ەندى اتا-انا مەكتەپتەگى ءمازىردى ونلاين قاراي الادى

مەملەكەتتىك قولداۋ شارالارىنىڭ نىسانالى ءارى اشىق بولۋىن قامتاماسىز ەتۋ ءۇشىن پيلوتتىق رەجيمدە "الەۋمەتتىك ءاميان" جوباسى ەنگىزىلدى، دەپ حابارلايدى aqshamnews.kz

بۇل تۋرالى سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى جاسلان مادييەۆ مالىمدەدى.

ءمينيستردىڭ ايتۋىنشا، جوباداعى العاشقى باعىت – وقۋشىلاردى تەگىن جانە جەڭىلدەتىلگەن تاماقپەن قامتاماسىز ەتۋ.

6 943 مەملەكەتتىك ورتا ءبىلىم بەرۋ مەكتەبىنىڭ ىشىندە قازىرگى تاڭدا 2 369 مەكتەپ زاماناۋي اۆتوماتتاندىرىلعان باقىلاۋ پۋنكتتەرىمەن (ابپ) تولىق جابدىقتالدى. ال 3 950 مەكتەپتە، جوبالىق قۋاتتىلىقتى ەسكەرە وتىرىپ، “بيزنەس ءاميان” ەنگىزىلدى. بۇل وقۋشىلارعا ىستىق تاماق جەتكىزىلۋىن ەسەپكە الۋ جانە باقىلاۋ ءۇشىن ەنگىزىلگەن ارنايى قوسىمشا، – دەيدى جاسلان مادييەۆ.

مادييەۆ اتاپ وتكەندەي، eGov Mobile قوسىمشاسىنداعى "الەۋمەتتىك ءاميان" سەرۆيسى ارقىلى اتا-انالار بالاسىنىڭ ىستىق تاماق العانىن ناقتى ۋاقىت رەجيمىندە تەكسەرىپ، ءمازىردى كورە الادى جانە پىكىر قالدىرا الادى.

بولاشاقتا جوبا مىنا باعىتتاردى قامتيدى:

• مەكتەپكە دەيىنگى، ورتا جانە قوسىمشا ءبىلىم بەرۋ قىزمەتتەرى؛
• لاگەرلەرگە جولدامالار؛
• جاتاقحانالارداعى ورىندار جانە مەملەكەتتىك قولداۋدىڭ باسقا دا تۇرلەرى.