اۋەجاي پرەزيدەنتى الپ ەر تۋنگا ەرسوي ءجيى شاعىم تۇسەتىن باستى ماسەلەلەردىڭ ءبىرى – كولىك كەپتەلىسى قالاي شەشىلەتىنىن ايتىپ ءوتتى، دەپ حابارلايدى اlmaty-akshamy.kz.
وكىنىشكە وراي، ءقازىر كولىكتەر اۋەجايعا مايلين كوشەسىنەن كىرەدى جانە وسى كوشەدەن شىعادى. بۇل اۋەجايعا كىرۋ جانە شىعۋ كەزىندە كەپتەلىس تۋدىرادى. الايدا ءبىز ءقازىر قالا اكىمدىگىمەن تىعىز جۇمىس ىستەپ جاتىرمىز. ءبىز كولىكتەر احمەتوۆ كوشەسىنەن كىرىپ، ال مايلين كوشەسىنەن شىعاتىنداي جولداردى وزگەرتۋ جونىندە ۇسىنىس جاسادىق. بۇل ماسەلە ءقازىر ۋربانيستەرمەن دە، اكىمدىكپەن دە بىرلەسىپ پىسىقتالۋدا. شەشىم قابىلدانعاننان كەيىن ءبىز قوسىمشا حابارلايمىز، – دەدى الپ ەر تۋنگا ەرسوي.
سونداي-اق ونىڭ ايتۋىنشا، بۇگىندە الماتى اۋەجايىنىڭ اۋماعىنا كۇن سايىن 16 مىڭعا دەيىن اۆتوكولىك كەلەدى. ولاردىڭ 65%-ى جولاۋشىلار اكەلەتىن نە الىپ كەتەتىن كولىكتەر.
ءبىز جولاۋشىلاردى ءتۇسىرۋ جانە وتىرعىزۋعا ارنالعان قوسىمشا جولاق جاسادىق. ءبىراق، جۇرگىزۋشىلەردىڭ كوپشىلىگى، اسىرەسە قاربالاس ۋاقىتتا، اۋەجاي ايماعىنداعى ەرەجەلەردى ساقتامايدى. ولار كولىكتى جولدىڭ ورتاسىندا قالدىرىپ كەتەدى نەمەسە جول ورتاسىنا توقتاپ، ادامداردى تۇسىرەدى. بۇل قوسىمشا كەپتەلىستىڭ قالىپتاسۋىنا اسەر ەتەدى. ال جاڭا تەرمينالعا كەلەتىن بولساق، ونى ىسكە قوسقاننان كەيىن بىزدە كولىكتەرگە ارنالعان ءۇش قوسىمشا جول جەلىسى جانە 1200 ورىندىق اۆتوتۇراق بولادى، – دەپ اتاپ ءوتتى اۋە ايلاعىنىڭ باسشىسى.