ورتالىق قالالىق كلينيكالىق اۋرۋحاناعا تۇسكەن 45 جاستاعى ايەل بەلى مەن سەگىزكوزى قاتتى اۋىراتىنىن ايتىپ شاعىمدانعان. بەل ومىرتقاسىنىڭ اۋىرىپ جۇرگەنىنە 2 جىل بولىپتى، دەپ حابارلايدى Almaty-akshamy.kz Inform.kz-كە سىلتەمە جاساپ.
دارىگەرلەر ونى تەزدەتىپ اۋرۋحانانىڭ نەيروحيرۋرگيا بولىمشەسىنە جوسپارلى تۇردە جاتقىزۋ تۋرالى شەشىم قابىلدادى. تەكسەرۋ بارىسىندا بەل ومىرتقانىڭ (L3) وڭ جاعىندا ەكسترادۋرالدى ىسىك بارى انىقتالدى.
«ەكسترادۋرالدى ىسىك جۇلىن سىرتىنداعى قاتتى قابىقتان تىسقارى جەردە پايدا بولادى. كەيدە ىسىكتىڭ بۇل ءتۇرى ومىرتقالاردىڭ اراسىنداعى تەسىك ارقىلى دا تارالۋى مۇمكىن. ونىڭ تارالۋ اۋماعى مەن جىلدامدىعى ىسىكتىڭ تۇرىنە بايلانىستى ءارتۇرلى. بۇل جولى پاسيەنتتىڭ ومىرتقاسىنداعى ىسىكتى تەز ارادا الىپ تاستاۋ قاجەت بولدى»، - دەيدى نەيروحيرۋرگيا بولىمشەسى مەڭگەرۋشىسى مارات الماتوۆ.
ماماندار نەيرومونيتورينگ ءادىسىن پايدالانا وتىرىپ، ىسىكتى حيرۋرگيالىق ۋلترادىبىستىق اسپيراتوردىڭ كومەگىمەن كەسىپ الىپ تاستادى. 3 ساعاتقا سوزىلعان وتا مىندەتتى الەۋمەتتىك مەديسينالىق ساقتاندىرۋ پاكەتى شەڭبەرىندە جاسالدى.
وپەراسيا ءساتتى ءوتتى، ءقازىر پاسيەنتتىڭ جاعدايى جاقسى، حيرۋرگيالىق مانيپۋلياسيادان كەيىن جۇيكە جۇيەسىندە ەشقانداي اۋىتقۋشىلىق پايدا بولعان جوق.
دارىگەرلەردىڭ ايتۋىنا قاراعاندا، مۇنداي ىسىكتەر اعزاداعى اقاۋلار مەن وزگەرىستەرگە، قورشاعان ورتاداعى جاعىمسىز فاكتورلاردىڭ ورگانيزمگە كەرى اسەرىنە بايلانىستى تۋىندايدى. سونىمەن قاتار ماماندار ونىڭ تۇقىم قۋالايتىنىن دا جوققا شىعارمايدى.
اۋرۋ بەلگىلەرى دە ىسىكتىڭ وسۋىنە قاراي وزگەرىپ وتىرادى. كوبىنە بەل ومىرتقا تۇسى وتىرعاندا دا، جاتقاندا دا اۋىرادى، كەيدە اۋىرسىنۋ سەزىمى ارقاعا، اياق پەن قولعا بەرىلەدى. ىسىك بولۋى مۇمكىن دەگەن كۇدىك تۋىنداعان جاعدايدا نيەۆروپاتولوگتار ماگنيتتى-رەزونانستىق نەمەسە كومپيۋتەرلىك توموگرافياعا، كەي جاعدايدا بيوپسياعا جولداما بەرەدى.