الماتىدا ALMATY CIRCUS FESTIVAL II حالىقارالىق سيرك ونەرى فەستيۆالى باستالدى.
سيرك مانەجىندە جۇڭگو، جاپونيا، قازاقستان، ارگەنتينا، برازيليا، پورتۋگاليا، يسپانيا، يتاليا، رەسەي، ۆەتنام، بەلارۋس، وزبەكستان، ۋكراينا، ارمەنيا، تاجىكستان، ياكۋتيا، قىرعىزستان جانە ەفيوپيا سياقتى الەمنىڭ 18 ەلىنەن 80-نەن استام ۇزدىك ارتىستەر ونەر كورسەتۋدە، دەپ حابارلايدى aqshamnews.kz
سونىمەن قاتار، فەستيۆال باستالعان كۇنى قازاق مەملەكەتتىك سيركىنىڭ ۇجىمى 54 جىلدىعىن اتاپ وتۋدە. وتكەن جىلى، اراعا 35 جىل سالىپ، سيرك ارتيستەرى الماتى قالاسى اكىمدىگىنىڭ قولداۋىمەن شەتەلگە گاسترولدىك ساپارلارىن قايتا باستادى، جۇڭگو مەن رەسەيدىڭ ۇزدىك سيرك مەكتەپتەرىندە بىلىكتىلىگىن ارتتىرىپ، وقۋدان ءوتتى، ەلدەن تىس جەرلەردە بەدەلدى كونكۋرستار مەن فەستيۆالداردا ماراپاتتارعا يە بولدى. ەندى ەكىنشى جىل قاتارىنان اتى اڭىزعا اينالعان قازاق مەملەكەتتىك سيركى حالىقارالىق فەستيۆال وتكىزۋدە.
«ءبىزدىڭ سيركتىڭ جارتى عاسىردان استام تاريحى بار جانە ونىڭ ءوز فەستيۆالى بولۋى كەرەك. ءبىز ارتيستەرىمىزدىڭ جەتىستىكتەرىن ماقتان تۇتامىز، الماتى سيركى حالىقارالىق ارەنادا بەلسەندى جۇمىس ىستەۋدە. ءقازىر اكىمدىك ايرىقشا قولداۋ كورسەتىپ كەلەدى، بۇعان ءبىز وتە قۋانىشتىمىز. ءبىز ۇلكەن جوسپارلاردى جۇزەگە اسىرا وتىرىپ، مادەني ءتۋريزمدى دامىتۋعا ءوز ۇلەسىمىزدى قوسىپ جاتىرمىز. الماتى تۇرعىندارى مەن قوناقتارى الەمنىڭ ۇزدىك ارتيستەرى ۇسىنعان قويىلىمداردى ءوز كوزدەرىمەن كورۋى ءتيىس»، - دەپ اتاپ ءوتتى قازاق مەملەكەتتىك سيركىنىڭ ديرەكتورى ماقسات جايىقوۆ.
ALMATY CIRCUS FESTIVAL اياسىندا ەكۆيليبريستەر، اكروباتتار، اۋە گيمناستتارى، ارقانمەن جۇرۋشىلەر مەن جونگلەرلەر وزدەرىنىڭ كاسىبيلىگى مەن شەبەرلىگىن كورسەتۋدە. كورەرمەندەردى تاڭ قالدىرىپ، ۇمىتىلماس شوۋ ۇسىنۋ ءۇشىن ارتيستەر ءقاۋىپتى، قىزىقتى ءارى كۇردەلى تريۋكتەردى ورىنداپ جاتىر. قىزىقتى فاكتىلەردىڭ ءبىرى: قىتايدان كەلگەن قاتىسۋشى ۆان مانچەن وزىمەن بىرگە سالماعى ەكى تونناعا جۋىق اۋقىمدى رەكۆيزيتتەردى الىپ كەلگەن. ايتا كەتەيىك، فەستيۆالدە مارينا ستارودۋبوۆا مەن دايانا جەتپىسوۆا «جاڭبىرداعى ۇشۋ» نومىرىمەن، سونداي-اق نۇرىم قۇلەنبايەۆتىڭ جەتەكشىلىگىمەن جونگلەر-ۆيرتۋوزدار قازاقستان اتىنان ونەر كورسەتۋدە.
ايتا كەتەيىك، فەستيۆال 28 شىلدەگە دەيىن جالعاسادى، ال جەڭىمپازدار مەن جۇلدەگەرلەر الماتىدا قالىپ، تامىز ايىنىڭ سوڭىنا دەيىن مەگاپوليس تۇرعىندارى مەن قوناقتارىنا فەستيۆال باعدارلاماسىمەن ونەر كورسەتەدى. قازاق مەملەكەتتىك سيركىنىڭ ءارى ALMATY CIRCUS FESTIVAL قويىلىمدارىنىڭ باس رەجيسسەرى مارينا رەدكو ارتيستەر ناعىز شوۋ جاسايتىنىن ايتتى. باعدارلاما قازاقستان ءۇشىن سيرەك كەزدەسەتىن جانرلارمەن قامتىلعان.
«وتكەن جىلى ءبىرىنشى فەستيۆالدە تىسپەن تريۋك جاساعان نومىرلەر بولدى. ال وسى جىلى ارتيستەر «اياقپەن»، وكشەمەن وتە كۇردەلى تريۋكتار ورىندايدى. ءقازىر جازعى دەمالىس، وسى ۋاقىتتا بالالار مەن ەرەسەكتەر الەمنىڭ ۇزدىك سيرك ارتيستەرى ۇسىنعان قويىلىمداردى تاماشالاعانىن قالايمىن»، - دەپ اتاپ ءوتتى مارينا رەدكو.
جەڭىمپازدار مەن جۇلدەگەرلەردى قازىلار القاسىنىڭ مۇشەلەرى انىقتايدى: جۇڭگو ۇلتتىق اكروباتيكالىق ترۋپپاسىنىڭ پرەزيدەنتى لي چي (جۇڭگو)، سەن-پول-لە-داكستاعى حالىقارالىق سيرك ونەرى فەستيۆالىنىڭ پرەزيدەنتى برۋنو لالوي (فرانسيا)، يتالياداعى حالىقارالىق سيرك ونەرى فەستيۆالىنىڭ پرەزيدەنتى فابيو مونتيكو (يتاليا)، رەسەي مەملەكەتتىك سيرك كومپانياسىنىڭ باس ديرەكتورى سەرگەي بەلياكوۆ (رەسەي)، ۇلكەن ماسكەۋ مەملەكەتتىك سيركى باس ديرەكتورىنىڭ ورىنباسارى تاتيانا زاپاشنايا (رەسەي)، Cirque d'Hiver Bouglione باس ديرەكتورى ودەتتا بۋگليون (فرانسيا)، «Armonı Organızasyon» باس ديرەكتورى احمەت ەكششي (تۇركيا)، استانالىق سيركتىڭ باس ديرەكتورى ەرىك جولجاقسىنوۆ (قازاقستان)، MegaArt جانە JNT پروديۋسەرلىك كومپانياسىنىڭ ديرەكتورى ميحايل مۋشۋلوۆ (گرۋزيا)، تاجىك مەملەكەتتىك سيركىنىڭ باس ديرەكتورى باحتيەر راحماتۋللوزودا (تاجىكستان)، ALMATY CIRCUS FESTIVAL باس قويۋشى-رەجيسسەرى مارينا رەدكو (قازاقستان)، سونداي-اق قازىلار القاسىنىڭ ءتوراعاسى - قازاق مەملەكەتتىك سيركىنىڭ ديرەكتورى ماقسات جايىقوۆ (قازاقستان).