الماتى Condé Nast Traveller كوزىمەن: ءداستۇر مەن زاماناۋيلىقتىڭ ۇيلەسىمى
تانىمال يتالياندىق Condé Nast Traveller جۋرنالى الماتى جايلى كەڭ كولەمدى ماتەريال جاريالادى. ليۋچيا گالليدىڭ ماقالاسى مەن دجاكومو برەسەلدىڭ فوتوسۋرەتتەرى قالانى باي مادەنيەت، تابيعي سۇلۋلىق جانە زاماناۋي ديناميكا ۇيلەسكەن ەرەكشە ساياحات باعىتى رەتىندە تانىستىرادى.
اۆتورلار الماتىنى شىعىس پەن باتىس توعىسقان، ءداستۇر مەن زاماناۋي ترەندتەر ۇيلەسىم تاپقان ورىن رەتىندە سيپاتتايدى.
ماقالادا الماتىنىڭ تاڭعاجايىپ تابيعي كورىنىستەرى ەرەكشە اتالىپ وتكەن: ىلە الاتاۋىنىڭ اسقاق تاۋلارى، التىن ەمەل ۇلتتىق پاركىنىڭ «ءان سالاتىن» قۇم توبەلەرى، سۋ استىنداعى ورمانىمەن ايگىلى قايىڭدى كولى، كولساي كولدەرى جانە بىرەگەي شارىن كانونى. تابيعي مۇرانى پانفيلوۆ كوشەسى، كوك بازار جانە كوك-توبە سەكىلدى قالانىڭ كورىكتى جەرلەرى تولىقتىرادى.
جۋرنال مەگاپوليستىڭ گاسترونوميالىق بايلىعىن دا ەرەكشە اتاپ وتەدى. ءداستۇرلى قازاق تاعامدارىنان باستاپ، جەرگىلىكتى اسحانانى نەونومادتىق ينتەرپرەتاسيادا ۇسىناتىن زاماناۋي مەيرامحانالارعا دەيىن كورسەتىلگەن.
الماتى ماقالادا ءوز مادەني مۇراسىمەن، ساۋلەتىمەن جانە قوناقجايلىلىعىمەن شابىت ىزدەيتىن ءارى جاڭا باعىت اشۋدى جان سۇيەتىن تۋريستەر ءۇشىن تارتىلىس ورتالىعى رەتىندە بەينەلەنگەن.
ايتا كەتەيىك، بۇعان دەيىن الماتىنىڭ تۋريستىك تارتىمدى باعىت ەكەنى جايلى CNN Travel — الەمدەگى ەڭ ءىرى ساياحات جانە تۋريزم تۋرالى اقپارات كوزدەرىنىڭ ءبىرى اۋقىمدى ماقالا جاريالاعان ەدى. بۇل تۋىندىلار الماتىنىڭ ورتالىق ازياداعى ەڭ الەۋەتتى تۋريستىك باعىتتاردىڭ بىرىنە اينالىپ، تابيعي سۇلۋلىعى مەن مادەني ارالۋاندىعىمەن بۇكىل الەمنەن ساياحاتشىلاردى قىزىقتىرىپ جاتقانىن راستايدى.