ونىڭ ىشىندە 50 بالا ەمدەلىپ جاتىر.
الماتىدا ءبىر تاۋلىكتە 580 ادام كوروناۆيرۋس جۇقتىردى. ونىڭ 534ء-ى سيمپتومدىق بەلگىلەرمەن جانە 46-سى سيمپتومسىز، دەپ حابارلادى Almaty-akshamy.kz.
جازىلىپ شىققاندار سانى 160 بولسا، 72 ادام اۋرۋحاناعا جاڭادان ءتۇستى. 3 310 توسەك-ورنى بار ينفەكسيالىق ستاسيونارلاردا 932 ادام، ونىڭ ىشىندە 50 بالا ەمدەلىپ جاتىر. جالپى رەانيماسيا جانە قارقىندى تەراپيا بولىمشەسىندە 78 ادام جاتىر. 20 ناۋقاس جاساندى تىنىس الۋ اپپاراتىنا قوسىلعان.
«ءينۆازيۆتى ەمەس جاساندى تىنىس الۋ اپپاراتىندا 24 ادام ەم قابىلداۋدى جالعاستىرۋدا. High flow-دا 18 اپپارات جۇمىس ىستەيدى»،- دەلىنگەن الماتى قالالىق قوعامدىق دەنساۋلىق ساقتاۋ باسقارماسىنىڭ باسپا ءسوز قىزمەتىنىڭ حابارلاماسىندا.
مەديسينالىق-سانيتارلىق العاشقى كومەك ءموبيلدى بريگادالارىنىڭ جانە تەلەمەديسينا ورتالىعىنىڭ امبۋلاتوريالىق باقىلاۋىندا 3 668 پاسيەنت بار. ونىڭ ىشىندە جەڭىل جانە ورتاشا اۋىر جاعدايدا 3 431 ناۋقاس، سيمپتومسىز 237 ناۋقاس بار.