الماتىدا «تازا قازاقستان» رەسپۋبليكالىق باعدارلاماسى اياسىندا كەڭ اۋقىمدى ەكولوگيالىق «الماتى – ءبىزدىڭ ورتاق ءۇيىمىز» ناۋقانى باستالدى، دەپ حابارلايدى aqshamnews.kz
ناۋرىز ايىنىڭ العاشقى ونكۇندىگى «تازا كوشەلەر» دەگەن اتاۋمەن ءوتىپ جاتىر. بۇل كەزەڭ جول جابىنىن، قوعامدىق كولىك ايالدامالارىن تازالاۋعا، جول بەلگىلەرىن جۋىپ-شايۋعا، قوسىمشا قوقىس جاشىكتەرىن ورناتۋعا جانە قالانىڭ نەگىزگى كوشەلەرىن كوركەيتۋگە ارنالعان.
ناۋقان بارىسىندا جۇمىسشىلار سولتۇستىك اينالما جولىنىڭ بويىن تازارتىپ جاتىر. جۇمىسشى اسقار الدابەرگەنوۆتىڭ ايتۋىنشا، جۇمىس رىسقۇلوۆ كوشەسىنەن باستالىپ، اينابۇلاق شاعىن اۋدانىنا قاراي جالعاسۋدا.
«قىزمەتكەرلەر قىس كەزىندە جولعا سەبىلگەن قۇم مەن باسقا دا قوقىستاردى جيناپ جاتىر. ءبىزدىڭ قولىمىزدا فرونتالدى تيەگىش، ساموسۆال جانە شاڭسورعىش كولىك بار. جۇمىسشىلار نەگىزگى قوقىستى جيناعاننان كەيىن شاڭسورعىش ۇساق قالدىقتاردى تازالايدى. مەن وسى سالادا 15 جىلدان بەرى جۇمىس ىستەيمىن. قىس بىتكەسىن قار استىندا قالعان قالدىقتاردى جينايمىز، ال كوكتەمدە ساياباقتار مەن گۇلزارلاردى رەتكە كەلتىرەمىز. جىل مەزگىلدەرىنە قاراي تازالىق جۇمىستارىن جۇيەلى تۇردە جۇرگىزەمىز»، – دەيدى ول.
«تازا كوشەلەر» ناۋقانى اياسىندا 180 جۇمىسشى جانە 60 بىرلىك ارنايى تەحنيكا جۇمىلدىرىلدى، ماگيسترالدىق كوشەلەر عانا ەمەس، ولارعا ىرگەلەس جاتقان ساياباقتار، گۇلزارلار، ارىق جۇيەلەرى تازارتىلۋدا. اۋلالاردا «قاسبەتتەن قاسبەتكە دەيىن» قاعيداتى بويىنشا تازالىق جۇمىستارى قولعا الىنعان.
بۇعان قوسا، كورىكتەندىرۋ ءتولقۇجاتى ەنگىزىلىپ جاتىر. اۋدان اكىمدىگى قىزمەتكەرلەرى كاسىپكەرلەر مەن مەنشىك يەلەرىن ارالاپ، كورىكتەندىرۋ ءتولقۇجاتىنا قول قويۋ قاجەتتىگىن تۇسىندىرۋدە. بۇل ايماعىن تازا ۇستاۋعا دەگەن جاۋاپكەرشىلىكتى ارتتىرادى.
جولدى شۇڭقىرلى جوندەۋ جۇمىستارى دا جۇرگىزىلىپ جاتىر. ويىقتى، شۇڭقىردى قالپىنا كەلتىرۋ، اپاتتى جاعدايداعى ارىقتار مەن جيەكتاستاردى اۋىستىرۋ جۇمىستارى باستالدى.
ەسكە سالساق، 1 ناۋرىزدان 1 ساۋىرگە دەيىن 4 كەزەڭگە بولىنگەن «الماتى – ءبىزدىڭ ورتاق ءۇيىمىز» ناۋقانى ءوتىپ جاتىر.
- «تازا كوشەلەر» (1-9 ناۋرىز) – ايالدامالار مەن جول بەلگىلەرىن جۋۋ، قوقىس جاشىكتەرىن ورناتۋ، ماگيسترالدى كوشەلەردى كوركەيتۋ.
- «تازا ساياباقتار، سكۆەرلەر جانە تاۋلار» (10-16 ناۋرىز) – تابيعي ايماقتاردا سەنبىلىكتەر وتكىزۋ، قوقىس جيناۋ شارالارى.
- «تازا اۋلالار» (17-23 ناۋرىز) – اۋلالاردى، بالالار جانە سپورت الاڭدارىن تازالاۋ، بوياۋ، كوگالداندىرۋ، «ۇزدىك اۋلا/اۋلا سىپىرۋشىسى/گۇلزار» بايقاۋلارى.
- «ءبىزدىڭ قالا – ءبىزدىڭ ماقتانىشىمىز» (24 ناۋرىز – 1 ءساۋىر) – ەسكەرتكىشتەردى كوركەيتۋ جانە جاپپاي اعاش وتىرعىزۋ.