تەگىن كاسىبي ءبىلىم بەرۋ مەن جۇمىسشى ماماندىقتارىن دامىتۋ الماتى مەن جالپى ەل كولەمىندە ەڭبەك ادامىن قولداپ، جاستاردى جۇمىسپەن قامتۋداعى نەگىزگى قۇرالدىڭ بىرىنە اينالدى. تەحنيكالىق جانە كاسىپتىك ءبىلىم بەرۋدىڭ ترانسفورماسياسى، ونىڭ سيفرلاندىرۋ مەن جاھاندىق وزگەرىستەر جاعدايىنداعى جاڭا ءرولى تۋرالى الماتى تەحنولوگيالىق كوللەدجىنىڭ ديرەكتورى ەرۋلان قاراعۇلوۆ الماتى قالاسىنىڭ وڭىرلىك كوممۋنيكاسيالار قىزمەتىندە وتكەن باسپا ءسوز كونفەرەنسياسىندا ايتىپ ءوتتى.
ونىڭ ايتۋىنشا، بۇگىندە تەحنيكالىق جانە كاسىپتىك ءبىلىم بەرۋ جۇيەسى تۇبەگەيلى بەتبۇرىس كەزەڭىن باستان وتكەرىپ وتىر. بۇرىن تجكب كوبىنە قولونەردى، قول ەڭبەگىن ۇيرەتسە، XXI عاسىردا بۇل شەكارا ءىس جۇزىندە جويىلدى. قازىرگى زامانعى جۇمىسشى مامان ورىنداۋشى عانا ەمەس، سونىمەن قاتار ءبىلىمنىڭ، تەحنولوگيا مەن يننوۆاسيالىق ويدىڭ دا يەسى بولۋى كەرەك.
"ءبىز جۇمىسشى ماماندىعىن "قارا جۇمىس ىستەيتىن ادام" دەگەن ەسكى تۇسىنىكتەن ارىلتىپ جاتىرمىز بىرتە-بىتە. ءقازىر اسپاز دا، ەلەكتريك تە، تەحنولوگ تا سيفرلىق قۇرالداردى مەڭگەرىپ، اۆتوماتتاندىرۋ بارىسىن ءتۇسىنىپ، ءوز بەتىمەن شەشىم قابىلداي الۋى كەرەك. قازىرگى كوللەدج وتكەننىڭ شەبەرحاناسى ەمەس، بولاشاق ماماننىڭ ويلاۋ جۇيەسى قالىپتاساتىن ۇلكەن كەڭىستىك ول"، - دەيدى ەرۋلان قاراعۇلوۆ.
سيفرلاندىرۋ، اۆتوماتتاندىرۋ مەن جاساندى ينتەللەكت بۇكىل الەمدە ەڭبەك نارىعىن تۇبەگەيلى وزگەرتىپ جاتقاندىقتان، كاسىپتىك ءبىلىم بەرۋ جۇيەسى ءتورتىنشى ونەركاسىپتىك ريەۆوليۋسيانىڭ سىن-قاتەرلەرىنە بەيىمدەلۋگە ءماجبۇر. وقۋ پروسەسىنە ونلاين-پلاتفورمالار، ۆيرتۋالدى سيمۋلياتورلار، VR-ترەناجەرلەر مەن ناقتى وندىرىستىك جاعدايلاردى مودەلدەۋگە مۇمكىندىك بەرەتىن سيفرلىق مودۋلدەر ەنگىزىلىپ جاتىر. ۇزاق ءارى قاتاڭ بەكىتىلگەن باعدارلامالاردىڭ ورنىنا ءبىلىم بەرەتىن يكەمدى تراەكتوريالار، ميكروكۆاليفيكاسيالار مەن قىسقا مەرزىمدى كۋرستار پايدا بولدى. بۇل ەڭبەك نارىعىندا سۇرانىسقا يە داعدىلاردى جىلدام مەڭگەرۋگە مۇمكىندىك بەرەدى.
سونىمەن قاتار امبەباپ قۇزىرەتتەردى - سىني ويلاۋ، كرەاتيۆتىلىك، كوممۋنيكاسيا، كوماندادا جۇمىس ىستەۋ قابىلەتى مەن ەكولوگيالىق جاۋاپكەرشىلىكتى دامىتۋ دا ماڭىزدى بولا ءتۇستى. مۇنىڭ ءبارى كاسىبي ءبىلىم بەرۋدىڭ جاڭا فيلوسوفياسىن قالىپتاستىرادى، وندا كوللەدج تۇلەگى ءومىر بويى وقىپ، وزگەرىستەرگە بەيىمدەلۋگە دايىن بولۋى ءتيىس.
"بۇگىنگى مىندەتىمىز - تار شەڭبەردەگى ماماندى ەمەس، ماماندىعىمەن بىرگە دامي الاتىن تۇلعانى دايارلاۋ. تەحنولوگيا جىلدام وزگەرەدى، سوندىقتان كوللەدجدەر ستۋدەنتتەرگە كاسىپتى عانا ەمەس، جاڭانى جىلدام مەڭگەرىپ، يننوۆاسيامەن جۇمىس ىستەپ، بولاشاقتى كورە ءبىلۋ قابىلەتىن ۇيرەتۋى كەرەك"، - دەپ اتاپ ءوتتى كوللەدج ديرەكتورى.
