شىمكەنت" ج ش س مەكەمەسىن باسقارعان. سوت جيەنبايدىڭ بەت-جۇزىن تۇسىرۋگە قارسى ەكەنىن ەسكەرىپ، تۇسىرىلىمگە شەكتەۋ قويدى.