الماتىدا III حالىقارالىق Green Spaces Conference & Expo 2025 كونفەرەنسياسى مەن كورمەسى ءوتىپ جاتىر. ءىس-شاراعا مينيسترلىكتەردىڭ، اكىمدىكتەردىڭ، ءماسليحاتتاردىڭ وكىلدەرى، سونداي-اق، وتاندىق جانە شەتەلدىك ساراپشىلاردان قۇرالعان 2 مىڭنان استام قاتىسۋشى جينالدى.
سپيكەرلەر اراسىندا الماتى اكىمىنىڭ ورىنباسارى الماسحان سماتلايەۆ، الماتى وبلىسىنىڭ اكىمى مارات سۇلتانعازييەۆ، ساۋلەتشىلەر، ۋربانيستەر جانە ءتالىمباقتاردىڭ باسشىلارى بار.
الماسحان سماتلايەۆتىڭ ايتۋىنشا، الماتى ەلدەگى ەڭ جاسىل قالالاردىڭ ءبىرى مارتەبەسىن ساقتاپ كەلەدى.
«جالپى 68 مىڭ گەكتار اۋماقتىڭ 25 مىڭ گەكتاردان استامىن جاسىل جەلەك الىپ جاتىر. ءبىر ادامعا شاققاندا كوگالداندىرۋ دەڭگەيى 13 شارشى مەتردەن اسادى. ءبىز بۇل كورسەتكىشتى ودان ءارى ارتتىرۋعا كۇش سالىپ وتىرمىز»، – دەدى ول.
اكىمنىڭ ورىنباسارى مەملەكەت باسشىسىنىڭ تاپسىرماسىن جۇزەگە اسىرۋ بارىسىنا دا توقتالدى.
«2030 جىلعا دەيىن الماتىدا 2،5 ملن جاسىل ەكپە اعاش وتىرعىزۋ جوسپارلانعان. اسىرەسە، 4-6 مەترلىك ءىرى اعاشتارعا باسىمدىق بەرىلەدى. ولار تەز جەرسىنىپ قانا قويماي، قالاعا بىردەن ءسان بەرەدى»، – دەدى سماتلايەۆ.
ونىڭ ايتۋىنشا، بيىل كوكتەمدە الماتىدا 2 مىڭنان استام وسىنداي اعاش وتىرعىزىلعان، ال كۇزدە تاعى 13 مىڭ اعاش ەگۋ كوزدەلىپ وتىر. بۇل كوشەتتەردىڭ بارلىعى باس بوتانيكالىق ب ا ق پەن اگرارلىق ۋنيۆەرسيتەت ماماندارىنىڭ كەڭەسىمەن تاڭدالعان.
2025 جىلى قوعامدىق كەڭىستىكتەردى جاڭارتۋ جوسپارى بەكىتىلىپ، وندا ساپالى تۇردە كوگالداندىرۋعا باسا نازار اۋدارىلعان.
«الماتى اكىمدىگى ەندى سانعا ەمەس، ساپاعا ءمان بەرمەك. شاھاردىڭ جاسىل قورىن ساۋىقتىرۋ باعىتىندا اۋقىمدى ءىس قولعا الىنادى. بۇل ىسكە بارشاڭىزدى جۇمىلا اتسالىسۋعا شاقىرامىز»، – دەدى الماسحان سماتلايەۆ.
حالىقارالىق كورمە 2 مىڭ شارشى مەتر اۋماقتا ءوتىپ جاتىر. وندا اباتتاندىرۋدىڭ، ءتالىمباقتاردىڭ جانە كوگالداندىرۋدىڭ زاماناۋي تاسىلدەرى كورسەتىلىپ، قازاقستان مەن شەتەلدەن كەلگەن وكىلدەر باس قوستى.