ءتىس اۋرۋلارى ءجيى كەزدەسەدى.
جاس بالالاردا كەڭ تارالعان دەنساۋلىق ماسەلەسىنە نەفرولوگيالىق جانە ستوماتولوگيالىق اۋرۋلار جاتادى. ولاردىڭ سەبەپتەرى مەن الدىن الۋ تۋرالى الماتى وڭىرلىك كوممۋنيكاسيالار قىزمەتىنىڭ بريفينگىندە ءال-فارابي اتىنداعى قازاق ۇلتتىق ۋنيۆەرسيتەتىنىڭ مەديسينا جانە دەنساۋلىق ساقتاۋ فاكۋلتەتى جوعارى مەديسينا مەكتەبىنىڭ كلينيكالىق ماماندىقتار كافەدراسىنىڭ پروفەسسورى كلارا شالابايەۆا جانە قالانىڭ شتاتتان تىس باس بالالار نەفرولوگى، №2 قالالىق بالالار كلينيكالىق اۋرۋحاناسىنىڭ نەفرولوگيا ءبولىمىنىڭ مەڭگەرۋشىسى ساۋلە الپىسبايەۆا ايتىپ بەردى، دەپ حابارلايدى Almaty-akshamy.kz.
كلارا شالابايەۆانىڭ ايتۋىنشا، بالالاردا ءتىس اۋرۋلارى ءجيى كەزدەسەدى.
«دۇنيەجۇزىلىك دەنساۋلىق ساقتاۋ ۇيىمىنىڭ كريتەرييلەرى بويىنشا، ءبىزدىڭ رەسپۋبليكادا ءارتۇرلى جاس توپتارىنداعى بالالاردا كاريەستىڭ تارالۋى ورتاشا ەسەپپەن 70-85 پايىزدى قۇرايدى، ال قارقىندىلىعى بويىنشا ءبىزدىڭ بالالاردا كاريەستىڭ دەكومپەنساسيالانعان ءتۇرى ءجيى كەزدەسەدى»، - دەدى كلارا شالابايەۆا.
بالالاردىڭ ستوماتولوگيالىق دەنساۋلىعىنىڭ بۇنداي جاعدايىنىڭ سەبەبى – جۇكتىلىكتىڭ پاتولوگيالىق اعىمى، ايەلدىڭ دەنساۋلىعى، جۇكتىلىك كەزىندەگى تەڭگەرىمسىز تاماقتانۋ، ءومىردىڭ ءبىرىنشى جىلىنداعى بالانىڭ اۋرۋى، كىشى جانە مەكتەپ جاسىنداعى ديەتاداعى كومىرسۋلاردىڭ ارتىق بولۋى، اۋىز قۋىسى گيگيەناسىنىڭ ساقتالماۋى.
سونداي-اق سپيكەر ءتىس اۋرۋلارىنىڭ العاشقى پروفيلاكتيكاسى باعدارلاماسىنىڭ جوقتىعى، مەكتەپ جاسىنداعى بالالارعا جوسپارلى تۇردە اۋىز قۋىسىن ساۋىقتىرۋ، جالپى ءبىلىم بەرەتىن مەكتەپتەردەگى ستاسيونارلىق ستوماتولوگيالىق كابينەتتەردىڭ جابىلۋى سياقتى ماڭىزدى الەۋمەتتىك فاكتورلار ءتىس دەنساۋلىعىنىڭ ناشارلاۋىنا اكەلىپ سوقتىراتىنىن اتاپ ءوتتى. رەسپۋبليكاداعى ستوماتولوگيالىق مەكەمەلەردىڭ 80%-دان استامىنىڭ جەكە مەنشىككە ءوتۋى ستوماتولوگيالىق كومەكتى بالالار مەن جاسوسپىرىمدەرگە قولجەتىمسىز ەتتى. ستوماتولوگيالىق قىزمەتتەردىڭ (پلومبالاردىڭ) جوعارى باعاسى اتا-اناسىنىڭ ماتەريالدىق جاعدايى تومەن اۋىلدى جەرلەردە تۇراتىن كوپبالالى وتباسى بالالارىنىڭ اۋىز قۋىسىن جاقسارتۋ مۇمكىندىگىنەن ايىردى.
«اۋىز قۋىسىنىڭ جاعدايى جالپى دەنساۋلىقتىڭ كورسەتكىشى بولىپ تابىلادى. ال ءتىس اۋرۋىن ازايتپاي، دەنى ساۋ بالا ءوسىرۋ مۇمكىن ەمەس»، - دەدى كلاراشالابايەۆا.
№2 قالالىق كلينيكالىق بالالار اۋرۋحاناسىنىڭ نەفرولوگيا بولىمشەسىنىڭ مەڭگەرۋشىسى ساۋلە الپىسبايەۆا بۇگىندە بالالار اراسىندا نەفرولوگيالىق اۋرۋلاردىڭ ءجيى كەزدەسەتىنىن اتاپ ءوتتى. ونىڭ ايتۋىنشا، قىزدار مەن ۇلدارداعى اۋرۋدىڭ 80-85%-ى – ءزار شىعارۋ جولدارىنىڭ ينفەكسياسى.
سپيكەر بارلىق اتا-انالارعا بالالاردا سەبەپسىز تەمپەراتۋرا، ديزۋريا پايدا بولعان كەزدە اۋىرسىنۋمەن، ىسىنۋمەن ءجيى ءزار شىعارۋ نەمەسە بالا از ءزار شىعارا باستاعان جاعدايدا مىندەتتى تۇردە جالپى ءزار ءاناليزىن وتكىزىپ، ۋچاسكەلىك دارىگەرگە نەمەسە نەفرولوگقا جۇگىنۋدى ۇسىندى.
«بۇل اۋرۋلاردىڭ كوبىن وزدىگىنەن جويۋعا بولاتىنىن اتاپ وتكىم كەلەدى. الدىن الۋدىڭ بىرنەشە جولى بار: بالالارعا سۋدى كوپ ءىشۋ، قىزداردى دۇرىس جۋۋ، دۇرىس ءزار شىعارۋ جانە ءىش قاتۋدىڭ الدىن الۋ»، - دەيدى ساۋلە الپىسبايەۆا.