الماتى اۆتوبۋستارىنىڭ بىرىندە ايفوندى قولدى قىلعان قالتا ۇرىسى قولعا ءتۇستى

الماتىنىڭ ءتارتىپ ساقشىلارى قوعامدىق كولىكتە ۇرلىق جاساعان جىگىتتى ۇستادى. 

اۋەزوۆ اۋداندىق پب-نىڭ پوليسيا قىزمەتكەرلەرىنىڭ دەرەگىنشە،  قالتا ۇرلىعىمەن اينالىسقان 27 جاستاعى ازامات ەكەنى بەلگىلى بولدى. پوليسەيلەردىڭ ايتۋىنشا، 1996 جىلى تۋعان ج. ەسىمدى ازامات، 118-باعىتتاعى قوعامدىق كولىكتە ساين كوشەسى مەن رايىمبەك داڭعىلىنىڭ قيىلىسىندا، IPhone تەلەفونىن ۇرلاپ كەتكەن، ناتيجەسىندە 300 مىڭ تەڭگە ماتەريالدىق شىعىن كەلتىرگەن، دەپ حابارلايدى Almaty-akshamy.kz Polisia.kz-كە سىلتەمە جاساپ. 

«ءبىزدىڭ بولىمشەنىڭ ارنايى توبى مەن اۋەزوۆ اۋداندىق پب-نىڭ قىزمەتكەرلەرى جۇرگىزگەن جەدەل ىزدەستىرۋ ءىس-شارالارىنىڭ ناتيجەسىندە كۇدىكتى ۇستالدى. اتالعان دەرەك ق ر قك-نىڭ 188-بابى (ۇرلىق) بويىنشا سوتقا دەيىنگى تەرگەۋدىڭ ءبىرىڭعاي تىزىلىمىنە تىركەلدى. كۇدىكتى بۇرىن دا وسىعان ۇقساس قىلمىستار ءۇشىن سوتتى بولعان. ءقازىر كۇدىكتىنىڭ قالادا بۇرىن دا جاسالعان وسىنداي قىلمىستارعا قاتىسى بار-جوعى انىقتالىىپ جاتىر. ۇستالعان ازامات ۋاقىتشا ۇستاۋ يزولياتورىنا قامالدى»، – دەدى الماتى قالالىق پد كريمينالدىق پوليسيا باسقارماسىنىڭ باستىعى قۋاتبەك ناۋاتوۆ.

سونىمەن قاتار، اۋەزوۆ اۋداندىق پوليسياسى، بيىلعى جىلدىڭ باسىنان بەرى اۋەزوۆ اۋدانىندا 19 قالتا ۇرلىعى تىركەلگەنىن حابارلادى. نەگىزىنەن، ۇرىلار قوعامدىق كولىكتەردىڭ ىشىندە ادام كوپ جينالعان ۋاقىتتا جۇرەدى.

«ءبىزدىڭ بولىمشە قىزمەتكەرلەرى قالتا ۇرىلارىنىڭ الدىن الۋ ماقساتىندا ارنايى ناۋقان وتكىزىپ، ەسكەرتۋ پلاكاتتارىن ءىلدى جانە ارنايى بۋكلەتتەر تاراتتى. ادەتتە، قالتا ۇرىلارى نەگىزگى جولاۋشىلار اعىنى بولاتىن تاڭەرتەڭگى جانە كەشكى ۋاقىتتا ايالدامالار مەن قوعامدىق كولىك باعىتتارىندا ۇرلىق جاساپ جۇرەدى. ولاردىڭ قۇرباندارى كوبىنەسە ايەلدەر مەن قارت ادامدار بولادى. مۇنداي ناۋقاندى وتكىزۋدىڭ ماڭىزدىلىعىن قالا تۇرعىندارى جوعارى باعالاپ، قوعامدىق ورىنداردا قىراعىلىق قاجەتتىگىن اتاپ ءوتتى»، – دەدى اۋەزوۆ اۋداندىق پوليسيا باسقارماسىنىڭ باستىعى ۇلان ءابىلقايىر.