بۇدان بۇرىن جاڭا جولاۋشىلار تەرمينالىنىڭ اشىلۋى قارساڭىندا قازاقستان رەسپۋبليكاسىنىڭ پرەزيدەنتى قاسىم-جومارت كەمەل ۇلى توقايەۆتىڭ قاتىسقانىن حابارلاعانبىز.
2024 جىلدىڭ 31 مامىرىندا الماتى اۋەجايى جاڭا حالىقارالىق تەرمينالدىڭ اشىلۋىنا بايلانىستى جولاۋشىلارعا ۇندەۋ جاسادى، دەپ حابارلايدى Almaty-akshamy.kz اۋە ايلاعىنىڭ باسپا ءسوز قىزمەتىنە سىلتەمە جاساپ.
"الماتى حالىقارالىق اۋەجايى 2024 جىلدىڭ 1 ماۋسىمىندا جاڭا حالىقارالىق جولاۋشىلار تەرمينالىندا العاشقى قوناقتاردى قارسى الاتىنىن قۋانا حابارلايدى"، - دەپ جازىلعان رەسمي اقپاراتتا.
2024 جىلعى 31 مامىردا جاڭا جولاۋشىلار تەرمينالىنىڭ اشىلۋى قارساڭىندا قازاقستان رەسپۋبليكاسىنىڭ پرەزيدەنتى قاسىم-جومارت كەمەل ۇلى توقايەۆ الماتى حالىقارالىق اۋەجايىندا بولدى.
"حالىقارالىق الماتى اۋەجايى" اق پرەزيدەنتى الپ ەر تۋنگا ەرسوي سەيسميكالىق جانە ءورت قاۋىپسىزدىگى تالاپتارىن ساقتاي وتىرىپ سالىنعان حالىقارالىق تەرمينال 10 باللدىق جەر سىلكىنىسىنە توتەپ بەرە الاتىنىن حابارلادى. جالپى اۋدانى 53،5 مىڭ شارشى مەتردى قۇرايدى. جاڭا تەرمينالدا 50 تىركەۋ ورنى ورناتىلىپ، زاماناۋي قۇرال-جابدىقتار ساتىپ الىندى. قولدانىستاعى تەرمينالدى جوندەۋدى ەسكەرە وتىرىپ، اۋەجايدىڭ جالپى وتكىزۋ قابىلەتى جىلىنا 14 ملن جولاۋشىعا دەيىن ارتاتىن بولادى.
بارلىق حالىقارالىق رەيستەر جاڭا تەرمينالعا تولىق اۋىستىرىلعاننان كەيىن ەسكى تەرمينال ىشكى رەيستەر ءۇشىن پايدالانىلاتىن بولادى. سونداي-اق، قولدانىستاعى تەرمينالدىڭ حالىقارالىق ستاندارتتارعا تولىق سايكەس بولۋى ءۇشىن جوندەۋ جۇمىستارى جۇرگىزىلەدى.
جاڭا حالىقارالىق جولاۋشىلار تەرمينالى بويىنشا جوباعا 200 ملن. دوللاردان استام ينۆەستيسيا سالىندى. تەرمينالدىڭ قولدانىستاعى عيماراتىنا جانە اۋەجايدىڭ ينفراقۇرىلىمىن دامىتۋعا الداعى ۋاقىتتا كوپ ينۆەستيسيالار تارتۋ جوسپارلانىپ وتىر.
بارلىق حالىقارالىق رەيستەر جاڭا تەرمينالعا اۋىستىرىلىسىمەن اعىمداعى تەرمينالدى جوندەۋ جۇمىستارى باستالادى.
اۋەجايدىڭ جاڭا تەرمينالى ورتالىق ازيادا "Excellence in Design for Greater Efficiencies (EDGE)" باعدارلاماسى بويىنشا سەرتيفيكاتتالعان ءبىرىنشى تەرمينال بولادى. قۇرىلىستا حالىقارالىق ازاماتتىق اۆياسيا ۇيىمىنىڭ ۇسىنىمدارىنا سايكەس جوعارى ساپالى وقشاۋلاۋ ماتەريالدارىن، سۋ ۇنەمدەۋ جابدىقتارىن جانە پارنيكتىك گازدار شىعارىندىلارىن، شۋدى، جارىقتى، قالدىقتاردى جانە اۋانىڭ لاستانۋىن تومەندەتۋدىڭ وزىق ادىستەرىن پايدالانۋ ەسەبىنەن رەسۋرس تيىمدىلىگى بولىگىندە حالىقارالىق تاجىريبە پايدالانىلدى.
جاڭا تەرمينالدا جولاۋشىلارعا قولايلى جاعداي جاساۋ ءۇشىن ءار قاباتتا انا مەن بالا بولمەلەرى، مۇمكىندىگى شەكتەۋلى جاندارعا قاجەتتى جاعدايلار، بالالارعا ارنالعان ويىن الاڭى، سونداي-اق دەمالىس بولمەلەرى، سو-working ايماعى، VR بولمە، ءۇي جانۋارلارىنا ارنالعان دارەتحانا سياقتى قوسىمشا جاعدايلار قاراستىرىلعان. سونىمەن قاتار، جاقىندا جاڭا تەرمينالدا قازاقستان اۆياسياسىنىڭ مۇراجايى اشىلاتىن بولادى.
جاڭا تەرمينال ەسكىمەن جەر ءۇستى وتكەلى ارقىلى قوسىلعان. جاڭا ءۇي-جاي جولاۋشىلارعا ىشكى جانە حالىقارالىق رەيستەردەن عيماراتتان شىقپاستان اۋىسىپ وتىرۋ ءۇشىن جەڭىل قولجەتىمدىلىكتى قامتاماسىز ەتەدى.
جولاۋشىلاردى قازىرگى زامانعى جانە ىڭعايلى جاعدايلارمەن قامتاماسىز ەتۋ ءۇشىن شەكارالىق قىزمەت جەلىسى بويىنشا جاڭا تەرمينالدا ۇشىپ كەتۋ ايماعىندا 20 كابينا، ۇشىپ كەلۋ ايماعىندا 32 كابينا، قازاقستان رەسپۋبليكاسىنىڭ ازاماتتارى ءۇشىن ۇشىپ كەتۋ-ۇشىپ كەلۋ ايماعىندا اۆتوماتتاندىرىلعان وتكىزۋ جۇيەسى بويىنشا 4 بىرلىك جابدىق، 4 باگاج تاسپاسى، جولاۋشىلاردىڭ ىڭعايلى ناۆيگاسياسى ءۇشىن ينفوكيوسكالار ورناتىلعان.
جاڭا تەرمينالدىڭ تەلەسكوپيالىق تراپتارى بورتتىڭ كولەمىنە بايلانىستى ءبىر مەزگىلدە جەتى ۇشاققا دەيىن قابىلداي الادى.