وڭىرلىك كوممۋنيكاسيالار قىزمەتىنىڭ الاڭىندا تۋبەركۋلەزگە قارسى كۇرەس ايلىعىنا ارنالعان بريفينگ ءوتتى. الماتى قالالىق سانيتارلىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى مەگاپوليستەگى جاعداي مەن الدىن الۋدىڭ ءتيىمدى ادىستەرىنە توقتالدى، دەپ حابارلايدى اlmaty-akshamy.kz.
«تۋبەركۋلەزدىڭ سپەسيفيكالىق پروفيلاكتيكاسىنىڭ باستى ماقساتى – ۆاكسيناسيا. ۆاكسيناسيا جاڭا تۋعان نارەستەلەرگە ءومىردىڭ 4-7ء-شى كۇنىندە جۇرگىزىلەدى. بىرنەشە جىلدان كەيىن تۋبەركۋلەزدىڭ الدىن الۋ ماقساتىندا 7 جاستاعى دەنى ساۋ بالالارعا (1-سىنىپ وقۋشىلارى) ريەۆاكسيناسيا جۇرگىزىلەدى. بسج ۆاكسيناسى اۋرۋدىڭ دامۋ ءقاۋپىن 50%-عا تومەندەتەدى. ۆاكسيناسيامەن قامتۋ نەعۇرلىم جوعارى بولسا، تۋبەركۋلەز اۋرۋى سوعۇرلىم ازايادى»، - دەدى اسەل قالىقوۆا.
- ۆاكسيناسيا ارقىلى تۋبەركۋلەزدىڭ الدىن الۋ ينفەكسيا دەڭگەيىنىڭ تومەندەۋىنە، تۋبەركۋلەزدىك مەنينگيتپەن سىرقاتتانۋشىلىق پەن ءولىم-جىتىمنىڭ كۇرت تومەندەۋىنە اكەلەدى، - دەپ ەسەپتەيدى ەپيدەميولوگ.
تۋبەركۋلەزدىڭ الدىن الۋدا ەرەسەك تۇرعىنداردى فليۋوروگرافيالىق تەكسەرۋدىڭ دە تيىمدىلىگى زور. جىل سايىنعى تەكسەرۋ تۋبەركۋلەزبەن اۋىراتىنداردى دەر كەزىندە انىقتاۋعا كومەكتەسەدى. تۋبەركۋلەزدىڭ الدىن الۋ جۇيەسىندەگى فليۋوروگرافيا اۋرۋدىڭ ەرتە كەزەڭدەرىندە ەمدەۋدى باستاۋعا مۇمكىندىك بەرەدى، بۇل - اۋرۋمەن كۇرەستەگى ماڭىزدى شارتتاردىڭ ءبىرى.
«سونىمەن قاتار تۋبەركۋلەزدىڭ الەۋمەتتىك پروفيلاكتيكاسى بار، بۇل حالىقتىڭ تۇرمىس جاعدايىن جاقسارتۋ، ەڭبەك جاعدايىن وڭتايلاندىرۋ، وكپە اۋرۋلارىنىڭ الدىن الۋ، تاماقتانۋ ساپاسىن جاقسارتۋ، ماسكۇنەمدىكپەن، ناشاقورلىقپەن كۇرەسۋ. ، تەمەكى شەگۋ جانە ت.ب.»، - دەپ جالعاستىردى ءا.قالىقوۆا.
سانيتارلىق-ەپيدەميولوگيالىق دەپارتامەنت وكىلى 2022 جىلى الماتىدا تۋبەركۋلەزدىڭ 482 جاڭا جاعدايى انىقتالعانىن، سىرقاتتانۋشىلىق كورسەتكىشىنىڭ 3%-عا تومەندەۋى بايقالاتىنىن ايتتى.
وتكەن جىلى تۋبەركۋلەزبەن اۋىراتىنداردىڭ نەگىزگى كورسەتكىشىن جۇمىسسىزدار – 44،2%، زەينەتكەرلەر – 18،3%، باسقا حالىق – 14،1%، بوسانعاننان كەيىنگى كەزەڭدەگى ايەلدەر – 1،2% قۇرادى.