ءقازىر ەلدە 772 كوللەدج جۇمىس ىستەيدى، وندا 550 مىڭنان استام ستۋدەنت ءبىلىم الىپ جاتىر. مەملەكەت تجكب جۇيەسىن ونەركاسىپتىك ءوسىم مەن ەكونوميكانى تەحنولوگيالىق جاڭعىرتۋدىڭ ستراتەگيالىق رەسۋرسى رەتىندە قاراستىرادى. پرەزيدەنت قاسىم-جومارت توقايەۆتىڭ باستاماسىمەن جاستار مەن ماماندىعى جوق ازاماتتار ءۇشىن تەحنيكالىق جانە تەحنولوگيالىق ماماندىقتار بويىنشا تەگىن وقىتۋدى قامتيتىن كاسىپتىك ءبىلىم بەرۋدى جاڭعىرتۋعا باعىتتالعان كەشەندى جۇمىستار ىسكە اسىرىلا باستادى.
كوللەدجدەردىڭ تارتىمدىلىعى ايتارلىقتاي ارتتى: سوڭعى جىلدارى ستۋدەنتتەردىڭ شاكىرتاقىسى 2020 جىلمەن سالىستىرعاندا جالپى العاندا 100%-عا ءوستى. كوللەدج وقىتۋشىلارىنىڭ جالاقىسى ەكى ەسە ۇلعايدى، بىلىكتىلىكتى ارتتىرۋ باعدارلامالارى مەن شەتەلدىك تاعىلىمدامالار دامىپ كەلەدى، WorldSkills ستاندارتتارى ەنگىزىلىپ جاتىر.
ينفراقۇرىلىمدى جاڭعىرتۋدىڭ ماڭىزدى كەزەڭى - "جاس مامان" جوباسى بولدى. ونىڭ اياسىندا ەلىمىزدەگى 180 كوللەدج 100 ەڭ سۇرانىسقا يە ماماندىق بويىنشا زامانادىق جابدىقپەن قامتاماسىز ەتىلدى. بۇلار ءىس جۇزىندە وڭىرلىك قۇزىرەت ورتالىقتارى مەن يننوۆاسيالىق زەرتحاناعا اينالىپ بارادى.
"“جاس مامان” جوباسى تجكب جۇيەسى ءۇشىن ناعىز سەرپىلىس بولدى. ءبىز الەمدىك دەڭگەيدەگى جابدىققا قول جەتكىزدىك، ستۋدەنتتەردى ناقتى تەحنولوگيالار نەگىزىندە وقىتۋعا جانە ولاردا ينجەنەرلىك ءارى جوبالىق ويلاۋدى قالىپتاستىرۋعا مۇمكىندىك تۋدى"، - دەدى ەرۋلان قاراعۇلوۆ.
تجكب ترانسفورماسياسىنىڭ جارقىن مىسالى - قوناقجايلىلىق يندۋسترياسى. بۇگىندە تۋريزم مەن مەيرامحانا بيزنەسى داعدىنى، تەحنولوگيانى، كرەاتيۆتى ويلاۋدى ۇشتاستىرۋدى تالاپ ەتەدى. "جاس مامان" جوباسى اياسىندا الماتى تەحنولوگيالىق كوللەدجى تاعام تەحنولوگيالارى بويىنشا قۇزىرەت ورتالىعىنا اينالىپ، WorldSkills ستاندارتىنا ساي جابدىقتارمەن - يندۋكسيالىق پليتالاردان باستاپ تاعامدىق 3D-پرينتەرلەرگە دەيىن تولىقتىرىلدى. ستۋدەنتتەر سيفرلىق سيمۋلياتورلار، VR-ترەناجەر مەن ارناۋلى باعدارلامالىق قامتاماسىز ەتۋ ارقىلى ءبىلىم الادى.
سونىمەن قاتار كوللەدجدەردىڭ جانىنان وقۋ-وندىرىستىك الاڭدار، شاعىن كاسىپورىندار، وقۋ كافەلەرى، سەحتار مەن شەبەرحانالار قۇرىلىپ جاتىر. مۇندا ستۋدەنتتەر تاپسىرىس بەرۋشىلەرمەن ناقتى جۇمىس ىستەپ، كاسىپكەرلىك نەگىزدەرىن مەڭگەرەدى. وسىلايشا كوللەدجدەر بىرتىندەپ قولدانبالى يننوۆاسيالاردىڭ ينكۋباتورىنا اينالا باستادى.
قازاقستانداعى تەحنيكالىق جانە كاسىپتىك ءبىلىم بەرۋ جۇيەسىنىڭ ترانسفورماسياسى بۇگىندە ادامي كاپيتال مەن بولاشاق ەكونوميكاسىنا سالىنعان ستراتەگيالىق ينۆەستيسيا رەتىندە قاراستىرىلادى.