الماتى ەلىمىزدەگى بىرەگەي تۋريستىك قالا

5-ورىن. اقتاۋ

ۇزدىك بەستىكتى قارت كاسپييدىڭ اقمارجانى – اقتاۋ قالاسى اشادى. بيىل ءقاڭتار-ساۋىر ارالىعىندا اقتاۋعا 220 660 قوناق كەلگەن.

ال، جازعى ماۋسىمعا قاراي، تۋريستەر تاراپىنان ماڭعىستاۋ وبلىسىنىڭ ورتالىعىنا قىزىعۋشىلىق 20%-عا دەيىن ارتىپ وتىر.4-ورىن. اتىراۋ

اتىراۋ قالاسى دا تۋريستەر سانى بويىنشا ۇزدىكتەر قاتارىندا. 2023 جىلدىڭ العاشقى ءتورت ايىندا قالاعا 305 460 قوناق كەلگەن. مامىر ايىندا مادەنيەت جانە سپورت مينيسترلىگىنىڭ قولداۋىمەن وڭىردە «سارايشىق» ۆيزيت-ورتالىعى اشىلدى.

مۇندا تۋريستەرگە قازاق حاندىعى، التىن وردا جانە ەجەلگى داۋىردەگى قالاشىق تاريحىمەن تانىسۋعا بارلىق جاعداي جاسالعان.

دەمەك، جازعى ماۋسىمدا اتىراۋعا كەلۋشىلەر سانى ارتادى.

3-ورىن. شىمكەنت

قوناقجايلىعى بويىنشا ەشكىمگە ەسە جىبەرمەيتىن شىمكەنت تۋريستەر سانى جاعىنان دا كوش باسىندا. ءقاڭتار-ساۋىر ارالىعىندا شىرايلى شاھارعا 346 280 ادام ساياحاتتاپ بارعان.

مۇندا كەز كەلگەن تۋريست كوڭىلى قالاعان دەمالىستى تاڭداي الادى.

كيەلى-تاريحي ورىندارعا ساياحات، شيپايجايداعى دەمالىس نەمەسە قالادا ءجيى ۇيىمداستىرىلاتىن سپورتتىق، مادەني-بۇقارالار ءىس-شارالارعا قاتىسۋعا بولادى.

2-ورىن. استانا

استانا – اكىمشىلىك-ىسكەرلىك ورتالىق قانا ەمەس، تۋريستەر ءجيى تاڭدايتىن باسىم باعىتتاردىڭ ءبىرى. 2023 جىلدىڭ العاشقى ءتورت ايىندا عانا استانا 951 750 مەيماندى قابىلداعان.

بۇگىندە مادەنيەت جانە سپورت مينيسترلىگىنىڭ قولداۋىمەن ەلوردا ىرگەسىندە ەلىمىزدەگى ەڭ ۇلكەن اشىق اسپان استىنداعى مۋزەي قۇرىلىسى ءجۇرىپ جاتىر.

بوزوق – باس قالانىڭ تۋريستىك بويتۇمارى رەتىندە قوناقتار مىندەتتى تۇردە تاماشالاۋعا باراتىن ورىنعا اينالادى.

1-ورىن. الماتى

تاۋ-شاڭعى كۋرورتتارى، سۇلۋ تابيعات، قولايلى كليمات پەن قوناقجايلىلىق. وسى جانە باسقا دا ارتىقشىلىقتارى بار الماتى ەلىمىزدەگى بىرەگەي تۋريستىك قالا.

بيىلعى جىلدىڭ العاشقى ءتورت ايىندا وڭتۇستىك مەگاپوليسكە 1 185 130 ادام ساياحاتتاپ كەلگەن. الماتىعا اسىرەسە شەتەلدىك تۋريستەر ءجيى توقتايدى.

مادەنيەت جانە سپورت مينيسترلىگى ءوڭىردىڭ تۋريستىك الەۋەتىن تولىق ىسكە اسىرۋ ماقساتىندا شەتەلدىك تۋروپەراتورلارمەن بەلسەندى جۇمىس جۇرگىزىپ جاتىر.

2023 جىلدىڭ العاشقى ءتورت ايىندا قازاقستاندا 3،5 ملن ادام ەل ىشىندە ساياحاتتاعان. بۇل وتكەن جىلدىڭ سايكەس كەزەڭىمەن سالىستىرعاندا 36% - عا ارتىق. مادەنيەت جانە سپورت مينيسترلىگى ىشكى ءتۋريزمدى ىنتالاندىرۋعا ارنالعان بىرنەشە باعدارلاما ازىرلەپ، ىسكە قوستى. مىسالى، Kids go Free باعدارلاماسى بويىنشا قازاقستاندىقتار ەل ىشىندەگى وتباسىلىق دەمالىستى ءتيىمدى جوسپارلاپ، تۋروپەراتورلاردان تۋريستىك پاكەت ساتىپ العاندا 30%-عا دەيىن قاراجات ۇنەمدەي الادى.