وڭىرلىك كوممۋنيكاسيالار قىزمەتىنىڭ الاڭىندا 2025 جىلدىڭ العاشقى التى ايىنداعى ەكولوگيا دەپارتامەنتىنىڭ جۇمىس قورىتىندىسىنا ارنالعان باسپا ءسوز كونفەرەنسياسى بولىپ ءوتتى.
دەپارتامەنت باسشىسىنىڭ ورىنباسارى دىنمۇحامەد لەسبەكوۆ قالا ەكولوگياسىن جاقسارتۋ باعىتىندا جۇرگىزىلگەن ءىس-شارالاردى، كاسىپورىندارداعى باقىلاۋ مەن ەكولوگيالىق ماسەلەلەرگە قاتىستى جول كارتاسىنىڭ قالاي جۇزەگە اسىپ جاتقانىن بايانداپ بەردى.
سپيكەردىڭ ايتۋىنشا، دەپارتامەنتكە ەكولوگيالىق رۇقساتنامالار الۋ ءۇشىن 103 ءوتىنىش تۇسكەن، ونىڭ 87ء-سى وڭدەلگەن. ءبىرىنشى كاتەگورياداعى نىساندار، ونىڭ ىشىندە «الەس» اكسيونەرلىك قوعامى مەن ءىرى ونەركاسىپتىك كاسىپورىندار قورشاعان ورتانى قورعاۋعا 543 ميلليون تەڭگەدەن اسا قارجى جۇمساعان. 1 جەو-دا كومىرقىشقىل گازى مەن ازوت وكسيدتەرىنەن بولىنەتىن زياندى زاتتىڭ كولەمى ازايىپ، باسقا ستانسياداعى شاڭ-گازدى تازارتۋ قوندىرعىلارى جوندەۋدەن ءوتىپ، سۋدى شىعىنداۋ مەن لاستانۋدى جاعىن دا ازايتۋ كوزدەلگەن.
وسى كەزەڭدە مەملەكەتتىك ەكولوگيالىق ينسپەكتورلار 49 تەكسەرۋ جۇرگىزىپ، ونىڭ 16-سى جوسپاردان تىس تەكسەرۋ بولدى. سونىڭ ارقاسىندا 28 اكىمشىلىك قۇقىق بۇزۋشىلىق تۋرالى حاتتاما تولتىرىلىپ، 23 ايىپپۇل سالىنىپتى.
ساراپامالىق باقىلاۋ ءبولىمىنىڭ زەرتحاناسى الماتى قالاسىنىڭ اۋاسى مەن سۋ كوزدەرىندەگى لاستانۋى ارتقانىن انىقتامادى. وندىرىستىك شىعارىندىلار، اعىندى سۋلار، توپىراق ساپاسى مەن اۆتوكولىكتىڭ تەكسەرىسى بويىنشا تۇراقتى مونيتورينگ جۇرگىزىلىپ جاتىر. 2024 جىلعى وسى ۋاقىتپەن سالىستىرعاندا زاڭ بۇزۋشىلىق سانى، اسىرەسە ديزەلدى كولىكتەر بويىنشا ەداۋىر ازايعان.
الماتىنىڭ ەكولوگياسىن وڭالتۋدى كوزدەيتىن جول كارتاسى تەس-تىڭ زياندى اسەرىن ازايتۋدان باستاپ، جاسىل جەلەكتەردى نىعايتۋ مەن قالدىقتاردى باسقارۋعا دەيىنگى جەتى باعىتتى قامتيدى. ءقازىر بۇلار بىرتىندەپ قولعا الىنا باستادى. مىسالى، 2024–2028 جىلعا ارنالعان كوممۋنالدىق قالدىقتاردى باسقارۋ باعدارلاماسى كەلىسىلىپ جاتىر.
الماتى قالاسىنداعى ەكولوگيالىق جاعداي جۇيەلى ءتاسىلدى تالاپ ەتەدى. تابيعات پايدالانۋشىلارىمەن بىرلەسىپ جۇمىس ىستەپ، ۇزبەي زەرتحانالىق باقىلاۋ جاساپ، زاڭ بۇزۋشىلىققا جاۋاپكەرشىلىكتى كۇشەيتە تۇسسە، ەكولوگيانى جاقسارتۋعا سەپ بولاتىنىن ايتادى دەپارتامەنت وكىلدەرى.