الماتىدا جاستار كوممۋنالدىق قىزمەتكەرلەرگە ىستىق شاي تاراتتى
22-23 قاڭتار كۇندەرى الماتىدا جاۋعان قالىڭ قاردان كەيىن قالا تۇرعىندارى مەن جەرگىلىكتى ەرىكتىلەر بىر-بىرىنە شىنايى قولداۋ كورسەتىپ، قامقورلىق تانىتتى. قالانىڭ كوممۋنالدىق قىزمەتى كۇشەيتىلگەن رەجيمدە جۇمىس ىستەپ، جولداردى قاردان تازالاپ، نەگىزگى ماگيسترالداردا كەپتەلىستەردىڭ الدىن الۋعا تىرىستى. قىزمەتكەرلەر تاۋلىك بويى ەڭبەك ەتىپ، قالا تۇرعىندارىنىڭ قاۋىپسىزدىگى مەن جايلىلىعىن قامتاماسىز ەتتى.
قولايسىز اۋا رايىنا قاراماستان، جۇزگە جۋىق ەرىكتى جالعىزباستى زەينەتكەرلەردىڭ ۇيىنە بارىپ، اۋلاسۆن قاردان تازالاۋعا كومەكتەستى.
«70-تەن اسقان كەزدە قار كۇرەۋ وڭاي ەمەس. ەرىكتىلەردىڭ بەي-جاي قالماي، كومەككە كەلگەنىنە قاتتى ريزا بولدىم. ولار قول كومەگىمەن قاتار، جۇرەك جىلۋىن جەتكىزدى، جىلى سوزدەرى ايازدى كۇنى جانىڭدى جادىراتادى. ءوزىمدى قامقور قالانىڭ تۇرعىنى سەزىندىم»، – دەدى زەينەتكەر ەلەنا كونستانتينوۆنا.
جاستار كوممۋنالدىق قىزمەتكەرلەرگە ىستىق ءشاي مەن تاماق تاراتىپ قانا قويماي، جاياۋ جۇرگىنشىلەر جولىن قاردان تازالاۋعا دا كومەكتەستى.
بۇل قامقورلىقتى كورگەن قالا تۇرعىندارى دا قايىرىمدىلىق شارالارىنا اتسالىستى. كوپشىلىگى ازىق-تۇلىك، قار تازالاۋعا ارنالعان قۇرال-جابدىقتار ۇسىنىپ نەمەسە كورشىلەرىنە كومەكتەسىپ، بەرەكە-بىرلىكتىڭ، قامقورلىقتىڭ ۇلگىسىن كورسەتتى.
مۇنداي ءىس-شارالار الماتى ءۇشىن تاڭسىق ەمەس. قالانىڭ ەرىكتىلەرى قىس مەزگىلىندەگى تابيعي اپاتتاردا عانا ەمەس، جىلدىڭ كەز كەلگەن ۋاقىتىندا كومەك كورسەتەتىن ءتۇرلى شارالاردى تۇراقتى تۇردە ۇيىمداستىرىپ كەلەدى. ولار الەۋمەتتىك جوبالارعا قاتىسىپ، كوپبالالى وتباسىلارعا قولداۋ كورسەتەدى، از قامتىلعان ازاماتتارعا كيىم-كەشەك پەن ازىق-تۇلىك جيناۋدى ۇيىمداستىرادى.
«ءبىز كومەك قاجەت ەكەنىن كورىپ، بەي-جاي قاراي المايمىز. ەرىكتىلىك – ءبىر رەتتىك اكسيا ەمەس. بۇل ءبىزدىڭ قالامىزدىڭ دامۋىنا، تۇرعىندار اراسىنداعى جىلى قارىم-قاتىناسقا قوسقان ۇلەسىمىز. وسىلايشا، ءبىز كەيدە بايقامايتىن اۋلا سىپىرۋشىلاردىڭ، تازالىقشىلاردىڭ، كوممۋنالدىق قىزمەتكەرلەردىڭ كۇندەلىكتى ەڭبەگىن باعالاۋدى ۇيرەنەمىز. الماتى – ءبارىمىزدىڭ ورتاق ءۇيىمىز، ءبىر-بىرىمىزدى قولداپ، سۇيىكتى قالامىزعا بىرگە قامقور بولايىق!» – دەيدى «Qamqor charity» قورىنىڭ ەرىكتىسى زەرە ماقسۇتحان.
الماتىداعى قالىڭ قار قالا ءۇشىن سىناق بولعانىمەن، ادامدارعا وزدەرىن كورسەتۋدىڭ تاماشا مۇمكىندىگىنە اينالدى. وسىنداي ساتتەردە بىرلىك پەن بىر-بىرىنە كومەك كورسەتۋ ەرەكشە ماڭىزعا يە. الماتى ەرىكتىلەرى بىرنەشە جىل بويى كۇندەلىكتى ومىردە قالانىڭ ناعىز باتىرلارى اتانىپ، جايلى شاھارعا اينالدىرىپ كەلەدى.