جازعى اپتاپ ىستىق دەنساۋلىققا، اسىرەسە بەلگىلى ءبىر توپتاعى ادامدار ءۇشىن ءقاۋىپتى بولۋى مۇمكىن دەيدى 36-ەمحانانىڭ جالپى تاجىريبەلىك دارىگەرى ايتولقىن تۇرسىنبەك.
ماماننىڭ ايتۋىنشا، تاۋەكەل توبىنا ەگدە جاستاعى ادامدار كىرەدى، ويتكەنى جاس قوسىلعان سايىن دەنەنىڭ تەرمورەگۋلياسيا قابىلەتى تومەندەيدى، بۇل ەگدە جاستاعى ادامداردى ىستىققا وسال ەتەدى. ولاردا جۇرەك-قانتامىر جانە تىنىس الۋ جۇيەسى سياقتى سوزىلمالى اۋرۋلار بولۋى ىقتيمال. بۇل اۋرۋلار جوعارى تەمپەراتۋرا كەزىندە اسقىنۋى مۇمكىن.
بالالار مەن سابيلەر دە ءقاۋىپ توبىنا كىرەدى. دارىگەر اتاپ وتكەندەي، بالالاردا تەرمورەگۋلياسيا مەحانيزمى ءالى تولىق دامىماعان، بۇل ولاردى تەمپەراتۋرانىڭ وزگەرۋىنە سەزىمتال ەتەدى. نارەستەلەر اسىرەسە سۋسىزدانۋ جانە ىستىق سوعۋ قاۋپىنە ءجيى ۇشىرايدى.
بۇل ساناتقا سوزىلمالى اۋرۋلارى بار ادامدار دا كىرەدى. ماسەلەن، جۇرەك-قان تامىرلارى اۋرۋلارى، قانت ديابەتى، تىنىس الۋ ورگاندارىنىڭ اۋرۋلارى جانە باسقا دا سوزىلمالى اۋرۋلارى بار ناۋقاستار ىستىق اۋا رايىندا اسقىنۋ قاۋپىنە كوبىرەك ۇشىرايدى.
- جوعارى تەمپەراتۋرا سيمپتومداردى، جالپى دەنساۋلىقتى ناشارلاتۋى مۇمكىن.
سونداي-اق جۇكتى ايەلدەردە سۋسىزدانۋ جانە سترەسس ءقاۋپى جوعارى بولادى. - جىلۋ انا مەن نارەستە ءۇشىن شارشاۋ، ءىسىنۋ جانە باسقا دا اسقىنۋعا اكەلۋى مۇمكىن.
مامان سىرتتاعى جوعارى تەمپەراتۋرا كەزىندە ساقتالۋى كەرەك ۇسىنىستاردى ءبولىستى.
"سۋدى جەتكىلىكتى مولشەردە ءىشۋ كەرەك، بۇل سۋسىزدانۋدى بولدىرمايدى. دەنە بەلسەندىلىگىن، اسىرەسە وتە ىستىق كەزدە (ادەتتە 11:00-دەن 16:00-گە دەيىن) شەكتەۋ كەرەك. جەڭىل، بوس كيىم كيگەن دۇرىس. قىزىپ كەتۋدى بولدىرماۋ ءۇشىن ماقتا نەمەسە زىعىر سياقتى تابيعي ماتادان جاسالعان كيىم كيىڭىز. تەرىڭىزدى زياندى ۋلتراكۇلگىن ساۋلەلەردەن قورعاۋ ءۇشىن قالپاق، كۇننەن قورعايتىن كوزىلدىرىك جانە جوعارى SPF كرەم جاعىڭىز»، - دەپ كەڭەس بەرەدى ايتولقىن تۇرسىنبەك.
وسى قاراپايىم نۇسقاۋلاردى ورىنداۋ ىستىق سوعۋ جانە جىلۋمەن بايلانىستى باسقا دا اسقىنۋدى بولدىرماۋعا كومەكتەسەدى.