الماتى قالاسى اكىمىنىڭ ورىنباسارى بەيبىت شاحانوۆ تىلەندييەۆ كوشەسىن ۇزارتۋ ءۇشىن مەملەكەت مۇقتاجىنا ساتىپ الىناتىن جەر تەلىمدەرى مەن تۇرعىن ۇيلەردىڭ وتەماقى كولەمىنە قاتىستى ماسەلە كوتەرگەن الاتاۋ اۋدانىنىڭ تۇرعىندارىمەن كەزدەستى.
كەزدەسۋ بارىسىندا اكىمنىڭ ورىنباسارى قالا باسقارمالارىنىڭ وكىلدەرىمەن بىرگە تۇرعىنداردىڭ ءوتىنىش-ساۋالدارىن تىڭداپ، قولدانىستاعى زاڭ نورمالارىنا تۇسىنىكتەمە بەردى.
"قالا قارقىندى دامىپ كەلەدى. مەكتەپ، ەمحانا، سپورت جانە مادەنيەت ورتالىعى، سونداي-اق كولىك ينفراقۇرىلىمىن كەڭەيتۋ، جاڭا مەترو بەكەتتەرىن سالۋ، ماگيسترالدىق كوشەلەردى ۇزارتۋ سەكىلدى ينفراقۇرىلىمدىق جوبالاردىڭ قاجەتتىلىگى ارتىپ وتىر. وسى جوبالاردى جۇزەگە اسىرۋ ءۇشىن بۇرىننان قالىپتاسقان اۋداندار مەن جەكە قۇرىلىس باسىم اۋماقتاردى قايتا ۇيىمداستىرۋ قاجەت. سول سەبەپتى جەر تەلىمدەرىن ساتىپ الۋعا ءماجبۇرمىز. بۇل تاۋەلسىز باعالاۋ نەگىزىندە نارىق قۇنى بويىنشا جۇرگىزىلەدى، اكىمدىك باعالاۋ ناتيجەسىنە ىقپال ەتە المايدى"، – دەدى بەيبىت شاحانوۆ.
كەزدەسۋگە كەلگەن وجەت شاعىناۋدانىنىڭ تۇرعىندارى مۇلىكتىڭ باعالاۋ قۇنىنمەن كەلىسپەيتىنىن ايتتى. سونداي-اق، كوپشىلىگىنىڭ جەر تەلىمدەرى مەن قۇرىلىس نىساندارىنا قاتىستى قۇقىق بەلگىلەيتىن قۇجاتتارى جوق.
"بۇگىندە شامامەن 30 مەنشىك يەسىندە جەر مەن تۇرعىن ۇيگە قاتىستى قۇجات راسىمدەۋگە بايلانىستى قيىندىقتار بار. سالاعا جاۋاپتى باسقارمالار ءاربىر جاعدايدى جەكە قاراستىرىپ، قاجەتتى ءتۇسىندىرۋ جۇمىستارىن جۇرگىزۋى، ال قاجەت بولعان جاعدايدا قولدانىستاعى زاڭناما اياسىندا مۇلىكتى زاڭداستىرۋعا جاردەم كورسەتۋگە ءتيىس"، – دەدى اكىمنىڭ ورىنباسارى.
كەزدەسۋ سوڭىندا بەيبىت شاحانوۆ جەر قاتىناستارى باسقارماسىنا اۋدان اكىمدىگىمەن بىرلەسىپ تۇرعىندار اراسىندا تۇراقتى تۇردە ءتۇسىندىرۋ جۇمىستارىن جۇرگىزۋدى، سونىمەن قاتار باعالاۋ كومپانياسىنىڭ وكىلدەرىمەن كەزدەسۋ ۇيىمداستىرىپ، مۇلىكتى باعالاۋ تالاپتارىن كەڭىنەن ءتۇسىندىرۋدى تاپسىردى.
ايتا كەتەيىك، الماتىنىڭ 2040 جىلعا دەيىنگى باس جوسپارى اياسىندا كولىك قاتىناسىنىڭ قولجەتىمدىلىگىن ارتتىرۋ جانە جول-كوشە جەلىسىن جەتىلدىرۋ ماقساتىندا تىلەندييەۆ كوشەسىن رىسقۇلوۆ داڭعىلىنان قالا شەكاراسىنا دەيىن ۇزارتۋ قاراستىرىلعان.
تىلەندييەۆ كوشەسىن ۇزارتۋ جوباسى ەكى كەزەڭگە بولىنگەن:
1. ءبىرىنشى كەزەڭ – رىسقۇلوۆ داڭعىلىنان ساباتايەۆ كوشەسىنە دەيىن، ۇزىندىعى 5،8 شاقىرىم. مۇندا 123 جەر تەلىمىن ساتىپ الۋ كوزدەلگەن.
2. ەكىنشى كەزەڭ – ساباتايەۆ كوشەسىنەن قالا شەكاراسىنا دەيىن، ۇزىندىعى 4،9 شاقىرىم. بۇل كەزەڭدە 344 جەر تەلىمى ساتىپ الىنۋعا ءتيىس.
بۇگىندە 70 جەر تەلىمى ساتىپ الىندى. ەسكە سالا كەتەيىك، مەملەكەت قاجەتىنە جەر تەلىمدەرى زاڭناماعا سايكەس نارىق قۇنى بويىنشا ساتىپ الىنادى. باعالاۋ مەنشىك قۇقىعى قالاي پايدا بولعانىنا، قۇجاتتىڭ تولىق بولۋىنا نەمەسە بولماۋىنا بايلانىستى ەمەس، ياعني باعالاۋ بارلىق جاعدايدا نارىق قۇنىنا نەگىزدەلەدى.