«الماتى – ءبىزدىڭ ورتاق ءۇيىمىز» جالپىقالالىق ناۋقانىنا قالا تۇرعىندارى، ەكوبەلسەندىلەر، ەسترادا، سپورت جۇلدىزدارى، كاسىپكەرلەر، ەرىكتىلەر جانە ت.ب. ۇزىن-ىرعاسى 409 203 ادام اتسالىستى. ولار ءتۇرلى اكسيالارعا، كۆەستتەرگە، فلەشموبتارعا قاتىستى، دەپ حابارلايدى اlmaty-akshamy.kz.
بىرنەشە اكسيا حالىق اراسىندا ۇلكەن قىزىعۋشىلىق تۋدىردى. سونىڭ ءبىرى «قورشاۋىڭدى/ ورىندىعىڭدى/ بەسەدكاڭدى بويا» بويىنشا قالا تۇرعىندارىنا 4 240 ل بوياۋ جانە 590 ل ەرىتكىش بەرىلدى. ءىس-شارا ءۇي ماڭىنداعى اۋماقتىڭ ەستەتيكالىق مازمۇنىن جانە جەكە تۇرعىن ۇيلەردىڭ قورشاۋىن جاقسارتۋعا باعىتتالعان. اكسياعا قاتىسقىسى كەلەتىندەرگە لاك-بوياۋ ماتەريالدارى تەگىن بەرىلدى.
2 300 كگ قايتا وڭدەۋگە ارنالعان ماتەريالدى تۇرعىندار سىيلىق كۋپونىنا ايىرباستاۋ ارقىلى قايتالاما شيكىزاتتى (پلاستيكالىق بوتەلكە، ماكۋلاتۋرا، اليۋمينيي بانكا، ءمولدىر شىنى) جيناۋدى ىنتالاندىرۋعا باعىتتالعان «قوقىستى تاماققا ايىرباستا» اكسياسى اياسىندا جينادى. بارلىعى 11 قابىلداۋ پۋنكتى جۇمىلدىرىلدى، اكسياعا قاتىسۋشىلارعا 1 867 ازىق-تۇلىك كۋپونى بەرىلدى.
ەكولوگيالىق مادەنيەتتى قالىپتاستىرۋ ماقساتىندا بيىل 3 مامىردا ارباتتا تەحنيكالىق رەجيمدە پلاستيكالىق بوتەلكە مەن سۋسىننان اليۋمينيي بانكالاردى قابىلداۋ بويىنشا العاشقى فاندومات ورناتىلدى. جينالعان قايتالاما وڭدەلەتىن شيكىزاتتى پايدالى تاۋارلار وندىرەتىن كاسىپورىندارعا قايتا وڭدەۋگە بەرىلەدى. ونىڭ ورنىنا تۇرعىندار اقشالاي تۇردە بونۋستار الا الادى نەمەسە ولاردى قايىرىمدىلىق ماقساتقا بەرە الادى.
ناۋقان اياسىندا «تازا قاسبەتتەر» اكسياسى ءوتىپ، عيماراتتاردىڭ ىرگەلەس اۋماقتارى تازالاندى، تەرەزەلەر مەن ۆيتراجدار جۋىلدى، ماڭدايشالار مەن بيلبوردتار رەتكە كەلتىرىلدى. اكسياعا 1 600-دەن استام كوممەرسيالىق ۇيىم – ءىرى ساۋدا-ويىن-ساۋىق ورتالىقتارى، بيزنەس-ورتالىقتار، قوناق ۇيلەر، بازارلار، سۋپەرماركەتتەر، ءدارىحانالار، ازىق-تۇلىك دۇكەندەرى جانە ت.ب. قاتىستى.
ەستەرىڭىزگە سالا كەتەيىك، مەملەكەت باسشىسىنىڭ تاپسىرماسىمەن ەلدى مەكەندەردىڭ اۋماعىن اباتتاندىرۋ جانە كوگالداندىرۋ تۋرالى «تازا قازاقستان» اكسياسى اياسىندا الماتى قالاسى اكىمدىگى 2024 جىلعى 8 ءساۋىر مەن 8 مامىر ارالىعىندا «الماتى – ءبىزدىڭ ورتاق ءۇيىمىز» ناۋقانىن وتكىزدى. ناۋقاننىڭ نەگىزگى ماقساتى - قالالىق ينفراقۇرىلىمعا ۇقىپتى قاراۋ قۇندىلىعىن قالىپتاستىرۋ، حالىق اراسىندا جوعارى ازاماتتىق جاۋاپكەرشىلىك پەن ەكولوگيالىق مادەنيەتتى تاربيەلەۋ. «الماتى – ءبىزدىڭ ورتاق ءۇيىمىز» ناۋقانى اياسىندا وتكىزىلگەن بارلىق ءىس-شارا ۇزاق مەرزىمدى ءارى جالعاسىن تابادى.