الماتى ەنەرگەتيكا جانە ەلەكتروندى تەحنيكالار كوللەدجىندە وقۋ ورداسىنىڭ 60 جىلدىعىنا ارنالعان سالتاناتتى جيىن ءوتتى.
مەرەيتويلىق جيىنعا اتالمىش وقۋ ورداسىندا ۇزاق جىلدار قىزمەت ەتكەن ەڭبەك ارداگەرلەرى مەن قالامىزداعى باسقا دا وقۋ ورىندارىنىڭ باسشىلارى قاتىستى. وسى جىلدار ىشىندە كوللەدج ەل ءومىرىنىڭ دامۋىنا ەلەۋلى ۇلەسىن قوستى.
ەلەكتر ەنەرگياسى مەن جارىقسىز دامۋ مۇمكىن ەمەس. ەلىمىزدە اەس قۇرىلىسىنىڭ قولعا الىنۋى دا وسى قاجەتتىلىكتى قامتيدى. الماتى ەنەرگەتيكا جانە ەلەكتروندى تەحنيكالار كوللەدجى – بولاشاقتا وسىنداي الپاۋىت ستانسيالارعا قاجەت مامانداردى دايارلايتىن جەتەكشى وقۋ ورنى. وسىعان وراي ۇلكەن جۇمىستار قولعا الىنۋدا.
العاشىندا "ەنەرگوقۇرىلىس تەحنيكۋمى" دەپ اتالعان وقۋ ورداسى زامان تالابىنا ساي اتاۋىن بىرنەشە مارتە وزگەرتىپ، قازىرگى تاڭدا "الماتى ەنەرگەتيكا جانە ەلەكتروندى تەحنيكالار كوللەدجى" دەگەن اتپەن نارىققا قاجەتتى ماماندار دايارلاپ كەلەدى. 60 جىل ىشىندە وقۋ ورنى 30 مىڭعا جۋىق بىلىكتى مامان دايارلاپ شىعاردى.
مەرەيتوي اياسىندا بىرنەشە جاڭا شەبەرحانا اشىلدى:
- "TESLO" ج ش س جانە "SMART LIGHT GROUP" ج ش س قولداۋىمەن "اقىلدى ءۇي" اۆتوماتتاندىرىلعان باسقارۋ جۇيەسى شەبەرحاناسى؛
- "KAZ ENERGO POWER" ج ش س قولداۋىمەن "رەلەلىك قورعانىس جانە اۆتوماتيكا" شەبەرحاناسى؛
- "Legrand" كومپانياسىنىڭ قولداۋىمەن "ەلەكتر جابدىقتارىن ورناتۋ" شەبەرحاناسى.
كوللەدجدىڭ 60 جىلدىق تاريحى ونىڭ ءبىلىم بەرۋ سالاسىنداعى ماڭىزدىلىعىن تاعى دا دالەلدەي تۇسەدى.
تاقىرىپقا وراي:
باعداۋلەت ابىزبايەۆ، الماتى ەنەرگەتيكا جانە ەلەكتروندى تەحنولوگيالار كوللەدجىنىڭ ديرەكتورى:
– قازىرگى كەزدە كوللەدجىمىزدە 1500-دەن استام ستۋدەنت ءبىلىم الىپ جاتىر. ولار كۇندىزگى جانە سىرتتاي بولىمدەردە ءبىلىم الادى. وقۋ مەملەكەتتىك جانە ورىس تىلىندە جۇرگىزىلەدى. كوللەدج ەلىمىزدەگى ەڭ الدىڭعى وقۋ ورنىنىڭ ءبىرى دەپ تانىلسا، بۇل ەڭ الدىمەن ماتەريالدىق-تەحنيكالىق بازاعا دا بايلانىستى. ءبىزدىڭ كوللەدج زاماناۋي وقۋ ورىندارىنىڭ ءبىرى. ءۇش وقۋ كورپۋسى بار. سونىمەن قاتار، 33 وقۋ كابينەتى، 30 لابوراتوريا،
14 وقۋ-وندىرىستىك شەبەرحاناسى بار. بىلىكتى مامان دايارلاۋ ءۇشىن ەڭ الدىمەن وقىتۋشى ءوز ءبىلىمىن زامان تالابىنا سايكەس جەتىلدىرىپ وتىرۋى كەرەك. وسى ورايدا سوڭعى جىلدارى 60-تان استام وقىتۋشىمىز اقش، انگليا، چەحيا، گەرمانيا، تۇركيا، فرانسيا، سينگاپۋر، مالايزيا، ۆەنگريا، سلوۆاكيا، جاپونيا، برازيليا، بەلارۋس مەملەكەتتەرىنە بارىپ، بىلىكتىلىكتەرىن كوتەرىپ قايتتى. ءبىزدىڭ كوللەدج ساپالى ءبىلىم بەرۋمەن قاتار، سالاۋاتتى ۇرپاق تاربيەلەۋ جولىندا دا ۇنەمى بەلسەندىلىك تانىتىپ كەلەدى. ەلىمىزدىڭ ەنەرگەتيكا سالاسىن دامىتۋ ءۇشىن ءبىز قاشاندا ءوز ۇلەسىمىزدى قوسۋعا دايىنبىز!