الماتىدا ازيا-تىنىق مۇحيتى ايماعىن دامىتۋدىڭ قارجى ينستيتۋتتارى قاۋىمداستىعىنىڭ 46-شى جىل سايىنعى كەزدەسۋى ءوتىپ جاتىر.
بۇگىندە مۇندا 40 ەلدەن 150-دەن استام حالىقارالىق دامۋ ينستيتۋتتارىنىڭ كوشباسشىلارى قاتىسىپ وتىر. جيىنعا قاتىسقان الماتى اكىمى بۇل ءبىزدىڭ مەگاپوليس ءۇشىن ماڭىزدى وقيعا دەپ اتاپ ءوتتى.
«الماتى العاش رەت دامۋ ينستيتۋتتارىن وسىنداي كەڭ اۋقىمدا قابىلداۋدا. قازاقستان 2006 جىلدان باستاپ ەۋروپالىق دامۋ بانكىنىڭ (ەدب) قۇرىلتايشىلارىنىڭ ءبىرى بولىپ تابىلادى. بيىل ءبىز ەۋروپالىق دامۋ بانكىندەگى (ەدب) ۇلەسىمىزدى 32،99%-دان 37،29%-عا دەيىن ارتتىردىق. قازىرگى ۋاقىتتا ءبىز ەۋروپالىق دامۋ بانكىمەن (ەدب) بىرلەسىپ الماتىدا جىلۋ ەلەكتر ورتالىعىن مودەرنيزاسيالاۋ، الماتى اۋەجايىنىڭ جاڭا حالىقارالىق تەرمينالىن جانە ۇلكەن الماتى اينالما اۆتوجولىن (ءۇاااج) سالۋ سياقتى ماڭىزدى جوبالاردى ىسكە اسىرىپ جاتىرمىز»، - دەدى الماتى اكىمى ەربولات دوسايەۆ.
الماتى – قازاقستاننىڭ مادەني، عىلىمي، ىسكەرلىك جانە قارجى ورتالىعى. الماتى قالاسىنىڭ ۇلەسىنە جالپى ىشكى ءونىمنىڭ (ءجىو) بەستەن ءبىر بولىگى (2022 جىلى 18،5%) جانە قازاقستان رەسپۋبليكاسى بيۋدجەتىنىڭ بارلىق كىرىستەرىنىڭ تورتتەن بىرىنەن استامى تيەسىلى. شاعىن جانە ورتا بيزنەس (شوب) قالا ەكونوميكاسىنىڭ شامامەن 60%-ىن قۇرايدى. مۇندا رەسپۋبليكانىڭ باس بانكتەرىنىڭ 90%-ى شوعىرلانعان، 111 حالىقارالىق ۇيىمدار مەن كومپانيالار ورنالاسقان.
«بۇگىندە جاھاندىق بەلسەندىلىك ۆەكتورى ازياعا كوشۋ بارىسىندا الماتى قالاسىنىڭ الدىندا دامۋدىڭ جاڭا پەرسپەكتيۆالارى اشىلۋدا. وتكەن جىلى ءبىز «الماتىنىڭ 2025 جىلعا دەيىنگى دامۋ باعدارلاماسىن جانە 2030 جىلعا دەيىنگى ورتا مەرزىمدى پەرسپەكتيۆالارىن» بەكىتتىك. قالانى دامىتۋ باعدارلاماسى ينۆەستورلار ءۇشىن جوبالاردى ىرىكتەۋ كەزىندە ناقتى باعدار بەرەتىن بولادى. ەكولوگيالىق كۇن ءتارتىبى الماتى ءۇشىن ماڭىزدى. ءبىز ەكولوگيالىق كولىك جۇيەسىنە، تۇرعىن ءۇي مەن عيماراتتاردىڭ ەنەرگيا تيىمدىلىگىن ارتتىرۋعا، كوممۋنالدىق قىزمەتتەردى جاڭعىرتۋعا جانە تاعى باسقا سالالارعا ينۆەستيسيالار تارتۋعا قىزىعۋشىلىق ءبىلدىرىپ وتىرمىز. مەن سىزدەردى الماتىداعى وسىنداي جوبالارعا ينۆەستيسيا سالۋعا شاقىرامىن»، - دەدى قالا باسشىسى ە.دوسايەۆ.