قازاقتىڭ كورنەكتى جازۋشىسى ءابدىجامىل كامىل ۇلى نۇرپەيىسوۆ سەنبى كۇنى ومىردەن ءوتتى.
الماتى تۇرعىندارى كورنەكتى قالامگەر، قازاقستاننىڭ ەڭبەك ەرى، حالىق جازۋشىسى، ۇلى وتان سوعىسىنىڭ ارداگەرى ءابدىجامىل كارىم ۇلى نۇرپەيىسوۆتى سوڭعى ساپارعا شىعارىپ سالدى، دەپ حابارلايدى Almaty-akshamy.kz
عاسىر جاساعان قالامگەرمەن قوشتاسۋعا كەلگەن مەملەكەتتىك حاتشىسى ەرلان كارين پرەزيدەنت قاسىم-جومارت توقايەۆتىڭ كوڭىل ايتۋ جەدەلحاتىن وقىپ بەردى.
«اسا كورنەكتى قالامگەر، قازاقستاننىڭ ەڭبەك ەرى، حالىق جازۋشىسى، ۇلى وتان سوعىسىنىڭ ارداگەرى ءابدىجامىل كارىم ۇلى نۇرپەيىسوۆتىڭ دۇنيەدەن وتۋىنە بايلانىستى كوڭىل ايتامىن. ءابدىجامىل كارىم ۇلى سۇراپىل سوعىستى باستان كەشىپ، ەلگە ورالعان سوڭ، قازاق ادەبيەتىن وركەندەتۋگە سۇبەلى ۇلەس قوستى. ۇزاق جىلعى شىعارماشىلىق قىزمەتى جەمىستى بولدى. «قان مەن تەر» تريلوگياسى، «سوڭعى پارىز» ديلوگياسى سياقتى تۋىندىلارى سىنشىلارمەن وقىرماندار تاراپىنان جوعارى باعا الدى. زامان جۇگىن كوتەرگەن روماندارى الەمنىڭ كوپتەگەن تىلدەرىنە اۋدارىلدى. ءابدىجامىل كارىم ۇلىنىڭ جاڭا بەلەستى باعىندىرعان قازاق ادەبيەتىن شەتەلگە تانىتۋعا سىڭىرگەن ەڭبەگى وراسان زور. ول ۇلت رۋحانياتىنىڭ كوشباسشىسى بولدى. ءابدىجامىل نۇرپەيىسوۆ ادام جانىن تەرەڭ تۇسىنەتىن، ءتۇرلى تاعدىردىڭ بەينەسىن كوركەم سۋرەتتەي وتىرىپ وقىرمانعا جەتكىزگەن ويلى، كەڭ تىنىستى جازۋشى بولاتىن. ءومىر بويى قولىنان قالامى تۇسكەن جوق. قازاق ەلىنىڭ رۋحاني-مادەني سالاسىن دامىتۋ جولىندا ولشەۋسىز قىزمەت اتقاردى. ول ۇلت كلاسسيكتەرىنىڭ جولىن لايىقتى جالعاستىرعان قۋاتتى قالامگەر.سولايشا، ءوزى دە قازاق ادەبيەتىنىڭ پاتريارحىنا اينالدى. ءابدىجامىل نۇرپەيىسوۆتىڭ سوڭىندا ۇرپاققا ۇلگى، ۇلىسقا يگىلىك بولاتىن شىعارمالارى قالدى. ەلگە ەس، سىرتقا سەس بولعان جازۋشىنىڭ ەندى ەكىنشى ءومىرى باستالدى. ونەگەلى عۇمىر كەشىپ، سوڭىندا مول مۇرا قالدىرعان ءابدىجامىل كارىم ۇلىنىڭ جارقىن بەينەسى ۇمىتىلمايدى. حالقىمىز ەسىمىن ءاردايىم ارداق تۇتادى. مارقۇمنىڭ يمانى سالامات، جانى ءجانناتتا بولسىن»، - دەلىنگەن كوڭىل ايتۋ جەدەلحاتىندا.