قازاقستان رەسپۋبليكاسى مادەنيەت جانە اقپارات ءمينيسترى ايدا بالايەۆانىڭ بۇيرىعىمەن الەكساندر سەلەزنوۆ اتىنداعى الماتى حورەوگرافيالىق ۋچيليششەسىنىڭ ديرەكتورى قىزمەتىنە ايا جاكەن قىزى قالييەۆا تاعايىندالدى، دەپ حابارلايدى aqshamnews.kz.
ايا قالييەۆا — قازاقستان رەسپۋبليكاسىنىڭ ەڭبەك سىڭىرگەن قايراتكەرى، ق ر ءبىلىم بەرۋ ءىسىنىڭ قۇرمەتتى قىزمەتكەرى، پەداگوگيكا عىلىمدارىنىڭ كانديداتى، ىسكەرلىك اكىمشىلىك ماگيسترى (MBA)، پروفەسسور، بىرنەشە عىلىمي ەڭبەكتەر مەن وقۋ قۇرالدارىنىڭ اۆتورى.
1990 جىلى پ. ي. چايكوۆسكيي اتىنداعى مۋزىكالىق ۋچيليششەسىندە، 1995 جىلى قۇرمانعازى اتىنداعى قازاق ۇلتتىق كونسەرۆاتورياسىندا «كومپوزيسيا» ماماندىعى بويىنشا ءبىلىم العان.
ەڭبەك جولىن مۋزىكالىق كوللەدجدە وقىتۋشىلىق قىزمەتتەن باستاعان. كەيىن قۇرمانعازى اتىنداعى قازاق ۇلتتىق كونسەرۆاتورياسى مەن ت. جۇرگەنوۆ اتىنداعى قازاق ۇلتتىق ونەر اكادەمياسىندا كافەدرا مەڭگەرۋشىسى، دەكان بولدى.
2008 جىلى پەداگوگيكا عىلىمدارىنىڭ كانديداتى عىلىمي دارەجەسىن، 2015 جىلى Almaty Management University-دە ىسكەرلىك اكىمشىلىك ماگيسترى (MBA) دارەجەسىن العان.
كەيىنگى جىلدارى ەلدەگى جەتەكشى مادەنيەت جانە ءبىلىم بەرۋ مەكەمەلەرىندە باسشىلىق قىزمەتتەر اتقارعان:
– 2010–2015 جىلدارى — پ. ي. چايكوۆسكيي اتىنداعى الماتى مۋزىكالىق كوللەدجىنىڭ ديرەكتورى؛
– 2015–2018 جىلدارى — ا. سەلەزنوۆ اتىنداعى الماتى حورەوگرافيالىق ۋچيليششەسىنىڭ ديرەكتورى؛
– 2018 جىلى — جامبىل اتىنداعى قازاق مەملەكەتتىك فيلارمونياسىنىڭ ديرەكتورى؛
– 2018–2021 جىلدارى — اباي اتىنداعى قازاق ۇلتتىق وپەرا جانە بالەت تەاترىنىڭ ديرەكتورى.