الماتى اكىمى دارحان ساتىبالدى قالالىق تۋريزم باسقارماسىنىڭ باسشىسى عاليا توقسەيىتوۆانىڭ 2024 جىلعى تۋريستىك سالانىڭ دامۋ ناتيجەسى مەن 2025 جىلعا ارنالعان جوسپارى جايلى ەسەبىن تىڭدادى.
ايتىلعان مالىمەتكە سايكەس، 2024 جىلى الماتىعا 2،3 ميلليون تۋريست كەلگەن. بۇل بىلتىرمەن سالىستىرعاندا 14،8 پايىزعا كوپ. اسىرەسە، شەتەلدىك تۋريستەر سانى ايتارلىقتاي ارتقان: كورسەتكىش 27 پايىزعا ءوسىپ، 686 مىڭ ادامعا جەتتى.
قالاعا كەلۋشىلەر سانىنىڭ ارتۋى الماتى ەكونوميكاسىنا سەپتىگىن تيگىزىپ وتىر. 2024 جىلى تۋريزم سالاسىنان تۇسكەن سالىق 90،7 ملرد تەڭگە بولىپ، الدىڭعى جىلمەن سالىستىرعاندا 1،9 ەسە ارتتى. نەگىزگى كاپيتالعا تارتىلعان ينۆەستيسيا 110،9 ملرد تەڭگەگە جەتىپ، 2،1 پايىزعا ۇلعايدى.
بۇل جۇيەلى ءارى بەلسەندى ماركەتينگتىك ساياساتتىڭ جەمىسى. الماتى حالىقارالىق تۋريستىك رەيتينگتەردە – CNN مەن Booking.com سەكىلدى پلاتفورمالاردا ساياحاتتاۋعا ارنالعان ەڭ تارتىمدى باعىتتاردىڭ ءبىرى رەتىندە تانىلىپ وتىر. 2024 جىلدىڭ قورىتىندىسى بويىنشا الماتىلىق تۋروپەراتورلار شەتەلدىك سەرىكتەستەرمەن 156 كەلىسىم جاساسىپ، 2027 جىلعا دەيىن 110 مىڭنان استام شەتەلدىك ءتۋريستى قابىلداۋدى كوزدەگەن. بۇل كەزەڭدەگى كۇتىلەتىن ەكونوميكالىق اسەر 165 ميلليون اقش دوللارى بولماق (ءبىر ءتۋريستىڭ ورتاشا شىعىنى – 1 500 دوللار دەپ ەسەپتەلگەن).
2025 جىلى تۋريزم باسقارماسىنىڭ نەگىزگى مىندەتتەرى تاۋلى ايماقتارداعى جاياۋ جۇرگىنشىلەر ينفراقۇرىلىمىن دامىتۋ، قوناق ءۇي قورىن كەڭەيتۋ، سونداي-اق، ىسكەرلىك ءتۋريزمدى وركەندەتۋ بولماق. بۇل باعىتتار تۋريستەر لەگىنىڭ ارتۋىنا سەرپىن بەرەدى.
دارحان ساتىبالدى تۋريزم سالاسىن شاھاردىڭ ەكونوميكالىق دامۋىنا سەرپىن بەرەتىن ماڭىزدى درايۆەرلەردىڭ ءبىرى رەتىندە اتاپ ءوتىپ، تۋريستىك ينفراقۇرىلىمعا ينۆەستيسيا تارتۋ جانە الماتىنى ىشكى جانە حالىقارالىق دەڭگەيدە تارتىمدى تۋريستىك باعىت رەتىندە دامىتۋ جۇمىستارىن جانداندىرۋدى تاپسىردى.