الماتى اۋەجايىندا حالىقارالىق رەيس بارىسىندا قوعامدىق ءتارتىپتى بۇزعان جولاۋشى ۇستالدى.
28 مامىر كۇنى سەۋل–الماتى باعىتىنداعى اۋە رەيسىندە تۇركىستان وبلىسىنىڭ 23 جاستاعى تۇرعىنى ۇشۋ كەزىندە تارتىپكە باعىنباي، ۇشاق بورتىندا بەيادەپ سوزدەر ايتىپ، ەكيپاج مۇشەلەرىنىڭ زاڭدى تالاپتارىن ورىنداۋدان باس تارتقان، دەپ حابارلايدى aqshamnews.kz.
Polisia.kz مالىمەتىنشە، جولاۋشى دورەكى ىس-ارەكەتىن ۇشاق قونعاننان كەيىن، الماتى اۋەجايىنداعى جەلىلىك پوليسيا ءبولىمىنىڭ قىزمەتكەرلەرى ارالاسقان سوڭ عانا قويعان.
ول قولدانىستاعى زاڭناماعا سايكەس ۇستالىپ، جاۋاپقا تارتىلدى. اۋە كومپانياسى وكىلدەرى قۇقىق بۇزۋشىنىڭ ارەكەتتەرىن ارنايى اكتىمەن راسىمدەدى. ناتيجەسىندە ازاماتشاعا قاتىستى شارا قولدانىلدى. كولىكتەگى پوليسيا دەپارتامەنتىنىڭ دەرەگىنشە، جىل باسىنان بەرى اۋە رەيستەرى كەزىندە جاسالعان ءتۇرلى قۇقىقبۇزۋشىلىقتار بويىنشا 207 ادام جاۋاپقا تارتىلعان.
ولاردىڭ ىشىندە 127 جاعداي – قوعامدىق ورىنداردا ماس كۇيىندە بولۋ جانە ىشىمدىك ءىشۋ، 50 – ۇشاقتا تەمەكى شەگۋ، 13 – ۇساق بۇزاقىلىق، قالعاندارى – وزگە دە ءتارتىپ بۇزۋشىلىقتار. پوليسيا جولاۋشىلاردان ۇشۋ كەزىندە ەكيپاجدىڭ تالاپتارىن مۇلتىكسىز ورىنداۋدى جانە بورتتاعى ءتارتىپ ەرەجەلەرىن ساقتاۋدى سۇرايدى، ويتكەنى مۇنداي ارەكەتتەر بۇكىل رەيستىڭ قاۋىپسىزدىگىنە ءقاۋىپ ءتوندىرۋى مۇمكىن.