الماتى اكىمى دارحان ساتىبالدى «الماتى تازالىق» كوممۋنالدىق كاسىپورنىنا بارىپ، قالانىڭ الداعى قىسقى ماۋسىمعا دايىندىعىمەن تانىستى.
قالا كوشەلەرىن ۋاقىتىلى تازالاۋ مەن جول قوزعالىسىنىڭ قاۋىپسىزدىگىن قامتاماسىز ەتۋ ماقساتىندا الماتىدا ارنايى تەحنيكا پاركى جاڭارتىلىپ جاتىر. «الماتى تازالىق» كاسىپورنىنىڭ قاراماعىندا 700-دەن استام تەحنيكا بار. بيىلدىڭ وزىندە 36 جاڭا تەحنيكا ساتىپ الىنىپ، جىل سوڭىنا دەيىن تاعى 294 زاماناۋي ماشينا اكەلىنبەك. ولاردىڭ ىشىندە كوپفۋنكسيالى جول تازالاۋ كولىكتەرى، JetBroom جۇيەلەرى مەن شنەك-روتورلار بار. بۇل قالا جولدارىن قىس بويى تازا ءارى ءقاۋىپسىز ۇستاۋعا سەپ بولماق.
كاسىپورىندا 2 مىڭنان استام ادام ەڭبەك ەتەدى. اۋا رايى ناشارلاعان جاعدايدا قوسىمشا 3 مىڭعا جۋىق ۋاقىتشا قىزمەتكەر جۇمىلدىرىلماق. قىس ماۋسىمىنا ارنالعان 605 تەحنيكا ءازىر تۇر، 45 مىڭ توننا كوكتايعاققا قارسى ماتەريال قورى دايىندالعان، قوسالقى بولشەكتەر قويمالارى دا تولىق جاساقتالعان.
بيىل اۋەزوۆ اۋدانىندا كارىز سۋىنىڭ جىلۋىن پايدالانىپ جۇمىس ىستەيتىن العاشقى قار ەرىتەتىن پۋنكت ىسكە قوسىلدى. ونىڭ قۋاتى تاۋلىگىنە 1200 تەكشە مەترگە دەيىن جەتەدى. جىل سوڭىنا دەيىن بوستاندىق اۋدانىندا گازبەن جۇمىس ىستەيتىن Trecan-80SG-M قوندىرعىسى نەگىزىندە تاعى ءبىر زاماناۋي قار ەرىتكىش كەشەن پايدالانۋعا بەرىلمەك. ول تاۋلىگىنە 4 مىڭ تەكشە مەترگە دەيىن قاردى ەرىتىپ، سۇزگىدەن وتكەن سۋدى قالانىڭ كارىز جۇيەسىنە جىبەرەدى.
«قىزمەتكە كەلگەن بەتتە-اق الماتىنىڭ سەگىز اۋدانىنىڭ بارلىعىن ارالادىم. سول كەزدە ءاربىر مەكەمە تەحنيكاسىن، قىزمەتكەرلەرىن تانىستىرىپ، تولعاقتى ماسەلەلەرىن ايتقان ەدى. بۇگىندە سول تۇيتكىلدەردىڭ باسىم بولىگى شەشىمىن تاپتى. قالا قىسقا دايىن، ەندى ءبارى سىزدەردىڭ ۇيىمداسقان جۇمىستارىڭىزعا، جاۋاپكەرشىلىكتەرىڭىزگە جانە ەڭبەكتەرىڭىزدىڭ ساپاسىنا بايلانىستى»، – دەدى دارحان ساتىبالدى.
اكىم كوممۋنالدىق تەحنيكانى جاڭارتۋ، جاڭا تەحنولوگيا ەنگىزۋ جانە قار ەرىتەتىن نىسانداردىڭ سانىن كوبەيتۋ ءىسىن جۇيەلى تۇردە جالعاستىرۋدى تاپسىردى. سونداي-اق، ەكولوگياعا زيانسىز كوپكومپونەنتتى كوكتايعاققا قارسى ماتەريالداردى سىناقتان وتكىزۋ جونىندە تاپسىرما بەرىلدى.
دارحان ساتىبالدى مەردىگەر ۇيىمداردىڭ قىسقى ماۋسىمعا تولىق دايىن بولۋىن، قالا كوشەلەرى مەن جولدىڭ كۇتىم ساپاسىن ارتتىرۋدى جانە كوممۋنالدىق قىزمەتتەردىڭ جۇمىسىن تۇراقتى باقىلاۋدا ۇستاۋدى مىندەتتەدى.