الماتى - ەلىمىزدەگى لاستانۋ دەڭگەيى جوعارى قالالار قاتارىندا

ەلىمىز بويىنشا اۋاسى لاس 10 قالا اتالدى

ق ر ەكولوگيا، گەولوگيا جانە تابيعي رەسۋرستار مينيسترلىگى ەكولوگيالىق رەتتەۋ جانە باقىلاۋ كوميتەتىنىڭ ءتوراعاسى زۇلفۇحار جولداسوۆ ەلىمىز بويىنشا لاستانۋ دەڭگەيى جوعارى قالالاردى اتادى، دەپ حابارلايدى Almaty-akshamy.kz قازاقپارات سايتىنا سىلتەمە جاساپ. 

«مەملەكەت باسشىسى قازاقستان حالقىنا جولداۋىندا ەلىمىزدەگى ەكولوگيالىق پروبلەمالارعا، اسىرەسە، اۋا ساپاسىنا باسا نازار اۋدارۋدى تاپسىردى. وسى ورايدا نەعۇرلىم لاستانعان 10 قالانى گازداندىرۋ جانە بالامالى ەنەرگيا كوزدەرىنە كوشىرۋ قاجەت. قازگيدرومەتتىڭ ەكولوگيالىق مونيتورينگىنە سايكەس، وتكەن جىلدىڭ قورىتىندىسى بويىنشا 45 ونەركاسىبى بار 10 قالا اتموسفەرالىق اۋانىڭ جوعارى لاستانۋ دەڭگەيىنە جاتاتىنى كورسەتىلدى. بۇل نۇر-سۇلتان، الماتى، قاراعاندى، تەمىرتاۋ، اتىراۋ، اقتوبە، بالقاش، وسكەمەن، جەزقازعان جانە شىمكەنت قالاسى»، - دەدى ز. جولداسوۆ.

سونىمەن قاتار كوميتەت باسشىسى رەسپۋبليكالىق ماڭىزى بار قالالارداعى اۋانىڭ لاستانۋ سالدارىن اتاپ بەردى. ونىڭ ايتۋىنشا، الماتى مەن نۇر-سۇلتان سياقتى ءىرى قالالاردا لاستانۋدىڭ نەگىزگى پايىزى جىلۋ كوزدەرىنە (قازاندىقتار)، اۆتوكولىك پەن جەكە سەكتورلارعا تيەسىلى. وسكەمەن جانە تەمىرتاۋ قالاسىندا اۋا كوبىنە كوپ ونەركاسىپ ورىندارى ەسەبىنەن لاستانادى. ال اقتوبە جانە اتىراۋ قالاسى بويىنشا ەسكىرگەن كارىز جۇيەسى اۋانىڭ لاستانۋىنا اكەلىپ وتىرعان كورىنەدى.