بۇگىن جانە ەرتەڭ — ەكى كۇن بويىنا سالتانات قۇراتىن Almaty Food Fest اتتى “ءتاتتى دە ءدامدى” حالىقارالىق گاسترونوميالىق فەستيۆال رەسپۋبليكا سارايىنىڭ الدىنداعى اباي الاڭىن ءسان-سالتاناتقا بولەۋدە.
فەستيۆالگە الەمنىڭ سان ءتۇرلى اسحانالارىنىڭ تاعامىن ۇسىناتىن 50-گە جۋىق مەيرامحانا مەن 30-دان استام فەرمەرلىك جانە hand-made دۇڭگىرشەكتەرى قاتىسۋدا. ءىس-شارا قوناقتارى اراسىندا بايقاۋلار، ءتۇرلى ۇتىس ويىندارى وتۋدە. الماتىلىقتار مەن قالا مەيماندارى شەبەرلىك دارىستەرىنە دە قاتىسىپ، اسپازدىق شوۋ مەن مۋزىكالىق قويىلىمداردى تاماشالاي الادى.
فەستيۆالدە شەتەلدىك تاعامداردان جانە البەتتە، قازاقتىڭ ۇلتتىق تاعامدارىنان دا ءدام تاتۋعا بولادى. ال بالالار ءۇشىن انيماتورلار ونەر كورسەتەتىن ارنايى ايماق ۇيىمداستىرىلعان.
Almaty Food Fest فەستيۆالى بيىل ءۇشىنشى رەت وتۋدە. بيىلعى فەستيۆالدە شانحاي ىنتىماقتاستىق ۇيىمى ەلدەرىنىڭ اسپازدارى اراسىندا وتەتىن قىزىقتى باربەكيۋ بايقاۋى ءىس-شارانىڭ تۇزدىعى بولاتىن سەكىلدى.
«حالىقارالىق گاسترونوميالىق فەستيۆال شەتەلدىك قوناقتار مەن قالا تۇرعىندارىنا ەلىمىزدىڭ تاريحىن، مادەنيەتىن، ءداستۇرىن جانە ءسالت-داستۇرىن، ءومىر سالتىن جاقسىراق تۇسىنۋگە مۇمكىندىك بەرەدى. بۇعان قوسا، فەستيۆال الماتىنى الەمنىڭ گاسترونوميا كارتاسىندا ناسيحاتتاۋعا ۇلەس قوسىپ، ىشكى جانە سىرتقى ءتۋريزمدى دامىتۋعا، سونداي-اق ەلىمىزگە تانىمال حالىقارالىق مەيرامحانا رەيتينگتەرىنىڭ وكىلدەرىن تارتۋعا سەپتىگىن تيگىزەدى»، – دەيدى فرانسۋزدىق باس اسپاز جەروم كۋستياس.
الماتى قالاسىنىڭ تۋريزم باسقارماسى Almaty Food Fest – 2024 فەستيۆالىنە ەكى كۇن ىشىندە 15 مىڭنان استام ادام قاتىسادى دەپ بولجاپ وتىر.
“ءبىزدىڭ La Tartine ءداستۇرلى فرانسۋز نان ونىمدەرىن پىسىرەدى. ءتاتتى توقاشتارىمىز اشىتقىسىز، ەرەكشە رەسەپتپەن دايىندالادى. الماتىنىڭ بارلىق ساۋدا-ويىن-ساۋىق ورتالىعىندا ساتىلادى. بۇل حالىقارالىق فەستيۆالگە ءبىرىنشى رەت قاتىسىپ تۇرمىز. ءبىزدىڭ نان ونىمدەرىنەن وتانداستارىمىزبەن بىرگە شەتەلدىك مەيماندار دا اۋىز ءتيىپ، دامىنە تامسانىپ جاتسا، قۋانامىز”، — دەيدى گاستروفەستيۆالگە ىستىق نان ونىمدەرىن الا كەلگەن La Tartine وكىلى اسەل قاباشيەۆا.
“ءتاتتى دە ءدامدى” فەستيۆال بارشاڭىزدى كۇتەدى!